KEKULI 17
17
Thessalonika wi Keben
1Paul nu Sila manyi na Amfipoli nu Apollonia pvüdhi sen Thessalonika wi ghoya, nu ciwi Sinagog kesü ben. 2Paul na pi ma yen sa keten ti Sinagog wi wa. Nu Sabbath tsathang kecheng-u jüwi ma anyithu ssinu keccünengli, 3nu Ntsawajüh wina Khrista tsüna ketizen sa nu keshü wina hang shagha ben kesa khimetha pi mathu kiza. Paul na khi, “Hi Jisu cüki khi pi nthu kiza kebenwa hana Messiya le!” 4Mathu pahan na nondiya nu Paul nu Sila manyi nie wa, tsüti nza alikesathu nu Grik nyi akhang keti na Anyiza nondiya.
5Isala Judah nyithu na anyonsa nu ayela wi anyi ketesüthu kejon saghu pi anyunuti tsüwa wi anyi pakivvü shagha. Mathu wala Jason jjen vü nu Paul nu Sila manyi ghan sen nu anyitenti tuwi wale sa. 6Isala mathu na manyi mu meyala kesa wi Jason nu kenondithu pahan zan sengho anyunutiwa wi kekhang kesenthu tuwi jisha, “Anyi hathu hana apen tsüdi wi nyu pakivvü den! Mathu na ithu nyunuti wi la ghodha, 7nu Jason na mathu ssiya le. Mathu tsüdila kadimi kepa wi ma nyan Jisu kesa tsü benle khi nu Rom kadimiwa yen tsü pakhhi den.” 8Mathu na ajüh hathu ha sen nu anyitenti nu anyunuti wi kekhang kesenthu wi kekivvü pfüsichi. 9Kekhang kesenthu na Jason nu kepathu yala apisa pi dhi nu bvü thsüa.
Berea wi Keben
10Aghaja sa meyi kenondithu na Paul nu Sila manyi kesun pi Berea wi wa thsüa. Manyi na wa cu keya wi Sinagog wi du. 11Anyi hathu na Thessalonika nyithu miwi meshonki. Mathu na lebenchi ntsa nu ketsijüh tsü kina, nu Paul kekhi tsüna ntsakhiwala nye khe chüyale kesalina keshüthangla Ntsawajüh tsü si. 12Mathu kejonla nondiya; atheghi kemehai wi keshhugho Grik nzathu nu npvüzathu la kejon na nondiya. 13Isala Thessalonika wi Judah nyithu na Paul na wa Berea wi la Anyiza jüh khi pi nyu sansi benle kesa chüya meyi mathu na wa ciwi anyithu kethukehi nu kekivvü pfüsi. 14Tsalina kenondithu na Paul kesun pi atssükaten yyi wi wa thsüa, isala Sila nu Timothi manyi na Berea wi ben wa. 15Paul ssinu kewathu na ma ssi wa Athen kecu chi cüa. Tsaseng wi mathu na Paul wina Sila nu Timothi manyi ya wan gho ma gweghe yalo kesa kecükegwe sen nu Berea wi gho neng.
Athen wi Keben
16Paul na Athen wi Sila nu Timothi manyi hie keben jü ma anyunuti wi atsikezhüthu pong keben mu pi ma leben güccü ntsa sa. 17Tsalina ma atsathangla Sinagog wi Judah nyithu nu Judah nyi nkenye Anyiza kinyi ketenthu nu asenkesapen wi anyi metu keyathu tsüdi ssinu keccünengli. 18Ciwi Epikuri nyi nu Stoik kesansithu la gho ma ssinu keccücanli. Mathu pahan na “Hawa ha kejüphon jüh mangwa khiben nu?” isa keü.
Kepathu na luneng, “Ma asang cenpvü cüki khiben.” Paul na Jisu nu ma hangneng-keshagha cüki pi kesansi ghena mathu hati khi. 19Tsalina mathu na ma ssinu anyunuti hoho Areopaga tuwi wa nu keü, “No ajüh ketheü khi pi nyu sansi keben ha mangwa jjügi khe ikhang la chüya mvu ben le! 20Ikhang na no ajüh kekhi wi ajüh ketheü pahan zayale, tsalina ikhang tsü jjügi chüya mvuben.” 21(Kepaghenanye Athen nyithu nu asang ciwi hang kebenthu tsüdila matsü dedi pi ajüh ketheü cüki tsü khi nu kina mvu kesalina.)
22Paul na anyunuti hoho Areopaga tuwi ngan nu khi, “Ae, Athen nyithu, hi nthu na keccüna sen tsatan ketenthu kesa muben. 23Kepaghenanye hi kegoe sen nu nthu nyunuti ghang kewa wi nthu kekinyipen wi ‘Pi nkechü Nyiza kesü kecü’ tsüti zhü ketheng muya. Tsalina nthu na nchüla kinyi ketenwa tsü hi khi pi nthu kizaden. 24#1 Kad 8.27; Isa 42.5; Kek 7.48 Anyiza ayyi nu tsü miwi hang kebenthu tsüdila kesachiwa, ma atssan nu ayyi miwi Apvüwa ghena anyi kwen pi kesa kekinyijjen wi ha hang nten. 25Nu ma kahhatu nyi ti anyi kwen pi ma ghena kekuli tsü nsenla mehai, kepaghenanye ma kahang, ahathakishhu, nu pala tsüdi pi anyi tsüdila cüden. 26Ma anyi kesü wina anyi mizza tsüdila sachi nu mathu yala ayyi tsüdi wi hangya thsüdha. Ma npi wina mathu ghena matsü nu kahang pen sa pi theng cüdha. 27Ma hathu sakechi ha mathu ya ma kenondi wina ma meshen nu bhaya thsüle kesalina. Anyiza na nthu thola ssinu temeja nbenle; 28pahan na kekhi ti,
‘Ithu na ma wi hang, kuli, nu kahangli benden; ’
Ha na nthu zakecithu pahan na kekhi ti,
‘Ithu na ma tsangathu.’
29Tsalina ithu na Anyiza tsangathu lethu, Anyiza tsüna anyi acho kemehai nu palakechü wina suna rükatssü nyelela alon menkedhu pi atsikezhü tsüti she kesa meshen yishü. 30Anyiza na anyi nkechü tsüwi tsü mula nkemu ti teshi cüdha; isala khilitsü anyi kahe wi keten tsüdila mathu nkemehai wina khapeghe yalo kesa ahza khuchidha le! 31Kepaghenanye ma anyi kesü kessiya kesawa wina ketsatan sen nu ayyi maben jühkaghaten keten tsathang kesü ssan pi thengdha le!”
32Mathu na Paul na keshü wi hangneng-keshagha cüki kekhi zakeya wi pahan na ma nankeqhe, isala kepathu na khi, “Ikhang na nshinyi wi ha cüki kina neng mvuben.” 33Isanu Paul na mathu jawi na bvüa. 34Isala anyi pahan na ma nie wa nondiya, tsü jawi hoho wi anyi kesü Dionusia; nu nza kesü Damari kesa nu kepathu la ben.
Currently Selected:
KEKULI 17: RENGNBSI
Highlight
Share
Copy

Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.