KEKULI 12
12
Kemeten-kemesha Ji kayi kesa
1Ha tsüwi ha Herod Kadimiwa #12.1: Herod Kadimiwa: nyelela Kadimi Agrippa 1, Palestin yyi tsüdi miwi kekhang kesenwa na kemehu nyithu pahan meten-mesha shagha. 2Ma njünnu pi Johan cünyuwa Jakob süthi thsüa. 3Ma tsüna Judah nyithu kenen le kesa mukeya wi ma wala Pitor la ghanya. (Hawa ha Azimi nkechi Mesa Kemishu Kho tsüwi sa.) 4#Bvü 12.1-27 Ma Pitor ghanya nu pi akhang mejü na meshu mejüjü sala aghihie keben tssüzüjjen wi chia. Herod na Shhukeya Kho kesa seng wi Pitor ssigho anyithu tuwi ajühkaghaten le sa. 5Tsalina Pitor pi atssüzüjjen wi chitheng, nu kemehu nyithu na ma ghena Anyiza wi khie ntsa saben.
Atssüzüjjen wina Pitor Teshichi kesa
6Herod na ma ssinu anyithu tuwi npi kegho ghaja wi Pitor na amighe ssüli keni pi ma bhen pvünu aghikehie keni jüwi jenben, nu aghikehiethu na atssüzüjjen jenka hie ben. 7Zuli tangnyilo kesü na wan gho ciwi nganya nu kewegü kesü na ajjen keshondhi tsü wegüya. Nu tangnyilowa na Pitor zankejula ma pamechü nu khi, “Wan, shagha lo!” Amighe ssüli pi Pitor kwen kebhen tsü ma ketanla qanca. 8Tsaseng wi tangnyilowa na khi, “Ngeshi qhanya nu nccüguwen pvüyalo.” Pitor na tsüti saya nu tangnyilowa na khi, “Nthsü mphiya nu hi nie ghalo.” 9Pitor na atssüzüjjen wina ma nie sen shhu, isala ma tangnyilowa na kuli keben tsüna atsentsa wila nye khe nchü, ma kemanthi muben le meshen. 10Manyi ajenka atuwa wi shhuya, nu tsaseng wi keniwa wi shhuya, nu asakhenwa wi amighe jenka anyunuti wi keshhuwa wi tsü ghoya. Ajenka tsüna ma ketanla sha. Manyi wa alen tonti cukeya wi tang- nyilowa na wan Pitor teshi nu bvüa.
11Tsaseng wi Pitor na ma miwi khati sa khe chüya nu khi, “Hawa ha atsentsa wi le kesa hi khili chüyadha! Apvüwa na ma nyilo kesun pi Herod kekhang nu Judah nyithu na meshen nu kiden kebenthu tsüdi wina hi khushiyadha.”
12Ma kekuli hathu chükeya wi anyi kejon na saghu nu kekhie sa keben Johan Mark jja Maria jjen wi tsü wa. 13Pitor na akhemi wi wala ajenka kekha chi nan maghale kesü ma nyan Rhoda kesa tsüna ajenka sha chile shhugho. 14Ma Pitor hhai chüya nu ma nonghe ntsa sa ajenka la nsha chila bvü neng du Pitor na akhemi wi benle kesa mathu kiza. 15Mathu na “No deja benle” khi. Isala ma ntsakhiwa le kesa khi khvu sa. Tsalina mathu luneng, “Tsüna ma ghamu saben.”
16Tsü meyi Pitor na ajenka kekha neng chi. Asakhen wi mathu wala ajenka sha chi nan ma muya nu mathu mansa. 17Ma kwen kejen pi mathu ccen benlo kesa kiza, nu ma Apvüwa na khati nu atssüzüjjen wina ma ssigho khe khimetha pi mathu kiza. Ma khi, “Ha pi James nu kenondithu kizalo; ” isanu ma apen tsü teshi nu kepa wi bvüa.
18Ghanenwa wi Pitor na khati sadha nu kesa aghikehiethu jawi kivvü ntsa sa. 19Herod na Pitor bha nanlo kesa ahza khuchia, isala mathu na ma mu meya. Tsalina ma aghikehiethu jühkaghaten nu mathu pi shü thsülo khichia.
Ha seng wi Herod na Judea teshi nu wa Kaesarea wi matsü keu ben.
Herod Keshü
20Herod na Tur nu Sidon nyithu miwi aghepvü ntsa sa, tsalina mathu na akhang sa wala ma metu. Mathu atuwa sala kadipen wi kedi kesü Blasta tsü zan pi mathu wiwa saya. Tsaseng wi mathu na Herod ssinu keccawa sale wa, kepaghenanye mathu yyi tsüna kadimiwa diyyi wina kedsakejjü tsüdi muyaden.
21Atsathang ssan ketheng ghanan wi Herod na ma kadimi thsümeni pvüya nu ma kadipen wi donki nu ajühkhi pi anyithu kiza. 22Anyithu na magha nu khi, “Hawa ha acenpvü kesü na ajühkhi keben khe anyi nye le!” 23Tsü meyi Apvüwa nyilowa na Herod whengshia, kepaghenanye ma Anyiza nkinyiküla. Acaniethu na ma ghothi nu shü.
24Tsü tsüwi Anyiza jüh na ji kayi nu shigü kayi wa.
25Barnaba nu Saul manyi na jühketsinyi kekuli sacen nu Johan Mark ssinu mathu gweghe Jerusalem wi gho neng.
Currently Selected:
KEKULI 12: RENGNBSI
Highlight
Share
Copy
Want to have your highlights saved across all your devices? Sign up or sign in
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
