ZEKARIA 10
10
Kenishwishü Titse Npugü le Zoshwikeshü
1Tsenbwe ka tsangri shü lotse Npugü ka kehi thyülo. Nmhu nipe no tsangri shüo temi aphu genyu low no jvüri chwi ryülo kehü tsüle Npugü. 2Temi le teromen lo temvünyu nthon hü, ai tsüdan le kenkukenru lo kenrun kenryü zoshü hü. Peha le me min ko zoshü, ai tsüle hagun tson tsinzü kehü gwünzin; anyugun le hagun nyun thyü nbwen kehü tsüle kenrun le. Tsü genyu temi dan le nmhekela tanyü hontse nmhon tin laso. Anyugun sharhi kendi genyu kenjün thyü bin nle.
3Npugü le zohü, “Ale atemi so kekvu sen kebin sinrünyi nyu dan ge anyunta bin nyo, ale shaja pe anyugun tsüti. Juda temi dan le aho, Kekvutsin Npugü, ale anyugun nucha loti. Anyugun le a teri kethyü keru kekvu dan thyüti. 4Anyugun dan nyu kekvu kesen, sharhi, lo rihü ketsen nrün temi le soryüo atemi ketsen ti. 5Juda temi dan le shüpahü kekvunyu, anyugun shwikerüchün nyu tenpe tsonda ka kenbe nyu kedü la kehü nyu hontse ti. Npugü le anyugun zen kehü genyu anyugun le terithyüo keru ge kebin anyugun shwikerüchün nyu temi dan so-e kvu lati.
6“Ale Juda temi thyü nko shüti;
Ale Israel temi kenishwi shüti.
Ale anyugun shwi njün shüo
anyugun aphu zen ka ki niryü ti.
Anyugun le ale thame ka-e khela
kemvu nyu hontse loti.
Ale anyugun Npugü Sunggigü;
ale anyugun kehi kenishü ti.
7Israel nyu temi le shüpahü nyu hontse nko ti,
vainzu tsükelo nyu hontse shekerhün thyüti.
Anyugun tsipwen le kvukelo higü hi rüchün-o
Npugü le thyükeshü dan genyu anyugun kenyüti.
8“Ale a temi ko kequen pe
nme thyü lati.
Ale anyugun kenishwi shüo
nduka hontse anyugun no swülobu keho thyüti.
9Ale anyugun no senyedan nyu kezen la-e
bin nithen ki-e anyugun le arüchün hüti.
Anyugun lo anyu nyenyu le rhün bin-o
kengüo kaki raniryü ti.
10Ijipt lo Assiria ki ale anyu zen kaki ryüo
anyugun npfü anyu kazü nyu bin loti.
Ale anyugun no Gilead lo Lebanon nyu bin loti;
temi no kazü apentha kesü thyüti.
11Anyugun le anyugun zida gwakemvu pfüthü kegü ka,
ale zükentyü dan vü lati,
lo Nile zükentsun no sin lati,
Ketekho kehü Assiria nyu le tsenyo la,
lo Ijipt nyu le a-kekvu nmhe lati.
12“Ale a temi thyü nko shüti;
anyugun le arüshvu lo ajozen ti.”
Npugü le zoshü laso.
Currently Selected:
ZEKARIA 10: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
