MARK 12

Vain Low Ketsü Pe Jokejvü Zokeshü

(Mt 21:33-46; Lk 20:9-19)

1Tsüselo a-le jokejvü pe anyugun ka zo sola, “Temi nme le vain low tsüshü, lo a-le chwi thyü pe hunlo, tson-o vainsha kethün bin nme thyülo, lo rikhun bin nme thyülo njüo tsü pe low ketsü nyu dan me tenyen shüo a-le rünyi kecha nme ki gunla. 2Tson-o a-gwünkho ka low ketsü tsüdan ka, vainsha hyukelo rüchün-o a-le a-gonyu nme nishü. 3Tson-e anyugun le temi tsügü tenlo njüo a-vü, tson-o thame pe a-gogü tsü tsümvuo a-no gunla. 4Tsüsika ko a-le a-go kecha nme nipe tsüdan ka shünishü; tsüselo anyugun le a-pe vü nthyü sa shüo a-nshwen nyhün sala. 5Lo tsüsika ko a-le a-gonyu kechanyu nme ni nishü, ai anyugun le tsügü ko dushvu nila. Lo tsüsiki-e kechanyu kechon sin nishü, ai anyugun le peha vü lo peha dushvu la. 6Tsüsiki-e a-le temi nme le bin zun, tsügü tsü le A-nyu A-kesogü. A-le hihontse rüchün-o zo, ‘Anyugun le Anyugü we rühvulo ti,’ tson-o a-nyugü nipe anyugun ki shü kenkhin tsin thyüshü. 7Ai low ketsünyu dan le anyugun npvü kenthon-o, ‘Higü hile a-hon tha aphu gwenlo nrün gü, nu, ngun a-dushvula nu! tson-o a-hon tsülope ngun hon thyülo ti!’ 8Tson-o anyugun le a-tenlo njüo a-dushvula, lo a-khipe vain low n gwenzin shwe shüla.

9“Tsonyatselo vain low npugü le dihontse soti la? Jisu le ketso.” “A-le ryüo low ketsü tsüdan dushvu küla ti, tson-o low tsü lope kechanyu tsü la ti.

10‘Tso keyhen nyu le khekela

tso gü

mele tsü lope a-qün nyu keda

tsingü thyüla.

11Lo tsü Npugü ge thyülo

laso;

lo tsü rüchün pe ndunthyü!’ Tsonkethyü ketsinlesü jo higühi hagun le swü mvu ole?”

12Tsükatsü a-le anyugun ta-o jokejvü higühi zo, tsekethyü anyugun le shalo njüo a-tenkelo rüchün so, ai temi dan kenshvu genyu anyugun le a-khelao tinla.

Kaisar Khajana Keshvu Rüla Ketsokethyü

(Mt 22:15-22; Lk 20:20-26)

13Tsüsika anyugun le a-jo ka a-ten kelo rüchün-o Farisinyu lo Herodianyu peha nipe a-ki shü. 14Lo tsüdan le ryüo, “Senkethyü gü, nle ketsingü le, lo nle temi nme-e nshvu hü kemvu agun le shabin nyo; kechamvule nle temi nme-e so kecha thyü hümvu, ai joketsin zo-o Sunggigü tsongü rüla zope mehi kehü genyu. Kaisar khajana pe ketsü le tejvü le mvula?”

15Ai a-le anyugun kerokon shalo njüo anyugun ka, “Hagun le nyuthyüo asemen hü nla? Ano shwishü nrün genyu pisa sen aki ryülo.”

Tsontsin anyugun le pisa tsü senryü, 16lo a-le anyugun ka, “Hile segü men lo segü zan la?”

Tsontsin anyugun le a-ka, “Kaisar le.”

17Tsonshü ntsin Jisu le anyugun ka, “Kaisar hon lo pe Kaisar tsüla lo, lo Sunggigü honlo pe Sunggigü tsüla lo!”

Tsüselo anyugun le a-jo genyu anyugun dunthyü la.

Rhünni Keso Rüla Ketsokethyü

(Mt 22:23-33; Lk 20:27-40)

18Lo tsüsika rhünni keso ndi tsekethyü zokehü Sadukinyu dan me le ryüo, 19“Senkethyügü, Mosa le lesü thu pe agun ka keshü le, kengüo tsasikezen gü thyükehü nme le a-nyenyu ndio sila-o a-nu khepe a-sikipon shüla yatselo, a-sikezen gü no a-nu tsü zen bin-o a-tsagü tsipwen yhunlo tseshü. 20Lo agun dan nyu nduka mi tsenyü le tsasikezen gü thyüo bin hü. Lo peshü gü le tenulo shüo a-tsipwen nme-e ndio sila. 21Lo tsügü sika gü ko tenu tsügü zen bin, ai a-nyenyu nme-e ndio sila. 22Lo kenshen gü ko tsü hontse thyüni, lo tsü hontse mi tsenyü tsü aphu a-lo-o a-nyenyu nme ndio sila. Tson-o tsüdan aphu lo tenugi ko tse sila. 23Tsügenyu rhünni keso ki tenunyu tsügi le anyugun digü nu thyü tila? Anyugun mitsenyü aphu a-lo kethyü genyu.”

24Tsükatsü Jisu le anyugun ka, “Hagun le ketsin lesü lo Sunggigü kekvu sha kemvu, higenyu hagun le tha thyüzüla hü mvu ole? 25Temi le rhünni keso siki anyugun le tenu lo-e hümvu, lo kalu-e hümvu, ai tsangge lokethyünyu hontse bin kü tinla hünyo. 26Ai kesinyu le rhünniso kelo rüla nduka Sunggigü le senhvu nme ge Mosa ka, ‘Ale Abraham Sunggigü, lo Isak Sunggigü, lo Jakob Sunggigü,’ tsonkethyü hagun le Mosa lesü nyu swü shwi mvuzun ole? 27A-le kesinyu Sunggigü mvule rhün kehünyu Sunggigü le; hagun le rüchün zü sa hü nyo.” tsonla.

Johokeshü Keda Tsingü.

(Mt 22:34-40; Lk 10:25-28)

28Tsükatsü lesükeshatsin nyu nme le ryüo anyugun kenyi kebin dan nyu bin. A-le Jisu le zo tsentsü pe Sadukinyu dan keni keshü hyulo njüo a-ka, “Johokeshü dan nyu jo digü le jo keritsin gü la?” tson-o a-ka ketso.

29Tsontsin Jisu le a-ka, “Hire, ‘Israel, nyülo ta! Npugü tsü le Sunggigü le, Npugü le nme nti. 30Tsügenyu nle nnyun aphu, n kekvu aphu, n keyhunronzin aphu, lo n kerüchün aphu sen-o Npugü so lo rühvulo ta,’ tsonkethyü gü tsü le jo kerigü le. 31Lo kenyhun gü le, ‘Nle n kazonkazin so pe n npvü n keso hontselo chi,’ tsonkeshü gü tsüle johokeshü nme-e hihvu nyeki keda ndi.”

32Tsontsin lesükesha tsingü le a-ka zonio, “Ketsin le, Senkethyü gü, Npugü le nme, lo tsü le Sunggigü, lo tsüsiki kecha ndi tsekethyü nle zo tsentsü shü laso. 33Lo nle nnyun aphu, lo nle nkesha nkerüchün aphu lo nkekvu aphu sen-o a-so lo a-rühvu titse kethyü lo nkazonkazin so pe n npvü nkeso hontselo titse kethyü tsüle tha kerüshvu aphu nyeki gwa.”

34Tsontsin a-le tha rüchün petsü sao zoni keshü shalo njüo Jisu le a-ka, “Nle Sunggigü keda zen-o nithen sarimvu le.”

Lo tsüsiki we temi nme-e a-ka tha ketsoshü nrün la.

Jisu Le David Nyugü Rüla Ketsokeshü.

(Mt 22:41-46; Lk 20:41-44)

35Tsüsika Jisu le Kershvuka nyu me senthyü kebin ka a-le zoshü, “Nyuthyüo lesükeshatsin ju le Khrista gü no, David nyugü letse hü nla? 36David le a-npvü nduka Kenshün Kapu nyu hihontse zo njü:

‘Npugü le a Npugü ka:

ale nshwikerüchün nyu pe npha

hensin shüla kemvuthen,

nle aben njüzin bin tselo,’ tson zoshü.

37David ko tsügü no, ‘A Npugü’ le tselo, tsügü le nyu tsethyüo a-nyu thyülo tila?”

Lo tsükatsü temi danda le a-sherhün satseo a-khwen nyülo.

Jisu Le Lesükeshatsin nyu dan Kemu Kezo

(Mt 23:1-36; Lk 20:45-47)

38Lo a-le anyugun senthyü ketseka, a-le zo, “Mirün ketseyho sen kehü lo hakethyü bin nyu-e meno a-kelu kehü, 39lo sinagog ka nyu bin ketetso ka lo kejün keho ka nyu kedanyu bin le a-kenyü kehü lesü keshatsin nyu dan genyu hagun petsülo chi. 40Tsüdan le maginyu dan ka khintyü hünyo, lo tharothyüo kehi thyü thonsa hünyo; tsüdan we me nyeki a-shaja le tsen kvu hyuti.”

Tenunyu Maginyu Le Thahokeshü

(Lk 21:1-4)

41Tsüsika a-le mele tha kequen kehü khin mhundyü nyu dunlo, tson-o temi dan le seki raka pe thakequen khinyu shü kebin tsü shwi bin; lo tsükatsü kenyanyu kechon ki-e tha kechonchon pe hoshü bin. 42Tsüka tenunyu magi tha kendinyu nme le ryüo tero pisa kenyhun, a-kon le pisa nme kho kewhe pe thakequen kehü khinyu shü. 43Tsontsin a-le senthyükelo nyu dan kope a-ki shülo njüo anyugun ka, “Ale hagun ka zo tsentsü shü ti, mele tha hope thakequen khinyu shü kebin aphu nyeki magi tha kendi higi we tha hoshü chonkvu laso. 44Kechamvule me we kesükela kethyü pvünyu hoshü bin nyo; ai tenunyu higi we a-kendi pvünyu-e a-pvü a-gin kebin aphu hoshü kela genyu.”

Currently Selected:

MARK 12: REGSBSI

Highlight

Copy