YouVersion Logo
Search Icon

MARK 10

10
Kami Kegwün Kela Rüla Senkethyü
(Mt 19:1-12; Lk 16:18)
1Tsüsika Jisu le tsünyu solo njüo Judia lojvü teki lo Jordan züri se likipon ryüla. Tsükatsü temi danda gü tsüle a-ki niryülo, lo a-le ajvü hontseo temi tsüdan senthyü nishü.
2Lo tsükatsü Farisinyu le ryüo a-ka, “Pechenyu le a-nunyu khekela tsüle tejvü ole?” tson-o a-semen-o a-ketso so.
3Tsontsin a-le anyugun ka, “Mosa le nduka hagun ka nyu zoshü la?”
4Lo anyugun le, “Mosa we khekela lesü thu pe tsüla njüo khela lotse zole.”
5Ai Jisu le anyugun ka, “Hagun nyun kerü genyu a-le nduka tsühontse thu shü le. 6Ai sokerika Sunggigü le thyükeshü we peche nme lo tenu tse thyüshü. 7Tsügenyu pechenyu le a-pepvünyu khelao a-nunyu kho nni tinla ti, lo au le kengüo thyüme thyüla ti. 8Tson-o au kecha thyüo kenyhun thyü mvule thyüme thyü lati. 9Tsügenyu Sunggigü le thyü kerhün keshü tsü temi no thyürhola nyalo.”
10Tsüsika senthyükelo nyu dan le ryüo kanyu tsü rüla Jisu ka ketsoshü. 11Tsükatsü Jisu le anyugun ka, “Temi lihigüe a-nunyu khelao tenu kecha loni yatselo a-le a-nu nyhen-o keyüla laso. 12Lo tenunyu-e a-npvü a-nyepvünyu khelao kechanyu ka kaluni yatselo tenu tsügi-e keyüla laso.”
Jisu Le Jochü Pe Ntsenyu dan Ketsü
(Mt 19:13-15; Lk 18:15-17)
13Tsüsika mele Jisu no ntsenyu dan kesüshü lotseo ntsenyu dan me zen ryü; ai senthyükelonyu dan le tsüdan kesüla. 14Tsüselo Jisu le tsü shwi pe a-kenyü mvuo anyugun ka, “N tsenyu dan no aki ryülo, anyugun khin nya chi; kechamvule Sunggigü keda le hihontse kethyü nyu hon kethyü genyu. 15Ale hagun ka zo tsentsü shüti, temi lihigüe ntsenyu nme hontseo Sunggigü keda fülo kemvu we a-le tsünyu yü keloi kemvu genyu.” 16Tson-o a-le tsüdan pensolo njüo a-ben hvu lope tsüdan ge shüo jochü pe tsüdan tsüshü.
Kenyanyu Nme Le Tha Ketso Kethyü
(Mt 19:16-30; Lk 18:18-30)
17Tson-o a-le tson nyu gunzhü kethyü ka temi nme le n ton ryüo a-mhundyü ka nkhüntsü lo njüo, “Hire, senkethyü kegwa gü, ale kethonthen kerhün hyulo nrün genyu dihontse thyülo mvuloshvu la? tson-o Jisu ka ketsoshü.”
18Tsontsin Jisu le a-ka, “Nle nyuthyüo ano kegwa gü letse hü nla? Kegwagü tsüle nme nti a-me kecha ndi, lo tsüle Sunggigü le,” tsonshü. 19Tson-o a-le a-ka, “Nle me dushvu nya, keyüla nya, rühu nya, kenku jünzo nya, mekesa jozo nya, Npvü njvünyu rühvulo,” tson kenjü johokeshü jo nko sha bin ti.
20Tsontsin a-le Jisu ka, “Senkethyü gü, ale a nchekanyu hi aphu zen soryü laso.”
21Tsontsin Jisu le a-nrishüo a-shwi njünla njüo, “Nle tha nme timvu bin zun, gü nhon kebin tsü aphu jwen pe kendinyu tsüla chi, tsonlo yatselo nle tsangge n kenya chonlo ti, tson-o ryü a sithenlo chi.” 22Ai temi tsügü le Jisu jo tsügenyu a-mhun susen lola, tson-o a-nyun gwamvu satseo tin gunla; kechamvu le a-le nnya sa kebin nyu nme kethyü genyu.
23Tsontsin Jisu le kerükerio a-le senthyükelo nyu dan ka, “Kenyanyu le Sunggigü keda nyu yü tsensa kethyü hile la?” 24Lo senthyükelo nyu dan le a-jo tsügenyu anyugun dun thyüla; ai Jisu le anyugun ka, “Hire, ntsenyu ju, temi a-npvü a-kenya tenyen kehünyu le Sunggigü keda nyu yü tsenri hile! 25Kenyanyu nme no Sunggigü keda bin nyu yü nrün we mvuo ut khipe chwenkü nyu kenna we nne kvu ti.”
26Tsontsin anyugun le anyugun dunthyüo a-ka, “Tson yatselo senyu le kenikelo hyulo gwa tila?”
27Tsontsin Jisu le anyugun nrilo njüo, “Temi le tsü thyü loho, ai Sunggigü we tson mvu; kechamvule Sunggigü we tha lihie thyülo gwa kethyü genyu.”
28Lo tsüsika Pitor le a-ka zo, “Agun we tha aphu khelao nsithen tila so,” tson sola.
29Lo Jisu le, “Ale hagun ka zo tsentsü shüti, temi nme-e a genyu lo jolokegwa genyu tseo, a-ka, nmvue a-tsasikezen nyu, nmvue a-lüginyu, nmvue a-jvünyu, nmvue a-pvünyu, nmvue a-nyenyu, nmvue a-low khelao; 30ntsoka keyhun hinyu meno a-nthyü nnyü kehünyu le, a-ka, a-low, a-tsasikezen nyu lo a-lüginyu, lo a-jvünyu lo a-nyenyu lo a-kazü jün tsi-e hyulo keho ndile; tsüntimvule siki kethonthen kerhün-e hyu sinlo ti. 31Ai kerinyu kechon le khinla ti, lo kekhinyu kechon le rila ti.”
Jisu Le A-kesi Lo Rhünni Keso Rüla Kezo Gwünshen Gü
(Mt 20:17-19; Lk 18:31-34)
32Jisu lo a-le senthyükelo nyu dan le Jerusalem nyu nsin titseo tson nyu kehü ka, Jisu le anyugun mhundyü ka hü. Tsontsin anyugun le anyugun dunthyüla; tson-o anyugun sikethen nyu dan le nshvu lola. Tsükatsü a-le tseryü kenyhun che dan zenlo njüo a-ge tha thyüla nrün rüla zope anyugun hi. 33Lo a-le, “Hire, ngun le Jerusalem nyunsin zhü; lo mele Temi Nyugü ten pe peshükeda tsin ju lo lesükesha tsin ju ka shü lati, lo anyugun le a-nmuo a-dushvula lotse soti, tson-o a-khipe Judakemvu nyu dan ben ka shü lati. 34Tson-o tsüdan no a-khipe keyüthyü, lo nsü pe a-nye ti, lo a-vüti, tson-o a-dushvu lati; lo jonshen siki a-le rhünniso lati,” tson zoshü.
Jakob Lo Johan hvu Kehi
(Mt 20:20-28)
35Tsüsika Zebedi nyuhvu Jakob lo Johan au le a-ki ryüo a-ka, “Senkethyü gü, ayi le nka tha hi titse kebin gü ayi le nno tsü thyü pe ayi tsünyü bin nle.”
36Tsontsin a-le au ka, “Hai le ano nyuthyü pe hai tsünyü bin nla?”
37Tsontsin au le a-ka, “Nle zankechwi kethyü nyü ayi nme no nben njüzin lo nme no ngwazin tse binlo kegwa hoshülo.”
38Ai Jisu le au ka, “Hai le hi kebin gü tsü shao hi bin mvu; hai le ale tsü titse kebin honpen gü tsü tsülo gwa ti ole? Lo ale baptaiz thyülo nrün baptism gü pe baptaiz thyülo gwa ole?”
39Tsontsi au le a-ka, “Ayi le tsü thyülo gwa le.” Lo Jisu le au ka, “Hai le ale tsü titse kebin honpen gü tsülo gwa, lo ale baptaiz thyülo nrün Baptism pe baptaiz thyü ti. 40Ai aben njüzin lo ngwazin binlo nrün we ale khishülo nrün ndi; ai Sunggigü le bin tsü hvu khipe a-le tsüti tseo ndo kebin nyu tsü ti.”
41Tsüselo mitseryü dan le tsü shalo ntsin Jakob lo Johan au ge anyugun kenyü mvulo la. 42Tsükatsü Jisu le anyugun kope a-ki shülo njüo anyugun ka, “Sunggigü shakemvunyu le meno anyugun kekhenilo kegwanyu no anyugun sogo hünyo, lo anyugun le kedanyu ju no anyugun so npu thyü kehü hagun ko sha bin ti. 43Ai hagun we no tsonlo ho; temi lihigüe hagun dan nyu gon kenyünyu no hagun leyi ti. 44Lo temi lihigüe hagun dan nyu rilo kenyü güno hagun aphu lothyü ti. 45Kechamvule Temi Nyugü ko meno a-leyi titse mvule me leyi titse lo a-phou hoshüo temi kechon rhinhilo titseo ryü kethyü genyu.”
Jisu Le Bartimai Yhütyü Thyü Ngwakeshü
(Mt 20:29-34; Lk 18:35-43)
46Tsüselo anyugun le Jeriko rünyi nyu ryülo; lo a-le Jeriko rünyi nyu a-le senthyükelo nyu lo temi danda dan zenchwi kezhü ka Timia nyugü Bartimia tsekethyü gü le a-yhütyü po lao tson khoka bin-o shvutyü bin hü. 47Temi tsügü le Nazaret nyu Jisu letse kethyü shalo ntsin nra sen-o, “David nyugü Jisu, nle ashwi njün shülo!” tson sola.
48Tsontsin temi kechon le a-no nra nyalo tseo a-kesü sola; ai a-le nra sennio, “David nyugü, nle ashwi njüshülo!” tsonni sola.
49Tsükatsü Jisu le sunlo njüo, “Hagun a-ko shü chi.”
Tsonshü ntsin anyugun le a-yhütyü kepo gü ko-o, “Nnyungwamvu nyao solo chi! A-le nko bin nyo!” tsonshü.
50Tsontsin a-le a-phinya khela njüo tsonchü sen-o Jisu ki ryü.
51Lo tsükatsü Jisu le a-ka, “Nle ano nge nyu thyükeshü le nkendo la?”
Tsontsin a-yhütyü kepo gü le a-ka, “Raboni, ano tha hyulo ta!”
52Tsüselo Jisu le a-ka, “Tsonchü gunlo, nketenyen le nthyü ngwa shü laso!”
Tsonshü ntsin a-le tha hyulo njüo tsonchü sen-o a-sithen tinla.

Currently Selected:

MARK 10: REGSBSI

Highlight

Share

Copy

None

Want to have your highlights saved across all your devices? Sign up or sign in