MATHI 15

Npvü Nbon nyu Jvü Senkethyü Jo

(Mk 7:1-13)

1Tsükatsü Farisinyu lo lesükeshatsinyu dan le Jerusalem nyu Jisu ki ryü a-ketso-o, 2“Nyuthyüo nle senthyükelo nyu dan le npvü nbon nyu jvü gwünrho hü nla. Kechamvule anyugun le chvü ketyü mhundyü anyugun ben tseo tyütsü hü kemvu genyu!”

3Jisu le anyugun ka, “Hagun ko nyuthyüo hagun npvü hagun jvü genyu Sunggigü le jo khikeshü gü gwünrho hü nla? 4Sunggigü le nduka, ‘Npvü njvü nyu rühvulo chi, lo temi ligü higüe a-pvü a-jvü nyu ge jo gwakemvu zo hülo a-no sila ti; ’ tson zo njü nyo. 5Ai hagun we temi ligü higüe, a-pvü a-jvü nyu ka, ‘Hai le aka keche hyulo kezü tsü khipe Sunggigü tsü laso,’ tse kehünyu, tsünyu le a-pepvünyu rühvu mvue gwa; tson hünyo. 6Tson-o hagun npvü hagun jvü genyu Sunggigü jo lope a-kenrun thyü laso. 7Hagun kerokon kehü ju! Isaya le nduka hagun rüla zo tsentsü kenjü le hihontse!

8‘Temi hidan hile a-mün pe arühvu

kehü gwünzin,

ai anyugun nyun we azen-o nithen sa

bin hünyo.

9Ai temi npvü thyükelo jvü pe anyugun jo

thyüo me senthyüo,

anyugun le arühvu ja thyü kehü

gwünzin! tsonla.’ ”

Ngwün Nrhula Kehü dan

(Mk 7:14-23)

10Tson-o a-le temi dan kope a-ki shülo njüo anyugun ka, “Hagun nyülo njüo rüchünlo nye. 11Temi mün nyu keyü le temi gwün nrhula hü mvu; ai temi mün nyu chwikeryü le temi gwün nrhula hünyo.”

12Tsontsin senthyükelo nyu ju le a-ki ryüo a-ka, “Farisinyu jule jo hi shalo ntsin anyugun nyun nta kela, nle shale mvula?”

13Ai Jisu le anyugun ka, “Tsangge kebin Apvü le senshü kemvunyu aphu phüla ti.” 14“Anyugun no tson bin ta! Anyugun yhüpo-o tsontsin pe me zen kehü dan me, lo a-yhütyü keponyu nme le a-yhütyü kepo kecha gü tsontsin zen hülo, au mihvu nren tsokhin nyu che tsüla ti.”

15Tsontsin Pitor le a-ka, “Jokejvü kon tsü zope agun zen shüta.”

16Lo Jisu le anyugun ka, “Hagun ko ntsokhin-e thashalo hü mvu ole? 17Tha lihi-e nmün nyu keyü le nginda nyu yüo khipe kevübin ki shwenla hünyo; tsü hagun le shamvu ole? 18Ai nmün nyu chwikeryü we nnyun ki chwiryü hünyo, lo tsüle temi gwün nrhu hünyo. 19Kechamvule nnyun ki serikemvu kendo, me dukeshü; keyüla, kerühu, kenku jünkezo, selü, hidan hi chwiryü kehü genyu. 20Tha hidan hi le temi gwün nrhula hünyo; ai nben tsemvu tse chvü ketyü le temi gwün nrhula hümvu.”

Kanannyu Tenugi Ketenyen

(Mk 7:24-30)

21Tsüselo Jisu le tsünyu ketu sen-o Tur lo Sidon rünyi hvu kipon gunla. 22Tsükatsü hire, Kanan nyu tenunyu nme le tsü denzin kipon ryüo a-ka, “Hei, Npugü David Nyugü, Nle a shwinjün shüta; anyugi nme le tero gwakemvu le nchün ndyü sa bin hü nle.”

23Ai Jisu le a-ka, thame zoni mvula. Tsontsin a-le senthyükelo ju le ryüo a-ka hi tenge tseo, ‘A-no tinla lo! Kechamvule a-le ngun sinthen-o nrasen bin hü kelasi genyu!”

24Tson-e a-le, “A nipe Israel tsipwen nmhen kela tanyü dan ka nti keshü gwünzin le.”

25Ai tenugi le ryüo a-rüshvuo, “Npugü, a shwinjün shülo.”

26Ai Jisu le a-ka, “Ntsenyu ketyüketsü sen gü tehi mhundyü ka keshü le a-zü mvu.”

27Tsontsin a-le, “Ketsin le, Npugü; ai tehi ko a-npu nyu ketyüketsü bin ge nrhi tsükeryüe jüntyü hünyo.”

28Tsükatsü Jisu le a-ka, “Hire, tenunyu, nketenyen le gonsa hile! Nkenyü thyü pe ntsükelo gü thyülo chi; ” tsonshü. Lo tsü gwünkho ka tsü a-nyu tenugi tsüle gwalo la.

Jisu Le Kehonyu Kechon Thyü Ngwakeshü

29Tsüselo Jisu le tsünyu tin sen-o Galil züda kho nni gunla; tson-o kazüthun ge kügü tsüki bin lo. 30Tsontsin temi danda nme le terothonyu, a-yhütyü keponyu lo kepinnyu, kerügünyu, a-pha a-ben gwakemvunyu kechon-e zen a-ki ryüo khipe a-pha ka hoshü; lo a-le tsü aphu thyü ngwa shü. 31Tson-o temi dan le kepinnyu no jozolo, a-pha a-ben gwakemvunyu thyü ngwashü, lo terothonyu no tsonchü külo, lo a-yhütyü keponyu no thahyu kelo shwi pe anyugun dun thyülo; lo temi tsüdan le Israel nyu Sunggigü shwenla.

Temi Yie zi Ginthyü Keshü

(Mk 8:1-10)

32Tsükatsü Jisu le senthyükelo ju kope a-ki shülo-o, “Ale temi dan shwi njü laso; kechamvule anyugun le jonshen azen hü laso, lo thame tyütsü nrün ndi kelasi genyu; lo ale anyugun kekhün nishü nyümvu, anyugun le tson nenyu pesilalo kenshvu genyu.”

33Tsontsin senthyükelo jule a-ka, “Ngun le dikipon tehen nyu temi hitsü laki ginthyü pe a-gin nyülo nrün, tensü hitsü laki hyulo mon?”

34Jisu le ketso shü, “tensü dikho sen hü nla?”

Tsontsin anyugun le, “Tsenyü, lo tsehü kesheshe keshanyu tse sen hü nle.”

35Tsüselo a-le temi ju no kazü nyu bin külo lotse zoshü 36Tson-o a-le tensü tsenyü lo tsehü dan tse khilo-o; Sunggigü shwen shüo boshwen pe senthyükelonyu dan tsüshü, lo senthyükelo nyu dan le khipe temi ju tsüshü. 37Lo anyugun aphu tsü tyü pe a-gin nyülo; lo anyugun le tyü kensen le khvütsü tsenyü kesü khülo. 38Lo anyugun tsü ketyünyu le nchetenu sinkemvu temi yie zi kho. 39Lo a-le temi dan nishüla njüo run nyu yüo Magadan kipon gunla.

Currently Selected:

MATHI 15: REGSBSI

Highlight

Copy