MATHI 12

Senthyükelonyu dan Le Sabbath Nyü Lowpwe Nrhiketyü

(Mk 2:23-28; Lk 6:1-5)

1Tsüselo Jisu le Sabbath nme nyü me low ketsü nme zin tsüzhü ntsin, a-le senthyükelo nyu dan le nnyola njüo lowpwe nrhityü sola. 2Ai Farisinyu dan le tsü hyushüo a-ka, “Hire, Nle senthyükelo dan le Sabbath jon nyü tejvü kemvu thyü hü nyo,” tson sola.

3Ai a-le anyugun ka, “David lo a-zen kehünyu dan le nduka nnyokelo ka thyü kethyü rüla hagun le swü mvu ole? 4A-le Sunggigü ka nyu yüo peshünyu kemvu we David-e lo a-zen kehünyu dan-e thyü kethyü tejvü kemvu, kipe mehi kethyü tensü tyü so. 5Tsüntimvule Peshü dan-e Sabbath jon nyü Kershvuka nyu tejvü gwünrholae kemu ndi tsekethyü, hagun le tejvü nyu swü mvu ole? 6Ale hagun ka zoshü ti, Kershvuka nye gonkvu kethyü nme le hika bin nyo. 7Tson-e ale kerüshvu gü mvule shwikenjün gü le akenyü, tsonkethyü a-kon shakethyü we, nle mu kemvunyu nmu loho atale; 8kechamvule Temi Nyugü le Sabbath Npugü kethyü genyu; ” tsonla.

Sabbath Nyü Benkesinyu Thyü Ngwakeshü

(Mk 3:1-6; Lk 6:6-11)

9Lo a-le tsünyu chwio anyugun sinagog ka nyu yü. 10Lo hire, a-ben kesinyu nme le tsünyu bin. Tsükatsü anyugun le a-nmu kenyü genyu a-ka, “Sabbath jon nyü me thyü ngwakeshü le a-zü le?”

11Tsontsin a-le anyugun ka, “Hagun peha le tanyü peha le bin-o Sabbath jon nyü tsüle tekhwün küka nto yülalo, a-le tsü süshwi shü mvu ti ole? 12Tsonlo temi we tanyü nyeki a-min tsenkvu mvu ole? Tsügenyu Sabbath jon nyüe tha kegwa tho kethyü tsüle a-zü.” 13Tson-o a-le temi tsügü ka, “Nben shwenshü chi,” tsonshü.

Tsontsin a-ko shwen shü; tson-o a-ben thyü ngwa pe kecha kipon hontse shüla. 14Ai Farisinyu dan le tsünyu chwigü a-dushvukela ndo-o a-genyu kenthon.

Kejükelo Gogü

15Tsükatsü Jisu le jo tsü shalo njüo tsünyu ketun tinla; lo temi kechon le a-sithen gun; lo a-le tsü aphu thyü kesherhün küshü 16tson-o anyugun no a-rüla pe me ka zo nyalo tse tsüdan kekheni la. 17Tson-o nduka Isaya sidyükeshagü no:

18“Hire, Ago A npvü a-kejü

kelogü,

A sokegwa gü, A nyun kie shwi pe akenyü

kethyü gü.

Ale A Kapu khipe a-ge shüti,

lo a-le jo kenjü zope Judakemvunyu

zen ti.

19A-le me zenkenyi lo sen bin loho,

lo tsonda nyu temi nme-e no a-jo sha loho.

20A-jo kenjü gü no kvulo kemvuthen,

A-le nbo tseben ketse-e bope shwenla

loho.

A-le mah kenben ni khu kebin-e bokemhü

loho.

21Lo Judakemvunyu ju le a-zan nyu a-sidyü

le bin loti,” tsonkenjü jo tsü penlo.

Jisu Lo Belzebul

(Mk 3:20-30; Lk 11:14-23)

22Tsükatsü mele Terothonyu, Yhükeponyu, Kepinnyu, lo A-nyetin gwakemvunyu zen-o a-ki ryü, lo a-le tsüdan thyü ngwa küshü, kepinnyu no jozolo, yhükeponyu no tha hyulo, 23Tsontsin temi dan le a-dunthyüo, “Temi higü hile David Nyugü mvu ole?”

24Ai Farisinyu le jo tsü shalo njüo, “Temi higü hile tero gwakemvu kedagü Belzebul kekvu sen kemvu we, tero gwakemvu dan tsü hü loho,” tson.

25Tsükatsü a-le anyugun nyun kendo shalo njüo, a-le anyugun ka zo, “Keda ligü higüe a-npvü a-pvükhola yatselo nkela hünyo; lo rünyi nmvue ka ligü higüe a-npvü a-pvükhola lo binlo hümvu. 26Satan le a-npvü satan hüla lo, a-npvü a-pvükho laso, tson yatselo a-keda le nyu tsethyü binlo tila? 27Lo Ale Belzebul kekvu sen-o tero gwakemvu hüla hülo, hagun nyenyu ju le segü kekvu sen-o tsüdan hüla hü nla? Tsügenyu anyugun le hagun ketsokethyünyu thyü ti. 28Ai Ale Sunggigü Kapu kekvu sen-o tero gwakemvu hüla hü yatselo, tsonlo Sunggigü keda le hagun tilo bin laso.

29“Lo temi nme-e kekvu nme phinlo rimvuo dihontse kekvu tsügü kanyu yügü a-hon khilo mon? A-le a-phin kelo we a-kanyu yügü a-kanyü khilo ti.

30“Temi ligü higüe akipon kemvunyu le A shwikerüchün nyu; lo temi ligü higüe azen-o tha kerhün kemvunyu we bokenthyüla hünyo. 31Tsügenyu ale hagun ka zo tsentsü shüti, ‘Kemu lo me kenkhin lihi-e jü pe temi tsüti; ai Kapu kenkhin we jü pe tsü loho. 32Lo temi ligü higüe Temi Nyugü ge jo gwakemvu zo-e jüshü ti; ai temi ligü higüe Kenshün Kapu ge jo gwakemvu zolo, nje ntsenyüe lo hisiki-e jü pe tsü loho.

Terashabin gü Lo A-sha gü

(Lk 6:43-45)

33“Terasha kegwa hyulo nrün genyu a-bin gü no gwa mvulo shvu, terasha binle gwa mvulo a-sha le gwa loho; kechamvule a-sha ge a-bin shalo hünyo. 34Hagun ribo tsipwen dan, hagun le gwamvuo dihontse tha kegwa zolo gwa tila? Kechamvule nnyun ki tha kechon kebin nyu nmün no zochwiryülo kehü genyu. 35Temi kegwanyu le a-thakhin kegwa nyu tha kegwa henshwishü hünyo, lo temi gwakemvunyu le a-thakhin gwakemvu nyu tha gwakemvu henshwishü hünyo.

36“Tsügenyu ale hagun ka zo tsentsü shüti, temi le jozo kehü jo kezükemvu aphu nyu a-rüla ketso kethyü nyü zoshwi küshü ti. 37Kechamvule njo genyu nle njülo ti, lo njo genyu nle mula ti.”

Thazansü Thyüshülo Tse

(Mk 8:11-12; Lk 11:29-32)

38Tsontsin lesükesha tsin ju lo Farisinyu peha le a-ka, “Senkethyügü, agun le nno thazansü nme thyüshüo nrinyü bin nle.”

39Ai a-le anyugun ka, “Nje ntsenyü temi serikemvu lo jo ketsin zokemvu ju le thazansü thyükeshü fü kehü gwünzin; ai Sidyükeshagü Jona ge thazansü thyükeshü nyeki thazansü kecha nme-e thyüshü loho so. 40Kechamvule Jona le tsangkeben jonshen lo tsangkezün jonshen tsehü kedagü ginda nyu kebin hontse Temi Nyugü ko tsangkeben jonshen lo tsangkezün jonshen kazü gin nyu bin nrün genyu. 41Temi rüla ketso sokeryü ka Nineveh nyule soryüo ntsoka temi dan hi zen binlo-o anyugun nkhin ti; kechamvule tsüdan le Jona le anyugun senthyü kethyü ka anyugun nyunkelulo kela genyu. Lo hire, Jona nyeki gonkvu kethyü nme le hika bin nyo. 42Temi rüla ketso kethyü nyü tesizin kipon rajagi le soryüo nje ntsenyü nyu hi zen binlo-o anyugun nkhin ti, kechamvule a-le kazü keni kipon Solomon thakesha jo nyü titse keryü genyu; lo hire, Solomon nyeki kegon nme le hika bin nyo.

Nshünkemvu Kapu Le Nigunkeryü

(Lk 11:24-26)

43“Nshünkemvu kapu le temi ge chwikela ka a-kebin bin füo tin sen-o zü kendi bin fü gun hünyo tson-o fü kendila. 44Tsükatsü a-le a-npvü, ‘A-le nduka bin hüo chwikela bin nyu nigun ti.’ Tsüselo a-le tsünyu kegun ka tsü le nrun lo ketsü kegwa thyü pe bin kenjü hyulo hünyo. 45Tson-o a-le gungü a-nyeki gwakemvu kapu kecha tsenyü pe a-sinlo-o anyugun kethen-o tsünyu yügü bin tinla hü; lo temi tsügü rüla le kekhin ki we kerika nyeki gwamvu kvula hünyo. Hizon ka temi serikemvu hidan ge-e tsühontse ti.”

Jisu A-jvü Lo A-sikezen nyu dan

(Mk 3:31-35; Lk 8:19-21)

46A-le temi dan ka jozo ketseka hire, a-jvü lo a-sikezen nyu dan le a-zen kenthon titseo a-fü ryüo kamhun ki bin. 47Tsüka temi nme le a-ka, “Hire, njvü lo n sikezen nyu dan le n nthon titseo ryüo kamhun ki bin nle,” tsonshü.

48Ai a-le a-ka tha zokeshü gü ka, “Segü le ajvü lo segü le a sikezen nyu la?” 49Tson-o a-le a-ben keto pe a-sikethen nyu dan tsin-o,“ Ajvü lo a sikezen nyu le hiki re. 50Kechamvule temi ligü higüe tsangge kebin A pvü kendo zen kehünyu tsüle, a sikezen nyu, A lüginyu, lo A jvü le.”

Currently Selected:

MATHI 12: REGSBSI

Highlight

Copy