MALAKI 3
3
1Kekvutsin Npugü le kenishü, “Ale alilo gü nipe no atson ndo shüti. Tson-o hagun le khwekebin Npugü le a-Kershvuka nyu whütse ryüti. Hagun le hyushü nyüsa kebin lilo gü le ryü ale kejozen kelogü zo sen shüti.”
2Ai a-le keryü ka segü le sunbin lo tila? A-le me yhühyu thyü keryü ka segü le bin lo tila? A-le sabu kekvu hontse, lo tegiro nshün la kehü mah hontse. 3A-le ryü rakagi thyü nshün la kehü hontse me jünkera ti. Tegi kecha nyu le suna rakagi thyü nshün la kehü hontse Npugü lilo gü le püshükedanyu thyü kenshün lati, tson-o anyugun le pe rüshvu kezü gü sen Npugü ki ryüti. 4Tsonlo Juda lo Jerusalem temi le kerüshvu sen Npugü ki keryü le ndu ka hontse Npugü kenyü loti.
5Kekvutsin Npugü le zo, “Ale hagun dan nyu me yhühyu thyü ryü jokera ti, tson-o ale temvünyu, keyülanyu, kenkujün kezonyu, mechün khope metsü mvuo mesa kelanyu, lo maginyu, tegonyu lo tesin nshwe kehü nyu lo arühvu hü kemvu nyu aphu ntsun ti.
Jüntseryü Jünme Keshü
6“Ale Npugü, ale kelu hümvu. Tsügenyu hagun Jakob tsipwen no nmhe shü lamvu. 7Hagun le hagun pvübon nyu hontse atejvü dan then mvuo tsünyu rani tin laso. Aki raniryülo lo ale rani hagun ki ryüti. Ai hagun le, ‘Agun no nki rani ryü nrün genyu nyuthyü mvulo shvula?’ tse ketso hü nyo. 8Ale hagun ketso bin nle, temi nme le Sunggigü sa zü ole? Tsonmvu, ai hagun we asa bin nle. Hagun le ketsohü, ‘dihontse ola?’ Jüntseryü jünme lo thahokeshü kale. 9Shochün le hagun aphu ge bin laso, senye apentha asa kethyü genyu. 10Hagun jüntseryü jünme tsü aphu senryü a Kershvuka nyu shülo, tson-o tsünyu ketyüketsü no kesü thyülo. Tson-o ale ketsin zole mvuyo shwishüta, ale tsangge kafüphe khinshe shüo thakegwa aphu jape hagun kesü thyü keshü hagun lehyu ti. 11Ale nyukhu no hagun rasha dan nkela loho lo hagun vainsha no nshasa loti. 12Tson-o senye aphu hagun le hengwa letse koti, hagun kazü letse koti, hagun kazü le a-nyu yhun gwasa kethyü bin nme thyüla nrün genyu.”
Sunggigü le Shwinjün Shü Titse Zoshwikeshü
13Npugü le zo, “Hagun le arüla kenrin kethyü zo hü,” ai hagun le, “Agun le nrüla nyu zo-o la?” tse ketso hü. 14Hagun le zohü, “Sunggigü lothyü bin-e a-kenrun le. A-jo dan thyü, nmvue ngun le thyüzü kela dan genyu rünyun kemvu pe Kekvutsin Npugü ka kezoi nyule binla? 15N gun le hyu kebin le, ketekho kehü temi dan le shekerhün thyü bin. Temi gwakemvu nyu le nnyakenye kethyü nti mvu le anyugun tho gwakemvu thyü pe Sunggigü nyun kethon kemvu shwio nrhi tinla hü nle.”
16Tsüselo Npugü nshvu kehü temi dan le khinyunyu ka zoshü, tsontsin Npugü le anyugun le zokeshü nyülo la. A-mhundyü nyu, a-nshvu lo rühvu kehü nyu rüla thu kenjü lesü nme le bin. 17“Anyugun le a temi thyüti,” Kekvutsin Npugü le zoshü. “Ale tho kenjü jon günyü anyugun le ahon thyü lati. Ale anyugun shwi njün shüti, me pvü nyu le a-lothyü kehü a nyugü shwi njün kehü hontse. 18Atemi dan le kemitsin nyu lo serikemvu nyu, alothyü kehünyu lo kemvunyu, le dihontse kecha thyü yo hyuni ti.”
Currently Selected:
MALAKI 3: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
