LUK 3

Johan Baptist Gü Le Mesenkethyü

(Mt 3:1-12; Mk 1:1-8; Jn 1:19-28)

1Tiberia Kaisar tsekethyü raja kedagü le gon kelo chen tseryüpvün chen Zakariah nyugü Johan le tehen mele rünyi thyü hü kemvu ki kehü ka Sunggigü jo le a-ka ryü. 2Tsükatsü Pontia Pilat le Judia kazünyu ahng thyü bin; lo Herod le Galil kazünyu raja thyübin, lo a-sikezen gü Filip le Iturea lo Trakonita kazü hvu so keda thyü, lo Lusania le Abilene kazünyu raja thyü, lo Ana lo Kaifa au le peshükeda thyübin. 3Tsükatsü Johan le Jordan züri kho likipon rünyi thyü kebin aphu nyu gungü me senthyüo, “Hagun kemu nyu ranilo lo tson-o baptaiz thyülo, lo Sunggigü le hagun kemu jü shü ti.” 4Hi rüla Isaya sidyükesha gü lesü nyu thu bin:

“Temi nme le tehenyu nra sen-o:

‘Hagun le Npugü tson ketsü lo;

tsonkhu thyü kenjü lochi!

5Kazü ketsenyo aphu lu lati,

lo kazüthun lo rincho thyü kentsin lati.

Tson kese thyü kenjü lati,

lo tson kenko thyü nshwü lati.

6Lo temi aphu Sunggigü le kenikelo

khi keshü gü hyu kü ti!’ ”

7Lo a-no baptism pe anyugun tsü lotseo kegun temi dan ka, “Hire, ribo tsipwen ju, hisiki nyunkekhü hagun ge ryü nrün nrhilo titse kethyü segü le hagun ka zo shüla? 8Hagun nyun kelulo gwa nrün sha nshalo chi, tson-o hagun nyunki,‘A-gun ai agun pvü Abraham nyu le,’ tson kethyü zo nya. Lo hire, ale hagun ka zo tsentsü shüti, Sunggigü le tso hidan ge Abraham nyenyu thyü shü logwa. 9Lo ntsoka hi ai nri gü khipe senbin pha nyu nden bin nyo. Tsügenyu tesen a-sha nshalo kemvu nyu aphu gwen pe mah nyu shwen shü lati.”

10Tsontsin temi dan le a-ka, “Tsonyatselo ale nyu thyülo mvulo shvula?” tson-o ketso sola.

11Lo a-le anyugun ka, “Ligühigüe a-bolaphi kenyhun le kebin nyu no pe a-bolaphi kendinyu tsüla chi; lo a-ketyü ketsü le kebin nyue no tsühontse thyülo chi.”

12Tsüselo khajana keshvunyu dan mele baptism hyulo nyüo gunryüo a-ka, “Senkethyü gü, agun ko no nyu thyülo mvulo shvula?”

13Lo a-le anyugun ka, “Hagun no lo lotse keshü soki hisin nya chi.”

14Lo shüpahü dan me ko a-ka, “Agun we nyuthyülo mvulo shvula?” tson-o ketso laryü, a-le anyugun ka, “Hagun le mekesüo mehon senya nye, lo nkuo temi nme nkhin nya; tson kethyü gü mvule hagun shün ai gwa letse kethyü rüchün lo.”

15Lo tsükatsü temi dan le temi nmele yhun soryü titse kethyü nrin bin laryü temi tsüdan le anyugun npvü a-nyunki Johan rüla rüchün gungü a-le Khrista gü le nmvuyo tse rünchün kü lola. 16Ai Johan le anyugun aphu ka, “Ale zü nyu hagun baptaiz thyü keshüi nti, ai anyeki kegon nme le asiki ryü zhü, ale a-phaje kephinron-e shwü kethyü tho-e thyülo kümvu; lo a-le Kenshün Kapu lo mah nyu hagun baptaiz thyü ti. 17A-le nryü le a-ben nyu bin nyo, lo a-le a-bün whün shünshvu lati, tson-o a-shyetsin ju pe a-süsen nyu shü loti; ai shyebün ju we pe nmhülo hü kemvu mah nyu shü lati.”

18Tson-o a-le thu keyhun jo kechon sen-o jolokegwa zo pe temi dan hi. 19Ai Johan le Herod raja gü le a-sikezen gü nu Herodia genyue lo Herod le thyüzü kemvu kethyü aphu genyu a-kemeni shü. 20Lo thagwakemvu tsüdan kethyü ntimvule a-le Johan ten pe doka nyu shüla.

Jisu Baptaiz Thyükelo

(Mt 3:13-17; Mk 1:9-11)

21Tsükatsü temi tsüdan aphu baptaiz thyülo ntsin Jisu ko baptaiz thyülo njüo kehi thyü bin laryü tsang le ko shü. 22Tson-o Kenshün Kapu gü le nsu hontse a-ge tsüryü, lo tsangge tha khwen nme le, “Nle Anyu asogü le, nle akenyü tsin gü le,” tson kethyü zo gunryü.

Jisu Khrista Shübon Nyu Ju

(Mt 1:1-17)

23Lo Jisu le me senthyü so kezhü ka a-nnyu kelo chen shenryü laki kho thyüla; lo temi kerüchün hontselo a-le Josef nyu, Heli nyu, 24Mathat nyu, Janai nyu, Josef nyu, 25Matathia nyu, Amos nyu, Nahum nyu, Esli nyu, Nagi nyu, 26Maath nyu, Semein nyu, Jasek nyu, Joda nyu 27Joanan nyu, Rhesa nyu, Zerubabel nyu, Sheathiel nyu, Neri nyu 28Melkhi nyu, Addi nyu, Kosam nyu, Elmadam nyu, Er nyu, 29Joshua nyu, Eliezer nyu, Jorim nyu, Mathat nyu, Levi nyu, 30Simeon nyu, Juda nyu, Josef nyu, Jonam nyu, Eliakim nyu, 31Melea nyu, Mena nyu, Matatha nyu, Nathan nyu, David nyu, 32Jesse nyu Obed nyu, Boaz nyu, Salmon nyu, Nashon nyu, 33Aminadab nyu, Admin nyu, Arni nyu, Hezron nyu, Perez nyu, Juda nyu, 34Jakob nyu, Isak nyu, Abraham nyu, Tera nyu, Nahor nyu. 35Serug nyu, Reu nyu, Peleg nyu, Eber nyu, Shela nyu, 36Kainan nyu, Arfaksad nyu, Shem nyu, Noah nyu, Lamek nyu, 37Methusila nyu, Enok nyu, Jared nyu, Mahalalel nyu, Kainan nyu, 38Enos nyu, Set nyu, Adam nyu, Sunggigü nyu.

Currently Selected:

LUK 3: REGSBSI

Highlight

Copy