LUK 16

Me Hon Ketsen Petsükemvu gü

1Jisu le senthyükelonyu dan ka zo, “Kenyanyu nmele meno a-hon ntsen kehü le bin. Lo a-hon ntsen kehü gü le tsü khipe kenthyü bu binla sele tseo mele kenya gü ka zoshü, 2Tsüselo kenya gü le a-ko zen ryü-o a-ka, ‘N rüla nme zo-o anyetin ka keryü hile, nyuthyüo honla? Nle kanyü ntsen kehü ketsin petsü shülo, kechamvule nno ahon kentsen nyu thyüni loho kethyü genyu.’ 3Tsüselo kenya gü hon ntsen kehü gü tsüle a-npvü a-nthon-o, ‘A npugü le ano a-hon kentsenyu thyü loho sele tselo, ale nyuthyülo gwa tiyo? Ale kazü du metse-e kvumvu; ale shvutyü metselo kejo. 4Me kanyü kentsen tho hinyu hi me le a hüshü selo, meno azen hülo kegwa thyülo nrün genyu ale tedo nme shalo so.’

5“Tson bin laryü, a-npugü pupvü kebin nyu nme me ko zen ryüo a-kerigü ka, ‘Nle a npugü pu dikho pvü bin nla?’ tson-o ketsoshü. 6Lo a-le, ‘terzü khin tsime,’ tson sola. Tsüselo a-le temi tsügü ka, ‘N lesü khilo njüo dun tsügü henpvün thu whütselo,’ tsonla. 7Tsüsika a-le kechanyu nme ka, ‘Dihontse la nko dikho pu pvü bin nla?’ tson-o ketsoni. Lo temi tsügü le, ‘Tho khin tsime,’ tsonshü. Lo a-le tsügü ka ko, ‘N lesü khilo njüo hentetse thulo,’ tsonni.

8“Tsüselo a-npugü le a-gogü tsüle kekhin keri rüchün-o tha thyükeshü genyu serikemvu gogü tsüle a-do gwasa letse la. Tsühontse kazü hinyu temi le a-npvü a-temi kipon we keben gü nyenyu nyeki a-do gwakvu.”

9Tsüntimvule ale hagun ka zoshü ti, “Ketsin kemvu kenya kanyü sen-o hagun pvünyu fülo chi; tsonlo yatselo kenya tsü le ndi kela ka mele kethonthen bin nrün ka nyu hagun zenlo ti. 10Temi lihigüe tha keshanyu kae meno tenyenlo kegwa thyülo yatselo, tha kechon kae mele a-tenyenlo gwa; lo temi lihigüe tha keshanyu kae mele a-tenyen lo keshvu thyüla yatselo, tha kechon kae mele a-tenyen loho. 11Tsügenyu hagun le ketsin kemvu kenya hinyu meno hagun tenyenlo kegwa thyülo mvu yatselo, segü le ketsin gü kenya pe hagun ben nyu shüo hagun tenyenlo gwa tila? 12Lo hagun le mehon kesen kae meno hagun tenyenlo kehoi thyü yatselo, segü le tha khipe hagun tsüo hagun no sen-o hagun hon thyü tila?

13“Mego thyü kehünyu nme-e a-npu nyu mihvu go thyü kesin loshvu; tson yatselo a-le nme ntsü lo kecha gü shwi pe a-kenyü lati; nmvue nme kipon hü tinlao kecha gü nkhin lati. Hagun le Sunggigü lo Kenya au go thyü kejvü loshvu.”

Jisu Jo dan me

(Mt 11:12-13; 5:31-32; Mk 10:11-12)

14Tsüselo Farisinyu seki raka tepen kehünyu dan le jo tsü shashü njüo anyugun le a-shwinyü so. 15Tson-o a-le anyugun ka, “Hagun we temi kehyu ka, hagun le kentsen keserinyu letse hünyo; ai Sunggigü le hagun nyun sha kü. Kechamvule temi mhundyü ka tha keda letse kehü nme le Sunggigü mhundyü ka tha kentsükenchen nme genyu.

16“Johan le ryü kemvuthen tejvü gü lo sidyükeshanyu le hü; tsükatsü nyu Sunggigü jolokegwa zope me senthyü ryü. lo temi aphutsünyu yüryü nyü so. 17Ai tejvü nyu we kethu keshen ketsin gü le ndi kela nyeki tsang lo kazü le ndi kela le nnekvu.

18“Temi lihigü a-nunyu khelao tenu kecha lo yatselo a-le keyüla laso; lo temi lihigüe tenunyu a-nyepvünyu le hü kelagi lo yatselo a-ko keyüla laso.

Kenya gü Lo Lazar

19“Kenyanyu nme le phi a-min ketsen lo linen phi kegwa khiben-o khenyütsen yhun ketegvü hü. 20Lo Lazar tsekethyü shvuketyü nyu nme ko kethyü no a-ge süpvüo meno a-zen gü a-chonrha ka shü njü hü. 21Lo a-le kenya gü miz ge chvü le nrhi ketsüe tyünyü ho tse bin; lo tehi le ryüo a-ge kethyü shvu tsü lulu tse bin hü.

22“Tsüselo khenyüme shvuketyü gü le sila, tson-o tsangge lokethyünyu le a-khipen gü Abraham nyun ge shüla; lo kenya gü ko silao meno a-pen gü sunla. 23Tson-o a-le gü Hades nyu kenjünthyüri tsin tseo, nyi soshü laryü, a-kepen ki Abraham lo a-nyun ge Lazar le kebin hyulo. 24Tsügenyu a-le nra a-yhen thyüo, ‘Apvü Abraham, nle a njünlo Lazar nishüo no gü a-zenkero rae pe zü nyu ntsen senryüo ayi thu nkun shü lo; kechamvule ale mah kenyün hinyu kenjünthyüri bin kela genyu.’

25“Ai Abraham le, ‘Anyugü, nle n npvü rüchün shwilo, nle nkerhün ka, tha kegwa aphu hyulo so, lo Lazar ko tha gwakemvu aphu hyula so; ai a-we ntsoka hinyu ketegvü bin laso, ai n we le kenjünthyü bin laso. 26Lo tsüntimvule hagun lo agun ja nyu tekhwünkü ketetsin kethyü nme thyü pe bin laso; tsügenyu mele hiki pon bin-o hagun kipon kü titse-e kü loho, lo tsü kipon temi nme-e hikipon küryü keloi ndi.’ 27Tson-e, ‘Apvü Abraham, nle a njünlo a-nipe apvü ka ki shülo. 28Kechamvule asikezen nyu mipvün le bin, lo anyugun ko kenjün kethyü bin hinyu ryü lae shamvu, tsügenyu a-no gü hi rüla hi zoshülo.’

29“Ai Abraham le, ‘Anyugun ko Mosa lo sidyükeshanyue bin nle, anyugun no tsüdan khwenyü lo chi,’ tsonla. 30Tsüselo a-le, ‘Tson loshvu le, apvü Abraham, temi nme le kesi nyu rhünni gunlo, anyugun ko anyugun nyunkelu loti.’ 31Tson-e Abraham le a-ka, ‘Anyugun le Mosa lo sidyükeshanyu jo tenyen mvu yatselo, temi nme le kesinyu rhünni gun-e tenyenlo ho,’ ” tsonla.

Currently Selected:

LUK 16: REGSBSI

Highlight

Copy