LUK 11

Jisu Le Kehi Jvü Tsinkeshü

(Mt 6:9-13; 7:7-11)

1Tsüselo a-le bin nme ki gü kehi thyü hüo hi kheshü ntsin senthyükelonyu nme le a-ka, “Npugü, nle Johan le tsin pe a-le senthyükelo nyu hikeshü hontse kehi jvü tsin pe agun ko agun hishü ta,” tsonshü.

2Tsügenyu Jisu le, “Hagun le hi kethyü ka:

‘Hire, agun Pvü,

nzan no keshün gü thyülo,

Nkeda thyü ryü lochi.

3Khenyütsen agun chvü pe agun tsüta.

4Lo agun kemu jü pe agun tsüta,

kechamvule agun ko mele agun pupvü

kebin nyu jü pe tsü kelasi genyu.

Lo agun pe kesemen nyu shüla nya,’ ” tson hilo nye.

5Tsüselo a-le anyugun ka, “Hagun dan nyu temi nme le a-pvünyu ketsin le bin-o a-le tsanglu tsangzü ki ryüo tsügü ka; 6‘Apvü gü, nle tensü kenshen pe atsüshü tse ti mon? kechamvule apvünyu nme le njwen hüo ntsoka aki ryü bin, lo ale tha lope a-ketsüi ndi la sele.’ 7Tson yatselo temi tsügü tsü le a-ka, ‘Ntsoka kae khinlo laso, lo anyenyu jue agun kengüo no ge zhükü tin laso. Ale sogü tsü khipe ntsülo mvu so, tson ti ole?’ 8Ale hagun ka zoshü ti, temi tsügü le a-pvünyu ketsin nme konka mvule a-le kejo mvuo hi tenge tse bin kela genyu tsügü le soryüo a-le kehi aphu khi pe a-tsü ti.

9“Tsügenyu ale hagun ka zoshü ti, hi chi, lo lo pe hagun tsü ti; kakhin ketun shüta, lo khinshye pe hagun tsüti. 10Lo temi lihigüe hi kehünyu khipe tsü hünyo; lo fü kehünyue hyulo hü, lo kakhin kekho keshünyu le mele khinshye pe tsünyu tsüshü hünyo. 11Lo hagun dan nyu segü le a-pvü ka tsehü hilo, peri pe a-tsü hü nla? 12Nmvue a-le terozü nme hilo, zukeshonnyu khipe tsü hü nla? 13Lo hagun gwakemvunyu hie tha kegwa lope hagun nyenyu ketsü do sha yatselo hagun Pvü tsangge kebin gü le Kenshün Kapu pe mele a-ka hi kehünyu tsüshü mvu ti ole!”

Jisu Lo Beelzebul

(Mt 12:22-30; Mk 3:20-27)

14Tsüselo a-le jozolo kemvu terogü hüshü ntsin; tero gwakemvu tsügü le chwiryüla ntsin jozolo kemvu gü tsüle jozolo la; tsüselo temi dan le anyugun dunthyüla. 15Ai tsüdan dan nyu peha le, “A-le terogwakemvu dan kedagü Belzebul zen-o tero gwakemvu dan hü kehü hile,” tsonso.

16Lo kechanyu dan me le a-semen-o a-no tsangge zansü thyü pe anyugun hilo tse sola. 17Ai a-le anyugun ka, “Keda lihigüe a-npvü a-pvükhola yatselo a-keda le nkela hünyo, lo kakhwün nmele kepvükho yatselo chela hünyo. 18Tsühontse satan ko a-dan kechacha thyüo kerüchün tselo a-keda le nyu tsethyüo binlo tila? Tsügenyu hagun le kezo we ale Belzebul zen-o tero gwakemvu dan hüla hü nle tse hünyo. 19Lo ale Belzebul kekvu sen-o tero gwakemvu ju hüla yatselo hagun nyenyu ju we segü kekvu sen-o tsüdan hüla hü nla? 20Tsügenyu anyugun le hagun ketso kethyü nyu thyüti. Ai ale Sunggigü ben pe tero gwakemvu dan hüla hü yatselo, Sunggigü keda le ryüo hagunn tilo bin laso.

21“Temi kekvu nyu nme le a-kanyü thyüsa pvü tseo a-ka khwen bin yatselo, a-hon le gwa bin loti. 22Ai a-nyeki kekvunyu nme le ryüo a-khin-o a-tenlo njüo a-le tenyen-o yhun kehü a-kanyü aphu a-ge yhünlo njüo a-hon sekelo tsü aphu kenjünlo hü.

23“Temi lihigüe akipon kemvunyu le a shwikerüchün nyu le; lo temi lihigüe azen-o tha kequen hü kemvunyu le khipe kedukeru thyüla hü.

Nshünkemvu Kapu gü Le Ranikeryü

(Mt 12:43-45)

24“Lo nshünkemvu kapu gü le temi ge chwikela ka a-le a-kesun bin füo zü kendi bin ki gun hü, lo hyulo kemvu genyu a-npvü a-ka zo-o, ‘Ale nduka chwikela kanyu nigun ti,” tson hünyo. 25Tsüselo tsünyu gü ka tsügü le sho pe ketsü kezegwa kenjü hyulo hünyo. 26Tson-o a-le gü a-nyeki keshvu gwakemvu kapu kecha tsenyü kope a-sinlo njüo anyugun le gü tsünyu bin tinla hünyo; lo temi tsügü rüla le kekhin kiwe kerika nyeki-e gwamvu kvula hünyo,” tsonshü.

Jochü Kepvü

27Tsüselo a-le jo tsü zoshü ntsin tenunyu nme le me dan nyu nra sen-o a-ka zo, “Tenunyu nduka nphou kepvü gi lo ntsü kehügi nyeki jochü kepvü ndi.”

28Ai Jisu le, “A-ketsin le, ai tsünyeki-e Sunggigü jonyüo zen kehünyu le jochü pvü kvu le!” tsonshü.

Ndunkethyü Tho Kefü

(Mt 12:38-42)

29Tsüselo temi dan le ryüo a-khoka kequenlo ntsin a-le anyugun ka zo, “Shenhe higü hile serikemvu shenhe nmele. Anyugun le tha zansü gü hi nti fü kehü hile; ai Jona ge thyü keshü nyeki zansü thyü pe anyugun hisin loho so. 30Lo nduka Jona pe Ninevinyu dan nyu tha zansü thyükeshü hontse, tsühontse Temi Nyugüe pe shenhe higü mhundyü ka tha zansü thyüti. 31Temi rüla ketso nrün nyü we tesin kipon tenunyu kedagi le soryüo hidan zen solo njüo anyugun nkhin ti; kechamvule a-le kazü keni kipon bin-o Solomon thakesha jo nyü titse ryü kethyü genyu. Lo hire, Solomon nyeki kegon nme le hika bin. 32Temi rüla ketson nrün nyü we Ninevinyu dan le soryü shennhe temi hidan hi zen-o solo njüo anyugun nkhin ti; kechamvule tsüdan le Jona le gü anyugun senthyü keshü ka anyugun nyun kelulo kela genyu. Lo Hire, Jona nyeki kegon nme le hika bin nyo!

Nmin Kebengü

(Mt 5:15; 6:22-23)

33“Temi nme-e mah nben pe mele hyu hü kemvu bin ki nmvue thabin hensin ki shü la hümvu; ai kanyu ki keyü ju no tha hyulo nrün genyu makenben bin ge shü hünyo. 34Nmin ge makenben tsüle a-yhütyü; n yhütyü le gwa kebin ka nmin aphu benchvü bin hünyo; ai gwakemvu ka we nmin aphu züntin la hünyo. 35Tsügenyu nnyunki keben gü tsüno zünla mvu nrün genyu petsülo. 36Lo nmin aphu no benchvü tseo keshanyue no zün mvu shü bin yatselo, makenben le a-kenben kenshwen pe n gwün n benshü kehü hontse, tsühontse nmin aphu benchvü binlo ti.”

Jisu Le Farisinyu Lo Tejvü Keshanyu dan Kenkhin

(Mt 23:1-36; Mk 12:38-40)

37Lo a-le jo tsü zoshü ntsin Farisinyu nme le a-no ryüo holo tse a-ko; lo a-ko gü tyütsü titse dun tsülo. 38Tsükatsü Farisigü le a-le tyütsü kethyü mhundyü zü pe a-sü kemvu shwi pe a-dun thyüla. 39Tsontsin Npugü le a-ka, “Hagun Farisinyu ju we khun hon-e lo tegwenki we thyü nshünla hünyo; ai hagun nyunki we me kesü kethyü lo serikemvu le süpvü hünyo. 40Hire, tha rüchün hü kemvu dan, tegwenki thyü kenshün keshü gü le a-nyunki-e thyüshü mvu letse ole? 41Ai honpen lo khun nyuki kebin dan tsüpe rhokedyü nyu tsüla chi; tson yatselo hagun le tha aphu kae nshün kü lati.

42“Ai hire, Farisinyu ju, hagun we chi thyülo tiso! Kechamvule hagun le güsen sonyü lo hen lihi-e jüntseryü thyüo jünme hoshü hünyo; ai hagun le kenjü gü lo Sunggigü so lo kerühvu tsühvu tsü nrhila hünyo. Ai hagun le hidan hi-e thyü lo zenlo zü, lo lidan ko khela zümvu.

43“Hagun Farisinyu dan chi, thyülo tiso! Kechamvule sinagog ka nyu bin kegwa dan ka bin nyü kethyü lo hakethyü bin nyue meno hagun kelu kethyü le hagun kenyü kehü genyu. 44Hagun we chi, thyülo tiso! Kechamvule hagun le mele hyu hü kemvu sika mele a-ge güe shahü kemvu hontse.”

45Tsüselo tejvü keshanyu nme le a-ka, “Senkethyü gü, nle jo hidan kezo le agun aphu kesü kesin kebin hile!” tson.

46Tsüselo Jisu le zo, “Chi, hagun tejvü keshanyu ju ko thyülo tise chi! Kechamvule hagun le pvülo keho khvü pe me npvü kehü genyu, ai hagun npvü we hagun zenkero nme-e sengü khvü tsüdan kesü shwi hümvu.

47Hagun we chi, thyülo tiso! Kechamvule hagun le hagun pepvünyu ju le dushvu kela sidyükeshanyu dan sika khwen kehü genyu. 48Tson-o hagun le hagun pepvünyu dan jünzo ngwalo lo anyugun tho-e no gwa letse kehü genyu. Kechamvule hagun pepvünyu ju le anyugun npvü tsüdan dushvu, lo hagun le tsüdan sika khwen kehü genyu. 49Tsügenyu Sunggigü thakesha gü tsüle zo, ‘Ale sidyükeshanyu lo apostel nyu dan nipe anyugun ka shüti; ai anyugun le tsüdan peha dushvu lo peha nshwen ti.’ 50Tson-o kazü thyülo nyeka nyu sidyükeshanyu aphu zi, 51lo Abel zi no tsun keshü gerhonyu ryü kershvubin lo Kershvuka au jaka dukeshvu Zakaria zi keti, hagun phou ka tsüdan khün zoti!

52“Chi, hagun tejvü keshanyu dan hagun we thyülo tise chi! Kechamvule hagun le me ben nyu thakesha chabi gü selo kela genyu. Hagun le hagun npvüe yü mvu, lo mele yü titse kehünyue khinla bin so!” 53Lo Jisu le tsünyu chwiryü ntsin lesükeshanyu lo Farisinyu dan le a-kheshü nyümvu sao a-no tha aphu zokeshü rüchün-o a-zen kenyi so. 54Kechamvule a-jo ka a-tenkelo rüchün ton kehü genyu.

Currently Selected:

LUK 11: REGSBSI

Highlight

Copy