JOHAN 21
21
Senthyükelonyu Mi Tsenyü Le Jisu Kehyu
1Tsüselo Jisu le Tiberia züda khoki a-le a-npvü a-khipe senthyükelonyu dan hishü, lo anyugun hikeshü le hihontse. 2Tsükatsü Simon Pitor lo Diduma tsekethyü Thoma lo Galil lojvü ki Kana rünyi nyu Nathanael lo Zebedi nyuhvu lo a-sikethen nyu kechanyu mihvu ko hü. 3Simon Pitor le anyugun ka, “Awe tsügü tsehü ten ti.”
Lo anyugun le a-ka, “Agun ko nzen tsüti.” Tson-o anyugun le tsügü run nme nyu yülo ntsin, tsüje anyugun le thame hyulo mvula. 4Ai tsangben chwiryü kezhü ka Jisu le ryüo kesin ki binlo. Ai senthyükelonyu dan le tsüle Jisu tsekethyü shalo mvula.
5Tsügenyu Jisu le anyugun ka, “Hagun le ketyüketsü peha pvü hü le?” tsonshü.
Anyugun le, “Nmvu,” tsonshü.
6Tsontsin a-le anyugun ka, “Hagun joh pe run tejüzin kipon shwenshülo hagun le tha hyulo ti.” Tsügenyu anyugun le shwenshü ntsin joh nyu tsehü chonri kela genyu joh süshwi loho la.
7Lo tsükatsü Jisu le so gunkeryü senthyükelo gü le Pitor ka, “Hile Npugü le!” Lo Simon Pitor le tsü le Jisu tsekethyü shalo ntsin a-le a-kemben kehü genyu a-mirün khibenlo njüo nchweo züda nyu tsü yüla. 8Ai senthyükelo kechagü le tsehü le süpvü kehü joh gü sü sen-o run keshegü ka yüla. Anyugun le kazü kesin ti nrün le tsu tsihvu nyesin hü kemvu genyu. 9Tson-o anyugun le chwiryüo kesin tilo ntsin magi pe mah kethyü lo tsünyu tsehü lo tensü le kebin hyulo. 10Jisu le anyugun ka, “Hagun ntsoka tenkelo tsehü peha sen ryü shwi.”
11Tsontsin Simon Pitor le kügü tsehü tsio henpvün kenshen le kebin joh gü sü sen-o kesin ki chwiryülo; lo tsehü tsü tsülaki le joh nyu bin-e joh gü tsü le nrhenla mvu. 12Jisu le anyugun ka, “Hagun ryüo chvü tyülo.” Ai senthyükelonyu dan le tsü le Npugü tse shakela genyu, “Nle següla?” tson-o a-rüla ketso mvu. 13Jisu le ryüo tensü khilo, tson-o pe anyugun tsüshü; lo tsehü ko pe tsonshü.
14Jisu le kesinyu dan nyu rhünni kelo siki senthyükelonyu dan no a-kehyu higü le gwünshen ge gü laso.
Jisu Lo Pitor
15Tson-o anyugun le chvü tyülo ntsin Jisu le Simon Pitor ka, “Jona nyugü Simon, nle hidan nyeki aso kvu hü nle”
Pitor le a-ka, “Ele, ale nso kehü nle n npvüe sha bin ti.”
Jisu le a-ka, “A tanyü dan leyi lo.” 16Jisu le gwünhvu ge güka ko a-ka, “Jona nyugü Simon, nle aso hü mon?”
Pitor le a-ka, “Ele, Npugü, ale nso kehü nle n npvü shabin ti.”
Jisu le a-ka, “A tanyü dan nuchalo.” 17Jisu le gwünshen ge gü a-ka, “Jana nyugü Simon, nle aso hü nmon?”
Pitor le Jisu le a-ka gwünshen ge, nle aso hü nmon? Nle aso hü nmon? Nle aso hü nmon? tsonzo kethyü genyu a-nyun gwamvu sola. Tson-o a-le Jisu ka, “Npugü, nle n npvü tha aphu sha kü bin nyo; nle n npvü ale nso kehü shabin nyo.”
Jisu le a-ka, “A tanyü dan leyilo.”
18Ale nka zo tsentsü shüti, nle npoka we n npvü nsenphinlo njüo n npvü nkendo kipon gunla hü; ai nle then kela siki we nben ketoshüo meno nsen phin shüo nzen-o nle günyü kemvu bin ki gunti. 19A-le nyu si thyüo Sunggigü no a-zan kechwi thyülo tiyo tsekethyü zoshü nrün genyu a-le jo hi zoshü. Lo a-le jo hi zoshüo Pitor ka, “Nle a sithenlo nye,” tsonshü.
Jisu Lo Senthyükelo A-so Gü
20Lo Pitor le ranio a-sikipon nrishü ntsin, himhundyü kheje ki chvüketyü gwünkho ka Jisu nyun ntsen nyu bin-o, “Hire, Npugü, segü le nten pe me ben nyu shü tila?” tson-o ketso keshü Jisu le so gunkeryü gü le a-sika kebin hyulo. 21Pitor le a-hyushü njüo Jisu ka, “Npugü, tsonno temi higü we dihontse tila?”
22Jisu le a-ka, “Ale ryü kemvuthen a-no bin titse kethyü akendo yatselo, nle nyuthyüo tson hü nla? Nle a sithenlo nye!” tsonla.
23Tsügenyu senthyükelo tsügü le si loho tsekethyü a-sikethen nyu dan le jo tsü zo tinla. Ai Jisu le a-ka tsügü no si loho, tson mvule, “Ale ryü kemvuthen a-no bin titse kethyü a kendo yatselo, nle nyuthyüo tson hü nla?” tsonkeshü gwünzin.
24Senthyükelo tsügü le jo hi zoshwishü, lo jo hidan thu shü lo jünkezo hile a-ketsin tsekethyü ale sha tsetsü bin laso.
Jo Kekhin
25Jisu le thyükeshü tha kecha kechon le bin nyo; tsüdan nmeme tse thu ti yatselo, a kerüchün le lesü dan le kazü aphu sükela lati.
Currently Selected:
JOHAN 21: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
