HABAKKUK 3
3
Habakkuk Kehi
1Hile sidyükesha gü Habakkuk Kehi:
2O, Npugü, ale ntha rüla nyüloso,
tson-o ale nshvu sala sele.
Nle thatho keda thyü kehü gü tsü
agun gwenkho ka thyüni shüta.
Nle nnyunkenta kae, shwinjün shüta.
3Sunggigü le Edom ki bin-o niryü jü;
kenshün Sunggigü le Paran rincho dan ki bin-o ryüjü.
A-terün le tsang je bin;
lo kazü le a-keshwen pe sübin.
4A-le tsang kekechwü keben gü zen-o ryüjü;
keben le a-ben nyu ben shü,
a-kekvu pe kebu kehü bin nyu.
5A-le kethyü nipe a-mhundyü shü
lo kesi no a-sithen lotse johoshü.
6A-le sunshü, lo kazü le nni;
a-le nrikeshü nyu senye dan le ndün.
kethonthen kebin kazüthun dan le kenjün kho la;
Kethonthen binkehü rincho dan le nren tsüla,
nduka a-le tsonchü kehü rincho dan.
7Ale Cushan temi le nshvu kebin
lo Midea nyu le ndün kebin hyu.
8Nthyü pe nyunta kela tsüle züri dan lele, Npugü?
Nno nthün kela tsüle zida lele?
Nle nmhu ge dun;
tsangkenbu terhi nmhu gü le nteri gari,
nle kvukelo senryüo ntemi ketsü ka.
9Nle tholevü pen titse ndolo;
thotsi kvushü titse ntsen lo.
N tsang kekechwü le kazü shwen khola.
10Kazüthun dan le nhyu keshü ka ndün la;
tsangge zü le tsun tsüryü.
Kazü hensin zü le nho,
zükentyü le tetso küryü.
11Nthotsi le nmhen gü kethyü
lo nnywi le nshwen keshü ka
yhüko lo shye le matse sun tinla.
12Nle nnyuntao kazü pvüthü;
nnyunkenthün nyu nle senye dan kedü:
13nle ntemi kenilo titse
lo nle kejülo kela raja gü kenilo titse chwi.
Nle gwakemvu nyu sharhi gü boshvu
lo a-sikethen nyu dan nke shüla.
14Nthotsi le a-rihü kedagü jenla
a-le tsangkenbu terhi hontse agun
hükezenla titse keryü ka,
kebuo kendinyu nshwe kehünyu hontse keryü ka.
15Nle nkeru zen-o zida kedüla,
lo zü kekvu njwa.
16Ale tsü aphu nyülo-o ndün;
akenshvu pvüo a-müntse le ntü.
Amin le nnulo mvula,
lo apha nsü lola.
Sunggigü le shaja pe agun when kehünyu tsüti tse
keryü ka ale matse bin-o gwenkho no keryü khwenti.
17Kherobin le a-sha ndi
lo vain le a-sha nthyü mvula,
lo oliv le nshalo mvula
lo low nyu shye ndila
lo tanyü aphu sila metse
lo senru kenkin bin le nrun lae,
18ale asherhün lo akenyü binti,
kechamvule Npugü Sunggigü le akenikelo gü.
19Npugü le kenko khipe atsü hü.
A-le apha thyü pe thyüje pha hontse shüti,
lo kazüthun ge nyun nkhi kemvu nyu
a ntsen lohü.
Currently Selected:
HABAKKUK 3: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
