BINZEN 38

Juda lo Tamar

1Tsügwenkho ka Juda le a-tsasikezen nyu ju kheo gü a-zan le Hirah tse kethyü temi nme zen bin tinla, tsügü le Adullam rünyi nyu. 2Tsünyu Juda le Kanan nyu lünyu lolo, 3lo tsügi le peche nme nnyulo, tson-o a-zan pe Er tholo. 4A-le nyuphu pfü lo-o peche nme nnyu lo-o a-zan pe Onan kolo. 5A-le peche nme hyunilo-o a-zan pe Shelah tholo. Nyu tsügü nnyu kelo gwenkho ka Juda le Achzib ka bin.

6A-nyuri gü Er genyu, Juda le Tamar lope a-nu thyüshü. 7Er le a-jvü gwa kemvu genyu Npugü le a-kenyü mvuo a-boshvula. 8Tson-o Juda le Er sikezen gü Onan ka zoshü, “Gü ntsa nu zen kengülo. Nle tsügi nyepfü sikezen gü genyu, tson-o ntsa tsipwen no bin lolo.” 9Ai Onan le nyu nnyu lo ai tsüle a-homvu tse kethyü shao, a-tsagü nu zen kengü ka, a-tsi pe kazü nyu shwela, a-tsa gü nyu no binmvu nrün genyu. 10Tsügenyu a-tho tsü Npugü le a-kenyümvu lao Npugü le a-ko boshvula. 11Juda le a-mogi Tamar ka zoshü, “Anyugü Shelah le po lo kemvu then rani gü npvü kaki magi bin tselo.” A-tsa hvu hontse Shelah boshvu kela kenshvu genyu a-le johi zoshü. Tsügenyu Tamar le kaki rani gunla.

12Tsüsi thon kemvu ka Juda nu le sila. Chyekechü gwenkho penlao a-le a-pfü gü Adullam nyu Hirah au Timnah ki a-tanyü hü tse kebin ki gü. 13Temi peha le Tamar ka a-mi le Timnah ki a-tanyü hü tse güjü nle tse zoshü. 14Tsügenyu tsügi le a-le ben kehü magi nyu phi kelu lao a-mhun sun pfütse Timnah tson nyu Enaim rünyi nyu keyü tson ka dunbin. Juda nyu nche gü Shelah le ponyu thyü kela tsügi le shabin ai no a-zen bin kemvu genyu.

15Juda le a-hyu shüo, a-le keyüla chün ketyü nyu nme ado tse rüchünla, tsügi le a-mhun sun pfülo kela genyu. 16A-le tson teki gü tsügi ka, “Nle dikho lo tile?” tse ketso shü. (Tsügi le a-mo gi tse a-le shamvu.)

Tsügi le zoshü, “Nle nyu pe atsü tila?”

17A-le zoshü, “Ale a tenyü dan nyu a-bwe nme nipe ntsüti.”

Tsügi le zoshü, “Tsonlo nle tenyü gü nishü kemvu ka nle njohoshü kebin thyüshü titse kethyü tha peha khishülo.”

18“Ale a johoshü kebin nyu khishü tila?” a-le tsonshü.

Tsügi le zoshü, “N mehor lo a-ron kesin, lo nle sen kehü nthün,” Tsüselo a-le tsüpe tsügi tsüla. Tson-o au kengü lao tsügi le nyuphupfü lola. 19Tamar le kaki gun gü, a-mhun kesun khilao magi phinya ben nya ni lola.

20Juda le a-pvü gü Hirah no tenyü gü senryüo tenu gi ka a-le joshü kebin kanyü dan khini lolo tse shü, ai Hirah le tsügi hyu lo mvula. 21A-le Enaim nyu peha ka ketso shü, “Hika tson ka kehü keyüla chün ketyü gi tsü le diki bin nla?”

“Keyüla chün kethyünyu nme hika bin hü mvule,” tse anyugun le zoshü.

22A-le rani gü Juda ka, “Ale tsügi hyulo mvule. Tsüka kebin nyu le keyüla chün ketyünyu nme tsüka bin hümvu le tse zo la le,” tseshü.

23Juda le zoshü, “Tsügi no kanyü tsü ntsen bin ta. Meno n gun shwinyü nyümvu. Ale a-chün pe tsügi tsüla titse ndo, ai nle a-hyulo mvu laso.”

24Shyeshen kho siki peha le Juda ka zoshü. “Nmo gi le keyü la chün ketyü nyu hontse thyüo ntsoka we nyuphu pfü bin laso.”

Juda le, “Tsügi zen chwiryü mah pe roshvu lalo,” tse ahza hoshü.

25A-zen chwi kejü ka, tsügi le jolo nipe a-min gü kishü, “Ale kanyü hidan sen kehü gü nyuphupfü bin nle. Hile segü hon yo shwishü ta-mehor pe a-ron kesin lo thün hi.”

26Juda le tsü sha lo-o zoshü, “A-le njü le. Ale a-ge thyü kezü thyüshü mvula-- ale tsügi pe anyugü Shelah no a-nu thyü zü.” Lo Juda le au kengü ni mvula.

27Tsügi le nyu kezen gwenkho le ryü ntsin a-le mihvu zen nrün sha lola. 28A-le a-gin thyü kebin ka nmele a-ben ketoshü; tsü ka tsügi shwikebin gi le, a-ben sü lo-o nin kenhon pe phin shüo, “Higü hile nyuri gü” tse zoshü. 29Ai a-le a-ben sünilo lao kecha gü nnyu teri lola. Tsüselo a-shwikebin gile zoshü, “Hihontse nle ntson fü lole” tse zoshüo a-zan pe Perez tholo, 30Tsüsika a-sikezen gü le nin kenhon pe a-ben phin pfü tse nnyulo, tson-o a-zen pe Zerah kolo.

Currently Selected:

BINZEN 38: REGSBSI

Highlight

Copy