BINZEN 29

Jakob le Laban Kanyu ryü Kela

1Jakob le njwen sentse npho zin keyhun ju kazü ki gun. 2Tson-o lonyu zülvu nme ka ryü laryü tanyü danshen le tsüka kehü hyulo. Tanyü dan le zulvu hika zü tsühü, lo tso keda nme pe zülvu gü mün senkhin njü. 3Tanyü dan aphu gunryü kequen lolo, tanyü kekhwen jule tsogü keto la-o no zü tsülo, njio tso gü keto pe a-bin ka khin nila hü.

4Jakob le tanyü kekhwe juka, “Apfünyu ju, hagun le dikipon nyula?” tson ketsoshü.

Anyugun le a-ka, “Haran nyule.”

5A-le, “Hagun le Nahor nyugü Laban shale mvula?”

Anyugun le, “Ele, agun le sha bin nle.”

6“A-le gwabin le mvula.”

Tsontsin anyugun le, “A-le gwabin nle.” “Hire, a-nyugi Rachel le a-tanyü zenryü jü nle.”

7Jakob le, “Nhenyu thyü binzun, tanyü dan hü kequen lo kela gwenkho mvuzun le, nyuthyüo züpe lashüo zen nigü no a-chvü lotyü mvu ola?”

8A-nyugun le, “Agun le tsonlo kemvui, tanyü dan aphu hika ryülo, lo tso gü keto la; tsonkelo siki agun le züpe tanyü dan no tsüti.”

9Jakob le anyugun zen kenthon kebin ka Rachel le tanyü dan zen ryü. 10Jakob le Rachel le a-min Laban tanyü zenkeryü hyu shü ntsin, zülvu ka gü tso gü keto la-o tanyü dan no zü tsülo. 11Tson-o a-le Rachel nboshü njio a-sherhün-o chü sola. 12A-le tsügi ka, “Ale n pvü nyu kaminyu, Rebeka nyugü le,” tson zoshü.

Tsügi le tin gü a-pvü ka zoshü; 13lo Laban le a-tsugü Jakob rüla nyülo ntsin tin gü teno-o a-thünpenlo njio a-nboshüo zen a-ka ki ryü. Tson-o Jakob le dihontse layo aphu pe Laban ka zo keshü ka, 14Laban le, “Ele, nle athyü azi ketsin le.” Jakob le shyeme tsü ka bin.

Jakob le Rachel lo Leah genyu Laban lokethyü

15Laban le Jakob ka, “Nle atsu anyu le tseo kenrun nyu alothyü bin keloi mvu. Nchün dikho lonyü bin nla?” 16Laban nyu le tenunyu mihvu le bin; peshü gü zan le Leah lo nchegü zan le Rachel 17Leah yhütyü keko le a-kezü, ai rachel le a-rhenrhü gwa lo zegwasa.

18Jakob le Rachel zenkeso hü, tsügenyu a-le, “Nle ano Rachel loti yatselo, ale chen tsenyü nlothyü ti.”

19Laban le, “Ale a-pe kechanyu ketsü gümvu nketsü gü le gwa kvu; a-zen bin lo.” 20Jakob le Rachel lo nrün genyu chen tsenyü thathyü, ai a-le tsügü so kethyü genyu a-mhundyü ka jon keshanyu hontse.

21Tson-o Jakob le Laban ka, “A-gwenkho pen laso; ano nnyugi lolo gwenlo.” 22Tsügenyu Laban le tsünyu kebin temi ko kü shüo senhü keho nme thyüshü. 23Ai tsüje a-le Rachel mvule Leah zen gü Jakob tsüshüo Jakob le tsügi zenzhü. 24(Laban le a-go lünyu Zilpah pe a-nyugi Leah no a-gogi thyü lotse tsüshü.) 25Tsangben lo ntsin tsüle Leah tse kethyü hyulo. Tson-o a-le gü Laban ka, “Nle nyuthyüo age hihontse shüla? Ale Rachel lo titse nlo thyü ryü. Nyugenyu nle asala ola?”

26Laban le, “Nchegi pe peshügi mhundyü kalvu kethyü tsüle hiki agun jvü kemvu le. 27Sunkethyü hapta güno penla rilo, lo nle chen tsenyü alothyü alothyü tiyatselo ale Rachel ko pe ntsü tile.”

28Jakob le a-kendala, tson-o sunkethyü jvü dan kethyü hapta gü le gü kela siki, Laban le a-nyugi Rachel khipe a-nu thyü shü. 29(Laban le a-gogi Bilhah nipe a-nyugi Rachel go thyü shü.) thyüshü. 30Jakob le Rachel ko zenzhü, lo a-le Leah nyeki Rachel sokvu. Tson-o a-le chen tsenyü Laban lothyüni.

Ntsenyu Nnyu pe Jakob Ketsü

31Npugü le Jakob le Leah so sarimvu kela hyushüo a-no nyuzen lo, ai Rachel we a-nyenyu ndi hü. 32Leah le nyuphupfü lo-o peche nme nnyulo; Lo a-le, “Npugü le a kenjün kethyü hyu lao ntsoka we a nyepfü le aso tiso”; tson-o a-nyu zan pe Reuben tholo. 33A-le nyuphupfü nilo njio peche kecha nme nnyu nishü, tson-o “Ngugü le mele asokemvu shakela genyu peche higü pe atsü nishü laso”; a-le tsügü zan pe Simon tholo. 34A-le nyuphupfü nilo-o peche kecha nme nnyulo. Njio, “Ntsoka we, ale peche mishen nnyu pe a nyepvü tsükela genyu a-le a nsükvu tiso”; tson-o a-zan pe Levi tholo. 35A-le nyuphupfü nilo-o peche kecha nme nnyu nishü, A-le, “Ntsoka we ale Npugü shweti”; tson-o a-zan pe Judah tholo. Tsüsiki a-le nyuzen mvula.

Currently Selected:

BINZEN 29: REGSBSI

Highlight

Copy