BINZEN 26

Isak le Gerar Ka Keyhun

1Abraham gwenkho ka chenda siki chenda kecha nme le kazü günyu ryü. Tson-o Isak le Gerar ki Filistian raja gü Abimelek ki gü. 2Lo Npugü le Isak yhühyu thyüo a-ka, “Ijipt ki günya, ale nno dika bin lotse zoshü yo, kazü higü ka binlo. 3Hika yhun binlo, ale nzenhüti lo jochü pe ntsüti. Ale kazü hi aphu pe nle lo n tsipwen tsüti. Ale n pvü Abraham ka zokeshü thyüshü ti. 4Ale n tsipwen tsangge shenyü kechon hontse khipe ntsüti, lo ale kazü hi aphu pe a-nyugun tsüti. Lo n tsipwen ge kazünyu senye aphu jochü hyu loti. 5Abraham le a jozenlo, lo ajvü lo a johokeshü aphu zenkelo genyu ale jochü pe ntsüti.”

6Tsügenyu Isak le Gerar nyu yhun tinla. 7Tsünyu kebin temi dan le a-nu ketso keshüka, a-le tsügi le alügi le tsonla. A-le, Rebeka le zegwasa kethyü genyu tsügi le anu le tseshülo tsünyu temi dan le Rebeka lolo nrün genyu adushvu kela nshvula. 8Isak le tsünyu binthon kelo siki, Abimelek rajagü le kafüphe ka nrishü laryü Isak le Rebeka zen keso kebin hyulo. 9Abimelek le me nipe Isak ko shüo a-ka, “Tsügi le nnu! Nyuthyüo nle a-le alügi letse zola?” tsonshü.

Tsontsin a-le, “A-le anu le tse shülo mele adushvu lati ado tse rüchün kela genyu le, tsonshü.”

10Abimelek le, “Nle agun ge nyuthyüo hihontse shüla?” “Atemi dan nme le nne satse nnu zenzhü lalo, agun kemu tsüle nge ryü nrün hile.” 11Abimelek le a-temi aphu ka: “Ligü higü temi higü nmvue a-nu ge a-zükemvu thyü keshü gü no siti, tsonla.”

12Isak le kazü tsünyu ntsishü shü laryü tsüchen tsü jüntsi gvülo, Npugü le jochü pe a-tsü keshü genyu. 13A-le nnya kenye gungü nnyasa kethyü nyu nme thyü lola. 14A-le tanyü, methu, lo gonyu kechon le kebin genyu Filistian nyule a-shwi a-nyugun yhüthyü lola. 15Tson-o a-pvü Abraham le yhun ketse ka, Abraham gonyu dan le tso keshü zülvu aphu Filistian nyu le nnyo pe lvu küla.

16Tson-o Abimelek le Isak ka, “Agun kazü ka tin lalo. Nle agun nyeki kvu chwiryü laso.” 17Tsügenyu Isak le tsünyu tin gü Gerar ketejon ka phika thyülo-o tsünyu bin. 18A-le Abraham gwenkho ka zülvu tso keshü Abraham kesi siki Filistian nyu le lvu kela zülvu dan tso nilo. Tson-o Isak le ndu ka a-pvü le tho keshü zülvu dan zan tsü ko nilo.

19Isak gonyu dan le ketejon nyu zülvu nme tso-o zü hyulo. 20Gerar nyu tanyü kekhwenyu le Isak tanyü kekhwenyu zen kega-o “Zü hile agun honle” tson kezo genyu Isak le zülvu tsü zan pe “Kega” (Esek) tse kolo.

21Isak gonyu dan le zülvu kecha nme tso nilo tsontsin tsügü ko zo kegala, tsügenyu a-le tsü zan pe “Kenrhi” (Sitnah) tse kola. 22A-le tsünye ketugü zülvu kecha nme tso nilo. Higü we kenya kethyü ndi, tsügenyu tsü zan pe “Nkenda” (Rehoboth) tse kolo. Tson-o a-le, “Ntsoka we Npugü le nno nkenda thyü kazü günyu yhunlo kegwa khishü laso, lo ngun le hinyu gwakenye lo tiso.”

23A-le tsü nken-o Beersheba ki güla. 24Tsüje Npugü le ayhühyu thyüshüo a-ka, “Ale n pvü Abraham Sunggigü. Nshvu nya; Ale nzen hü nyo. Ale a gogü Abraham ka zokenjü genyu ale jochü pe ntsü ti lo tsipwen kechon khishüti.”

25Isak le tsüka kershvubin nme khwenlo-o Npugü rüshvu. Tson-o tsünyu a-phika thyü lo, lo a-gonyu dan le zülvu kecha nme tsolo.

Isak lo Abimelek au Janyu Kejozenkelo

26Abimelek le Gerar nyu a-tsontsingü Ahuzzath lo a-rihü dan sokeda gü Phikol tse zen Isak teno titse ryü. 27Isak le, “Hagun le a nrhio ha kazü nyu anila njio nyuthyüo ntsoka ateno ti tse ryü bin nla?”

28Tsontsin anyugun le, “Npugü le nzen kehü agun le sha laso, lo ngun janyu kejozenkelo no bin mvuloshvu tse rüchün bin nle. Agun le 29n nthyü nnyü kemvu hontse nno agun nthyünnyü loha tse njo hoshü nyü bin nle. Agun le nge agun jvü gwao nno kegwa thyü tinla. Npugü le jochü pe ntsü kela sha tsentsü laso.” 30Isak le anygun genyu keho nme ndashü anyugun le tyütsülo. 31Lonyü nshwe ka, anyugun le khinyu nyu ka johoshüo swela. Isak le anyugun nishüla, lo anyugun nyun bwen-o tinla.

32Tsünyü Isak gonyu dan le ryüo, anyugun le zülvu tso kelo rüla pe a-ka zoshü. Anyugun le, “Agun le zü hyulo la sele,” tsonshü. 33A-le zülvu tsü zan pe “Keswe” (Shebah) tholo. Tsü hontse Beersheba nyida gü tsü zan le chwiryü.

Esau le Tesin Lü Kelo

34Esau le a-keyhun chenhenzi ka Hitnyu lünyu Beeri nyugi Judith lo Elon nyugi Basemath tse mihvu lolo. 35Isak lope Rebeka au le, tsühvu genyu nyunkenjün thyü sala.

Currently Selected:

BINZEN 26: REGSBSI

Highlight

Copy