BINZEN 21

Isak Kenyu

1Npugü le zokenjü hontse, a-le jochü pe Sarah tsüshü, 2tson-o a-le nyuphupfülo-o Abraham le thenkela siki peche nme nnyulo. Annyu titse Sunggigü le zokeshü gwenkho toka. 3Abraham le a-zan pe Isak tholo. 4Lo Abraham le Sunggigü le a-ka zokeshü hontse, Isak le jon tetse ka a-girü lo. 5Isak nnyu kelo tsüle Abraham le chen tsime la. 6Sarah le, “Sunggigü le shekerhün lo kenyü senryü atsü shü laso. Tsü rüla nyü kelo nyu aphu azen-o nnyüti.” 7A-le zosin-o, “Segü le Sarah le ntsenyu no a-gen a-hon tsüti tse Abraham ka zo tila? Ai a-le a-kethen ki ale peche nme nnyu shü laso.”

8Nyugü le min soryü, tson-o tha tyü keso jonyü, Abraham le keho keda nme thyüshü.

Hagar lo Ishmael au Nikela

9Khenyüme Ijiptnyu Hagar le nnyu pe Abraham tsü keshü gü Ishmael le Sarah nyugü Isak nshwe bin. 10Sarah le au hyushüo Abraham ka, “Do higi lo a-nyugü au nila lo. Tenunyu higi nyu gü no anyu Isak le gwen nrün a-jün thame hyulo nrün ndi.” 11Hile Abraham nyuthyü nshvu sala, Ishmael ko a-nyu genyu. 12Ai Sunggigü le Abraham kazo, “Nyugü lo n gogi Hagar au genyu n nyun kenjün thyü nya. Sarah le nka nyu zoyo thyülo, Isak ge ale nka zoshwishü kenjü n tsipwen le bin nrün genyu. 13Ale n tsenyu kechon pe gogi nyugü ko tsüo a-no tsipwen nme thyü so ryüti. A-ko n nyu le.”

14Tsüsi lonyü gü Abraham le chvü lo zü thyügi khin nme pe Hagar tsüshü. A-le nyugü pe a-npfü shüo ninla. A-le tin gü Beersheba tehen nyu hohü. 15Zü gütsü ndi la ntsin a-le nyugü pe tehenphun nme hensin shüla 16njio gü miter tsime khoka dun bin. A-le a-npfü a-ntho-o, “Ale anyu kesi nri keloi mvu.” Tson-o tsüka dun-o chü sola.

17Sunggigü le nyugü le chü kebin nyülo-o tsanggelonyu nme nipe Hagar nthon-o, “Nle nyuthyüo nnyun kenjün thyü bin nla Hagar? N shvunya. Nyugü kechü khwen Sunggigü le nyülo laso. 18Solo, gü a-pen lo-o a-nyunthyü nbweshü. Ale a-tsipwen ge senye keda nme thyü shüti.” 19Tson-o Sunggigü le a-yhütyü khinshe shüo a-le zülu nme hyulo. A-le gü züpe thyügi khin gü sülo-o peha pe nyugü lashü. 20Sunggigü le ntsenyu gü zen hüo, a-le min soryü; a-le Paran tehen nyu yhun hüo thyü hükeshanyu nme thyü soryülo. 21A-jvü le Ijipt nyu tenunyu nme fü pe no a-nu thyülo.

Abraham lo Abimelek au Kejozenkelo

22Tsügwenkho ka Abimelek le a-rihü dan so keda gü Phikol au gü Abraham ka, “Nle lihi thyü kehü nyu Sunggigü le nzen hü nyo. 23Tsügenyu hika Sunggigü mhundyü nyu nle, a higü, anyenyu, nmvue a tsipwen sa loho tse swe lalo. Ale n ge ketsin thyü hü, tsühontse nko a ge lo nle tesin thyüo a-nyu yhun kehü kazü gü ge ketsin thyülo.”

24Abraham le, “Ale zoshwishü laso,” tsonshü.

25Abraham le Abimelek gonyu dan le zülu nme khin lo kela rüla kenya shü. 26Abimelek le segü le hithyü layo ale shamvu. Nle tsü rüla aka zomvu. Ale notsoka nyu tsü nyü kelo gwenzin. 27Tson-o Abraham le tanyü lo methu peha pe Abimelek tsü, tson-o au kejozenkelo nme thyülo. 28Abraham le a-tanyü dan nyu tanyü nyu tsenyü khi kecha thyülo. 29Abimelek le a-ka, “Nle nyuthyüo tson bin ola?” tse ketso.

30Abraham le zo, “Tanyünyu tsenyü hi khilo. Hige hi nle ale zülu higü hi tsoshü le, tse kethyü zansü.”

31Tson-o bin tsügü pe Beersheba tse kolo, au le tsünyu keswe thyü kethyü genyu.

32Au le Beersheba ka higü hi kejozenlo kela siki Abimelek lo Phikol au le Filistian kazü ki ni güla. 33Tsüselo Abraham le Beersheba nyu tamarisk senbin nme sen shüo, kethonthen kehü Sunggigü, Npugü rüshvu. 34Abraham le kethon Filistian nyu yhun.

Currently Selected:

BINZEN 21: REGSBSI

Highlight

Copy