APOSTELNYU THO 9

Saul Le A-nyunkelu Kelo

(Apo 22:6-16; 26:12-18)

1Ai Saul we Npugü le senthyükelonyu kesükedün lo anyugun dushvu titseo a-rikhen thyüo peshükeda gü ka gungü 2Kenikelo Tson gü zen kehü pechenyue lo tenunyue hyukelonyu tenlo njüo phin zen-o Jerusalem nyu gunla titseo, a-no tsügü rüla lesü thu pe Damaska nyu sinagog ka aphu nyu teshashü lotse hilo.

3Tson-o a-le gun kezhü ka gungü Damaska rünyi kho nni gunlo ntsin, tsangge keben nme le whütse tsüryüo a-te a-mhun gwen pe ben chvü tsela. 4Tsüselo a-le kazü nyu chetsü la, lo tsükatsü thakhwen nme le aka zo-o, “Saul, Saul! Nle nyuthyüo a nshwen hü nla?” tsonkethyü kezo khwen shalo.

5Tson-o a-le, “Npugü nle segü la?” tsonshü.

Tsontsin tsügü le, “Ale Jisu, nle nshwen kehü gü tsüle.” 6“Ai nle solo njüo rünyi nyu yülo; lo ale nno thyü mvulo keshvu dan pe nka zoshü ti,” tsonshü.

7Ai a-zen-o njwen kegun nyu dan le temi nme-e hyumvuo a-khwen nti sha kethyü genyu anyugun dun thyüla. 8Tsüselo Saul le soryülo; tson-o a-pvünyu dan no a-ben sülo njüo a-zen-o Damaska nyu yüla. 9Tsükatsü a-le jonshen tha-e hyumvu lo tha tyütsü-e mvu tse bin tinla.

10Lo tsükatsü Anania tsekethyü senthyükelonyu nme le Damaska nyu bin; lo Npugü le a-ka, “Anania!” tson.

Tsüselo a-le, “Whe, Npugü,” tsonshü.

11Tsontsin Npugü le a-ka, “Nle solo-o gungü tsonda kenjü gü tse kehü tsongü nyu tsü Juda kanyu Tarsnyu nme a-zan le Saul tsekethyü gü tsü rüla ketso shü nye, kechamvule a-le hibin kelasi genyu. 12Lo a-ko Anania tsekethyü nme le a-no tha hyulo lotseo a-ben shwen pe a-ge keshü hyu hü laso.”

13Ai Anania le zonio, “NPugü, temi higü hile Jerusalem nyu ntemi kenshün nyu dan ge a-jvü gwamvu sa gunryü kethyü ale temi kechon ki ka a-rüla shalo. 14Lo a-le rünyi hinyu ko peshükedanyu dan ka nrüshvu kehünyu aphu tenlo titse kethyü ahza hilo laso,” tson.

15Ai Npugü le a-ka, “Nle gunlo, kechamvule ale a-kejü pe Juda kemvunyu lo kedanyu lo Israel nyenyu dan mhundyü nyu-e azan gü sen-o zoshü titse kethyü nme thyülo kelasi genyu. 16Tsüntimvule a-no azan nyu kenjünthyü sa mvulo keshvu dan-e ale tsin pe a-hiti,” tsonshü.

17Tsüselo Anania le gungü ka tsügü nyu yü; tson-o a-ben shwenpe a-ge shüo, “A sikezen gü Saul, Npugü Jisu le a-npvü tsonne nyu nteshakeshü gü, nno tha hyulo njüo Kenshün Kapu no nsüpvülo nrün genyu anishü le.” 18Lo tsonshü ntsin a-yhütyü ge thakü hontse kethyü dan me le nne tsüla, tson-o a-le tha hyulo; tsüselo a-le so-o baptaiz thyülo; tson-o a-le chvütyülo njüo nko nkinlo.

Damaska Nyu Saul Senkethyü Jo

19Tsüselo a-le jon keshanyu Damaska nyu kebin senthyükelonyu dan zen bin. 20Tson-o Jisu le Sunggigü Nyugü tsekethyü a-nyun kerhün thyüo zope sinagog ka nyu me senthyü sola.

21Lo tsükatsü a-jo keshanyu dan aphu anyugun dunthyüo, “Jerusalem nyu zan higü hi rüshvu kehünyu aphu nshwen kehü gü tsüle higü hi kemvu ole?”

22Ai Saul le a-jo kvusa tseo tsügü tsüle Khrista gü letse kethyü zo tsentsü pe me hio Damaska nyu kebin Judanyu dan jo gwünkemhen la.

Judanyu Ben nyu Saul Ntsenkelo

23Lo jon keshanyu tsühontse hü tseo Judanyu dan le Saul dushvu kela rhi sola. 24Ai Saul le anyugun do tsü shalo la; tson-o anyugun le a-dushvu kela rüchün-o keben kezün chwida nyu a-tson khwen sola. 25ai a-jo tenyen kelonyu dan le kezün ki a-khipe rokhu nme nyu shülo njüo chwida kepe nme ka a-nipe chwida ngwen zin shüla.

Saul Le Jerusalem Nyu Gunkeryü

26Tsüselo a-le Jerusalem nyu gunryülo ntsin senthyükelonyu dan zen kengü nyü so; ai anyugun le a-no senthyükelonyu nme letse tenyen mvuo anyugun aphu a-nshvu sola. 27Ai Barnaba le a-zen-o apostelnyu dan ka gungü, a-le tsonne nyu Npugü hyu kethyü lo Npugü le a-zen kenthon kethyü lo a-le Damaska nyu Jisu zan sen-o peche sao me senthyü kethyü rüla pe anyugun ka zoshü. 28Tsüselo a-le Jerusalem nyu anyugun zen-o nsin nshyeo peche sao Npugü zan nyu me senthyü tinla. 29Tson-o a-le Griknyu khwen kezo Judanyu dan zen kenyi sola; ai anyugun le a-dushvu kela rhi sola. 30Tsükatsü a-pvünyu ju le shalo ntsin anyugun le a-zen-o Kaisaria nyu nshyeo a-nipe Tarsnyu shüla.

Aenea Thyü Ngwa Kelo

31Lo Judia lo Samaria rünyi aphu nyu kehun le yhun bwen-o nkolo; lo Npugü shye nshvuo yhun lo Kenshün Kapu no a-nyun thyü keyhun-o chon lo. 32Tsükatsü Pitor le lihiki ntsü sen-o Lidda nyu kebin kenshün nyu dan ka nshye. 33Tson-o Aenea tsekethyü chen tetse a-zhü nyu zhü zin kehünyu nme hyulo; lo temi tsügü le terothonyu nme. 34Tsükatsü Pitor le a-ka, “Aenea, Jisu Khrista le nthyü kesherhün shü bin nyo, lo nle so-o nzhü sülo chi,” tsonshü ntsin a-le sola. 35Tsügenyu Luda lo Sharon kazü nyu kebin nyu aphu a-hyushüo ranio Npugü kipon gunryülo.

Dorka Thyü Nrhün Kelo

36Lo Jopa nyu Tabitha tsekethyü senthyükelo tenunyu nme le hü; Griknyu khwen ki a-zan le Dorka; tenunyu tsügi le thatho kegwa kechon thyüo me che sashü hü. 37Lo tsükatsü a-le ho-o sila; tson-o mele a-min süpe katsen tesoki shü njü. 38Lo Luda le Jopa khonni kethyü genyu senthyükelonyu dan le Pitor le tsünyu bin tsekethyü shalo njüo mihvu nipe a-ki shüo a-hi tenge tseo,“Nle agun ki gunryü ntsüla nya nye!” tsonshü. 39Tsontsin Pitor le so-o au zen gunla; lo a-le gunryülo ntsin anyugun le a-zen-o katsen tesogü ki nsin; lo tsükatsü maginyu aphu a-khoka bin-o, Dorka le anyugun zen kebin ka thyü kenjü mikerün lo phinya thyü kenjü khipe a-hio chü bin. 40Ai Pitor le anyugun aphu no kamhun ki chwila njüo khosenlo-o kehithyü shüo ranigü “Tabitha, solo chi!” Tsonshü ntsin a-le a-yhütyü kho chwiryülo, tson-o a-le Pitor hyushü ntsin sogü dunlo. 41Tsontsin Pitor le a-ben keto pe a-tsüshü; tson-o a-sü solo; tson-o a-le kenshün nyu dan lo maginyu dan kolo njüo a-thyü nrhün pe anyugun tsüshü. 42Lo Jopa nyu kebin nyu aphu tsü rüla sha Küla; tsügenyu temi kechon le Npugü tenyenlo. 43Tsükitsü Pitor le jon kethon ki-e Jopa nyu Simon thyügi thyü kehünyu nme zen bin tinla.

Currently Selected:

APOSTELNYU THO 9: REGSBSI

Highlight

Copy