MATHAIIN 6

Abuingai Pekna rui

1“Anreng u ro mi mu ranga a makung u na om anzik om tho u no ro. Na tho u ten na Pa vana mi kom na phamman u abui. #Mt 23.5

2“Hantin han na pek tik lehan na makunga bekul tum u no ro mi dik lui ngai min na mansang rase ati na anchunna ina, lampuia atho u ataka kei na ti ni u zei ei man u rang ha a phamman aman u zei. 3Tenchu na pek tik le na chang kutin imo ei tho hava ha na voi kut ha man re no ro. 4Hantin han nei pek ha maruka ni rase, hava han na pa maruka amu han a mara na pe inti.

Borzong Ruia Anchuna

(Lk 11.2-4)

5“Hatuka bor na zong u tik le hatik han phuazekam ngai anga ni u no ro, asik chu amani ha anchunna ina le lam sira andinga mi mu ranga bor azong azot u, ataka kei na ti ni u zei hangai ha a phamman aman u zei. #Lk 18.10-14 6Tenchu bor na zong tik lehan na tadan sungrila lut ro hatuka makot khar tan na Pa maruka ompu ha ama kom borzong ro hava han na Pa maruka amu han amara na pe inti.

7“Hatuka bor na zong le akoronga ril munpu ril no ro nam atei ngai ei tho anga asik chu nei ril atam ten na borzong na masang inti ei ti u. 8Hantin han hangai anga ni u no ro asik chu imo nei nang u hava ha na zong u man na pa un ariat. 9Hantin han hiva ang hin borzong u ro:

‘Koini na Pa anvana mi

Na raming anthiang lalchi om rase.

10Na ram hong tung rase

Anvana min ei tho u anga.

Phila min um tho rase.

11Aviana rang khop sak nek na pe ro.

12Koini ranga asia tho ngai nei madual anga

Koini nei masial ngai um na madual ro.

13Siatna lama na mansin no tan asia ata na mazok ro.’

14“Asik chu mi masial na madual u ten na Pa vana min in um na madual unti. #Mk 11.25-26 15Tenchu mi ngai na madual u nok aniten na Pa un nang nim masial na madual u no ni.

Angoi ruia Anchuna

16“Hatuka na ngoi u tik le hatik han phuazekam ngai anga mai zinga om u no ro, annguia asik chu ei ngoi u mi mu na ranga amai u ei manngui u, ataka kei na ti u ni zei hangai ha a phamman a mansua u zei. 17Tenchu nang na ngoi tik le, hatik han na lu sariak khua ro. 18Hatuka mai phia ro hanke min nei ngoi ei na mu nok rang tenchu na Pa maruka om han na mu inti hava han na Pa maruka amun amara na pe inti.

Vana Nei Anting

(Lk 12.33-34)

19“Phil chunga na nei u rang manting u no ro, hivan chu rik le ngerin asak hatuka hivan hin anrun khur achuia a maruk. #Jak 5.2-3 20Tenchu vana na rang u nei manting u ro, sovason rik le ngerin sak mak sova son anrun khur chuia maruk mak. 21Asik chu na nei omna taka na malung um om inti.

Ra-ang le Taksa

(Lk 11.34-36)

22“Mit hi na puma lem ang ke hanke na mit avar ten na pum dora el inti. 23Tenchu na mit asiat ten na pum dora zing inti, hava sik han sungril ra-ang azing ten ha azing ha itukmo ei lian!

Pathiana Iamna Siak

(Lk 16.13; 12.22-31)

24“Tuten puma anni suak chang thei mak asik chu angkhat adit inti angkhat mumak inti. Hano angkhat chunga a raisan inti angkhat ha tel no ni. Pathian le nei aninina asuak chang thei u no ta ni.

25“Hasik han kei na ti ni u zei, imo ne ning imo sa ning atia na nuk ruia le imo ansil rua atia taksa ruia andon u no ro, sak neka nuk le puan neka na tak hi lian mak mo? 26Chung zuang va ngai tiang anhoi u ro sin um u mak at um u mak sasiaram manting u mak, hanum na Pa u vana min hangai ha sak apek. Nangni hi hangai neka lian u mak che mo? 27Hatuka nangni bila tumo andona a kum dung muk khat ngal ason thei?

28“Hanuk puan sika ichangmo nei andon u? Phaia lili par kung ngai ruia mandona tuak u ro itukmo ei anson hava ngai sin um u mak kher um u mak. 29Hanum kei na ril u ni zei Solomonin anina tin reng le anlianga angkhat dak ngal pha mak. #1 Rng 10.4-7; 2 Kr 9.3-6 30Hanle phaia chiak aviana om nangtuk moia nei tua thei hava ha Pathianin hantin han a manliang ten hanle o iamna tom ngai nangni ha, haneka na manliang nget u no ni mo?

31“Hantin han, hintin hin atia andon u no ro: 32‘Imo ne ning? Imo sa ning? Imo kei rasil rang?’ Asik chu Jentail ngaiin hava ngai ha tak ei sat. Na Pa u vana min ariat hava neinun ngai nei nang u. 33Tenchu a ram le ama ei anzikna arok mansa u ro hantin aniten hava ngai um na pe unti. 34Hantin han nangtuka rang mandon u no ro asik chu nangtuka rang chu nangtukin mandon bo ni nikhata rang nikhat ahun.

Currently Selected:

MATHAIIN 6: RANGBSI

Highlight

Copy