LUKIN 20

Isua Ningneina ruia Ankelna

(Mt 21.23-27; Mk 11.27-33)

1Nikhat chu Isuan Biakina mi a manchu na, Thang Ahui arila, chaizung le Dan minchu ngai, kho ulian ngai le anruala ahong u, 2hatuka ati pe u, “Na ril ta, imo ningneina nei dona hiva ngai nei tho? Tumo hintina ana pek?”

3Isuan a masanga, “Hanle na rakel u ka ti, na ril u ta, 4Johonin mi baptisma ei pek ha Pathian ata mo ole miring ata mo?”

5An ena ankhal u zei, “Imo ti mani? Pathian ata na ti ten, hanle Johon ha iam u mak chena? Na ti inti. 6Tenchu, ‘Miring ata ke na ti ten,’ hiva mipui doran lung na deng inti, asik chu Johon ha deari keng tia ei riat u. 7Hovan ata hong mo re mak me,” atia amasang u. 8Hatuka Isuan atipe na, “Kom na ril u no ning hovan ata mo hiva kei tho ngai hi.”

Gerep Rahuana Sinatho ngai Ankhina

(Mt 21.33-46; Mk 12.1-12)

9Hava suale Isuan mipui kom hiva ankhina aril: “Voikhat chu mikhatin rahuan asina, rahuan a en ngai kom a maka asotpa ranga khuala ase. #Isa 5.1 10Gerep ansuang hun ahonga suaka, suak atira rahuan a en ngai kom ama changai ava lak ranga. Tenchu rahuan a enpu han a lei zem sabaka ite choi luia a lei makhir. 11Hasik han suak khat ret atir; tenchu rahuan a enpun ama ham a lei zema; maimok a lei saka akoronga a makhir ret. 12Hatuka suak anthumna atir reta; rahuan a enpun a lei maphop reta a lei rasua. 13Rahuan puman ati zei, ‘Imo tho ning? Ka nai man se ka ti; ama chu lei ton u bo ni!’ 14Tenchu rahuan a en ngaiin a lei mu u na, amani le amani anti u na, ‘Hile hi apuma nai. Tho that u rei hatuka koini na ta chang inti!’ 15Hatuka rahuan panga amasuak u na athat u.

“Atun chu rahuan puma han imo lot ni ha arung ngai ha?” Isuan arakela. 16“Honga, ha rahuan arung ngai ha hong that intia atei kom pe inti.” Mipuiin hava ei riat le, “Hadorpei chu ni no rase!” ati u.

17Isuan amani a ena arakel, “Hanle hiva Pathian chong hi i ei tina mo? #Sam 118.22

“ ‘Ha lung, a sin ngaiin ei tel u nok ha, anang khit achanga.

18Ha lung chunga achul tak chu aher chang inti; hatuka ha lungin ei del tak chu adi chang inti.’ ”

Leichoi ruia Ankelna

(Mt 22.15-22; Mk 12.13-17)

19Dan minchu ngai le chaizung ngaiin Isua ansur rang ati u hava mun len han, asik chu ankhina ha amani dui keng ti ariat u na; tenchu mipui achi u. 20Hasik han hun a en u; mi senkhat azik apeka ama en ranga a thun u na ankelrua le hankeng Rom ram aoppu kuta ei mansur u rang. 21Hava misi ngaiin, “Minchupu, nei manchu le nei ril ngai hi adik ti na riat. Hatuka mi nina tel ngal mak che Pathian zot dan anga adik Pathian rui na manchu. 22Na ril ta, koini na dan akhel mo ei ni Kaisar kuta lei na choiin?”

23Tenchu Isuan achang do u ariata atipe, 24“Rupa sumru khat na manmu u ta. Tu ramil le raming mo achuang?”

“Kaisar ramil,” atia amasang u.

25Hasik han Isuan amasanga, “Kaisar ata chu Kaisar pe u ro, Pathian ta chu Pathian pe u ro.”

26Havan mipui bila ite asur na man u maka, adairek u na ei masang ngai ariat u na achang adong u.

Athi ata Anthui ruia Ankelna

(Mt 22.23-33; Mk 12.18-27)

27Hatuka Saduki senkhat, mi athi ata anthui no ni ati, Isua kom ahonga ati u, #Kts 23.8 28“Minchupu, Mosin hiva dan hi koini rang a maziaka, ‘Pasal khat athina a nungak a maka tenchu nai mamaka, ha arong ha hava nai a naipan a laka nai ei nei u na athipa nai atina anpom intia.’ #Dan 25.5 29Voikhat chu parual sari oma; a ulian khitin nungak alaka nai nei luia athi. 30Athuai len ha alak reta. 31Hatuka anthum changnan, ha parual sari ngai ha hantin kiar ei ni nai maluia athi kiar u na. 32Nuka ha nupang, athi. 33Atun chu, athin thui nikhua tu nungak mo ni ni? Pasal sarin ei lak.”

34Isuan amani a masanga, “Atun taka nupang pasal chu an om, 35tenchu nupang pasal athi ata anthui rua chu, hava tika chu an om ulai no ni. 36Vanpalai anga ni untia thi u lai no ni. Amani ha Pathian nai ngai, asik chu athi ata ei anthui u. 37Hatuka Mosin anthiang vanga a mandang athi ngai anthui ret. Chiakbuk moi achuang rui han Puma rui aril, ‘Abraham a Pathian, Isaka a Pathian hanuk Jakob a Pathian.’ #Ant 3.6 38Ama ha adam ngai Pathian, athi ngai nimak, asik chu ama kom chu adam kiar.”

39Dan minchu senkhat achonga, “Nei masang asa, Minchupu!” ati u. 40Asik chu rakel ngam u lai mak.

Messia ruia Ankelna

(Mt 22.41-46; Mk 12.35-37)

41Isuan amani a rakel, “Messia hi David a khuk ata ei ni rang hontin ei anti thei? 42Asik chu David apumin Sam anziaka ei ti, #Sam 110.1

‘Puman ka Puma kom ati:

Ka chang tiang ansut ro

43Na raldui ngai na ke siakna

Ka manchang maseng.’

44Davidin Puma atia a paia; hontinmo Messia ha David a khuk ei ni thei?”

Dan minchu ngai ata Anreng

(Mt 23.1-36; Mk 12.38-40)

45Mi doran arangai lai tak, Isuan a zolai ngai rang ati, 46“Dan minchu ngai ata anrung u ro, a kultai anchual le acheia min lalchi ei tho rang azot u, bazar muna; Sinagogue mun anhoi athang u chachaka; hatuka bu khalai zarna na mun asa khit athang u chachak. 47Arong ngai donglua amaruka, asei sabaka a borzong amanlang u na! Aduk la na khit unti!”

Currently Selected:

LUKIN 20: RANGBSI

Highlight

Copy