MARK 12

Grephuan Gentehna Thu

(Matt. 21.33-46; Lk. 20.9-19)

1Huan gentehna thu in a kiang uah a gen a, “Mi kuahiam in grephuan a bawl a, a kim huang in a um a, grep sukna ding khuk a tou a, insang a lam a, loukhoumite kiang ah khohloh ding in a pia a, gamdang ah a paisanta hi. 2A gah loh hun in a tansik amau kiang a kipan la ding in lou khohloh mite kiang ah sikha khat a sawl hi. 3Huai mi a na man ua, a vua ua, khutvuak in a paisak nawnta uhi. 4Huan sikha dang a kiang uah a sawl nawn a; huai mi leng a lu a na hihliam ua, zumhuaipi in a na bawl uhi. 5Huan sikha dang a sawl nawn zel a; huai mi a na that ua, sikha dang tampi leng, khenkhat a na vua ua, khenkhat a na that uhi. 6Huan sawl ding khat, a tapa deihtak kia a neilai hi; ‘Ka tapa zaw a na zahtak ding uh’ chi in amah a nanungpen in a kiang uah a sawl hi. 7Himahleh huai lou khohloh mite’n, ‘hiai mi gouluah dingpa ahi; i that ding uh aw; huchi in a gouluah ding ei a ahimai ding’ a kichi uhi. 8Huchi in amah a man ua, that in, grephuan apat a lawnkhia uhi. 9Huaiziak in, grephuan neipa’n bangchi’n a honhih dia? Lou khohloh mite a honhih mangthang dia; lou midangte a pe ding hi. 10Hiai Laisiangthou na sim kei ua hia?

“Inlammite suang deihlouhpen,

huai mahmah a ning a suang

phatuampen a hong hita hi.

11Huai Toupa hih ahi, i mitmuh un a lamdang hi” chih, a chi hi.

12Huan amah mat a tumta ua; huai gentehna thu lah amau dem a a gen ahi chih a thei ngal ua. Huchi in amah a nusia ua, a paimangta uhi.

Leiman Thu A Dotna

(Matt. 22.15-22; Lk. 20.20-26)

13Huan a thugen a a mattheihna ding in Pharisaite leh Herod pawl a mi kuate hiam a kiang ah a sawl uhi. 14Huchi in amau a hongtun un a kiang ah, “Sinsakpa, midiktat na hi a, deihsak tuam kuamah na neikei chih ka thei uh, kuamah khentuam neilou in, chihtak ngial in Pathian lam thu na hilh zel hi: Kaisar kiang a leiman liau a siang hia siang lou? 15Pe ding ka hi ua, pe lou ding?” a chi uhi. Aman a lepchiahdan uh thei in, a kiang uah, “Bangdia hon ze-et na hi ua? Makhai hontawi un, ka en ding” a chi hi. 16A hontawi ua, aman a kiang uah, “Hiai kua lim leh kua min ahia?” a chi hi. 17Amau “Kaisar a” a chi uhi. Jesu’n a kiang uah, “Kaisar thilte Kaisar kiang ah pia unla, Pathian thilte Pathian kiang ah peta unla” a chi hi. Huchi in lamdang a sa mahmah uhi.

Thohnawnna Thu A Dotna

(Matt. 22.23-33; Lk. 20.27-40)

18Huan Saddukaite, thohnawnna a omkei chite, a kiang ah a hong uh. 19A kiang ah, “Sinsakpa, Mosi in, kuapeuh a unaupa’n ta neilou in a zi sihsan leh, a unaupa’n a zi luah in a unaupa ading in chi a suahsak ding chi’n a hon gelh sak hi. 20Ahi, sal sagih a om ua; a upapen in zi a nei a, chi suahlou in a si hi. 21Huan a nihna in a luaha, chi suahlou in a si nawn zel a; a thumna in huchi mah bang in. 22Huchi in sal sagihte chi suahlou in a sita ua, a tawpna ah numei leng a sita hi. 23Thohnawn hun in a kuapen zi ahi dia le? Sagih te’n zi in a neichiat ngal ua” chi in a dong uhi.

24Jesu’n a kiang uah, “Hiai ziak hilou hia, na theihkhelh nak uh, Laisiangthou leh Pathian thilhihtheihna na theihlouh ziak un? 25Misi lak apat a thohnawn hun un zi leh pasal a kinei lou ding ua, van angelte bang hizawta ding uh ahi. 26Huan misite kaihthoh a a om ding thu lah Mosi laibu a, Loubuk ah, Pathian in, ‘Kei Abraham Pathian, Isak Pathian, leh Jakob Pathian ka hi, chi a, amah a houpih dan na simkei ua hia?’ 27Amah misi Pathian ahi kei a, mihing Pathian ahizaw; na theikhial tel uh” a chi hi.

Thupiak Thupipen Thu a Dotna

(Matt. 22.34-40; Lk. 10.25-28)

28Huan laigelhmite lak a mi khat a hong a, a kisel uh a na ngaikhia a, Jesu’n amaute thutak in a dawng chih a thei a, a kiang ah, “Thupiak tengteng ah koi ahia thupipen?” chi in, a dong hi.

29Jesu’n, “A thupipen hiai ahi: Israel aw, ngai dih uh, Toupa i Pathian uh Toupa khat kia ahi; 30‘Toupa na Pathian na lungtang tengteng in, na kha tengteng in, na lungsim tengteng in leh na hatna tengteng in na it ding ahi,’ chih. 31A zom hiai ahi, ‘nangmah na ki-it bang in na vengte na it ding,’ chih. Hiaite sang a thupiak thupizaw a omkei” chi in, a dawng hi.

32Laigelhmi’n a kiang ah, “Hina ngei e, Sinsakpa amah zaw khat kia ahi a, amah louzaw kuamah dang a omkei uh, 33Amah lungtang tengteng, theihsiamna tengteng, hatna tengteng a it a, eimah i ki-it bang a vengte it haltum thilpiak leh kithoihna tengteng sang in a hoihzaw petmah chih, na gendik ngei” a chi hi.

34Piltak in a dawng chih Jesu’n a theih in, a kiang ah, “Pathian gam na gamlat kei hi” a chi a, huai nungsiah kuamah in thu a dong ngamta kei uhi.

Messia Tanchin Dotna

(Matt. 22.41-46; Lk. 21.5-6)

35Huan Pathian biakin a Jesu’n thu a hilhlai in, amau a houpih a, “Khrist David tapa ahi chih laigelhmite’n bangchidan a gen uh ahia? 36David ngei in, Kha Siangthou in, Toupa’n, ka Toupa kiang ah, “Na melmate na khepek ngakna a ka bawl masiah ka taklam ah tuin” a chi, a chi hi.

37David ngei in amah Toupa, a chi ngal a, koi a kipan in ahia amah a tapa a hih?” a chi hi. Huan mivantang in kipaktak in a thu a ngaikhia uhi.

Laigelhmite Vauna

(Matt. 23.1-36; Lk. 20.45-47)

38Huan a thuhilhna ah, “Laigelhmite lak ah pilvang un; amau puanaktual silh a vak a ut ua, dawlmunte ah mite chibai a buk ua, 39Kikhopnain a tutphah hoihpen leh Ankuangluina a mun hoihpen a deihtuam nak uhi; 40Meithai in a negai ua, kilim bawl in sawtpipi a thum uh; huaite’n siamlouhtanna lianzaw a tang ding uh” a chi hi.

Meithai Thilpiak

(Lk. 21.1-4)

41Huan sumkholna zawn ah a tu a; sumkholna a mipi sumkhiakdan a en a; mi hau tampitak in tampipi a khia uhi. 42Meithai zawngtak a hongpai a, dal dangka muza nih a khia a, huai tuh paihsa khat hu ahi. 43Jesu’n a nungzuite a sam a, a kiang uah, “Chihtaktak in k’on hilh ahi, sumkholna a khe tengteng lak ah hiai meithai zawngtakin a khe tam pen hi. 44Hiaite tengteng in a neihlet uh a khia ua; aman zaw a deihthoh laitak, a neih sun, a hinna ding tengteng a khe vek ahi” a chi hi.

Currently Selected:

MARK 12: PAITBSI

Highlight

Copy