MATTHAI 3

Baptispa Johan Thugen

(Mk. 1.1-8; Lk. 3.1-18; Jn. 1.19-28)

1Huchihlai in Baptispa Johan in, 2“Kisik un! van gam a naita” chi in, Judia gamdai ah thugen in a hongpai hi. 3Amah ahi, zawlnei Isai in:

“Gamdai a mi kikou aw in,

Toupa lamlian sial unla

a lampite tangsak un,

a chi” chi a a na genpen ahi.

4Johan in sangawngsau mul puan a silh a, savun kawnggak a gak a, a an khaukhup leh khuaizu ahi. 5Huchihlai in Jerusalem khua, Judia gam tengteng, Jordan luidung kim tengteng a hong paikhawm uhi. 6A khelhna uh thupha tawi in a kiang honzuan ua, Jordan lui ah a Baptisma a tang uhi.

7Himahleh, Pharisaite leh Saddukaite tampi a ma a baptisma tang ding a hongpai a muh in, a kiang uah, “Gulsuante! thangpaihna hongtung ding taisan ding in kuan hon thuhilh ahia? 8Huchi in kisikna toh kilawm gah hon suangkhia un;’ 9Abraham ka pu uh ahi, chi in, kingaihtuah kei un, Pathian in hiai suangte Abraham suante in a dingsak thei hi k’on chi ahi. 10Tua kipan in heipi singbul teng ah a koihta uh; huchi in, singchih gah hoih a gahlou peuhpeuh a phuk ua, mei ah a pailut zel uhi. 11“Ken zaw kisikna ding in tui in k’on baptist ngei a, himahleh, amah ka nung a hongpai keimah sang in a thupizaw a, a khedap tawitak leng ka hi kei, Aman zaw Kha Siangthou leh mei in noute a hon baptist ding hi. 12A khut in phazah a tawi a, a phual a zapsiang sipsip ding a, buhpang ah a buh asung ding, a si bel mei mittheilou in a haltum ding” a chi hi.

Jesu Baptisna

(Mk. 1.9-11; Lk. 3.21-22)

13Huchihlai in a kiang a baptisma tang ding in Jesu Galili gam a kipan Jordan lui ah Johan kiang ah a hongpai hi. 14Johan in, “Nang kei n’on baptist kiphamoh zawpi a, ka kiang ah na hong zawsop ahi maw?” chi in, a kham hi. 15Himahleh Jesu’n a kiang ah, “Tuin lemsak teitei in, hichibang a diktatna tengteng hih tangtun ei dia kilawm ahi” chi in, a dawng a, huchi in lem a sata hi. 16Huan Jesu baptisma a tantak in tui a kipan a pawtpah ngal a, ngai in, amah ading in van kihong a, Pathian Kha, vakhu bang a hongsuk in, a tung a hongtu a mu hi. 17Huan ngai in, van a kipan aw in, “Hiai ka Tapa deihtak, ka kipahna mahmah ahi” a chi hi.

Currently Selected:

MATTHAI 3: PAITBSI

Highlight

Copy