MATTHAI 25

Nungak Siangthou Sawm Gentehna

1“Huai hun chiang in van gam tuh nungak siangthou sawm, a khawnvak uh tawi a mouneipa dawn ding a pawtte toh teh ahi ding hi. 2Huchi in a lak ua nga a hai ua, nga a pil uhi. 3A haite’n a khawnvak uh a tawi ua, a tui a tawikei uhi. 4A pilte’n bel a khawnvakte uh a tawi in, a um ah a tui leng a tawi uhi. 5Huan mouneipa a hong zekai ziak in avek un a lusu ua, a na ihmuta uhi.

6Ngai dih uh! zanlai in, ‘mouneipa a hong e: a dawn ding in hongpawt un’: chi in, kikou ging a hong omta hi. 7Huaitak in nungak siangthoute a thouvek ua, a khawnvakte uh a hahsiang uhi. 8Huan, a haite’n, a pilte kiang ah, na khawnvaktui uh hon pesam un; ka khawnvak uh mit ding in a kisa, a chi uhi. 9Himahleh, a pilte’n, kou leh nou ading in a kiching kei ding; a zuakte kiang ah pai unla, lei zaw un, chi in, a dawng uhi. 10Huan, lei ding a a paimang kal un mouneipa a hongtungta a; huchi in, a mansate amah toh kitenna Ankuang um ding in a lut ua; huan, kongkhak a khakta uhi.

11Huai nung in nungak siangthou dangte leng a hongtung ua, “Toupa, Toupa, hon hon in” a chi uhi: 12Himahleh aman, chihtaktak in k’on hilh ahi, k’on thei ngeikei, chi in a dawng hi.

13Huaiziak in, kiging un, a ni leh a hun na theihlouh ziak un.

Talent Gentehna Thu

14“Van gam tuh mi gamdang a pai dia kisa, a sikhate sam a, a sumte a kiang ua kemsak bang ahi. 15Sikha khat kiang ah talent nga a pia a, sikha dang kiang ah talent nih a pia a, sikha dang kiang ah talent khat a pia a; a hihtheih hun ding dan chiat ua pia in a paita hi. 16Talent nga mupa huai in a va sumsin paha, talent nga dang a mukheta hi, 17Huchi mah bang in talent nih mupa’n leng talent nih dang a mukhia hi. 18Talent khat mupa bel a vakuan a, lei a tou a, a pu dangka a phumgu zawta hi.

19“Hun sawtpi nung in huai sikhate pu amau toh a sum tungtang hihfel ding in a hongpai ta hi. 20Talent nga mupa a hongpai a, talent nga dang a hontawi a, ‘Pu, nang talent nga n’on kemsak a; en dih, talent nga dang ka mukhia,’ a chi hi. 21A pu’n a kiang ah, sikha hoih leh muanhuai, na hihhoih hi, tawmchik tung ah na muanhuai a, tampi tung ah k’on omsak ding; na pu kipahna ah lut in, a chi hi.

22“Talent nih mupa leng a hongpai a, ‘Pu, nang talent nih n’on kemsak a; en dih, talent nih dang ka mukhia,’ a chi hi. 23A pu’n a kiang ah, ‘Sikha hoih leh muanhuai, na hihhoih e, tawmchik tung ah na muanhuai a, tampi tung ah k’on omsak ding; na pu kipahna ah lut in,’ a chi hi.

24“Huan talent khat mupa leng a hongpai a, ‘Pu, mi chihhakpi na hi chih k’on thei a; na tuhlouhna ah leng na at a, na thehlouhna ah leng na khawm hi; 25Huaiziak in ka lau a, ka vapai a, na talent lei ah ka selgu a; en in, nang a ngei na mu nawn hi,’ a chi hi.

26“A pu’n a kiang ah, ‘Sikha gilou leh zongzaw, ka tuhlouhna a ka at a, ka thehlouhna ah leng ka khawm chih na thei maw? 27Huchi ahihngal leh ka dangka sumsinte kiang a na koih ding hi a, huchi a ka hongpai a kei a a pung toh ka muhnawn ding ahi. 28Huaiziak in a talent khat laksak unla, talent sawm neipa kiang ah pia un. 29Kuapeuh a nei piak behlap ahi ding a, a honghau ding; kuapeuh a neilou a neihsun nangawn laksak ahi ding hi. 30Huan sikha phatuamlou pawlam mial ah paikhia un, huai ah kah leh hagawi a om ding,’ chi in, a dawng hi.

Vaihawmna Ni

31“Himahleh, Mihing Tapa, a angelte tengteng toh, a thupina a kivan a a hongpai hun chiang in, a thupina mangtutphah ah a tu ding hi. 32A ma ah namchih a kikhawm ding ua; belamchingpa’n kel lak apan belamte a khenkhia bang in amaute a khenkhe ding hi. 33Belamte a taklam ah a koih ding a, kelte a veilam ah a koih ding hi. 34Huai hun chiang in Kumpipa’n a taklam a mite kiang ah, ‘Ka Pa deihsakte aw, hongpai un, khovel siamchil apan nou adia gam bawlsa luah un. 35Ka gil a kial in, nekding n’on pia ua; ka dang a tak in, dawn ding n’on pia uh; mikhual ka hih in n’on zintun ua; 36Vuaktang ka hih in, puan n’on silhsak uh; ka chi a nat in, ka kiang a na hong ziak un,’ a chi ding hi.

37“Huai hun chiang in, mi diktatte’n, Toupa, chik in ahia gilkial a k’on muh ua nekding k’on piak uh? Dangtak a k’on muh ua, dawn ding k’on piak uh? 38Chik in ahia mikhual a k’on muh ua, k’on zintun ua, vuaktang a k’on muh ua, puan k’on silhsak uh? 39Chik in ahia china in hiam suangkulh ah hiam k’on muh ua, na kiang a ka hong uh? chi in, a dong ding uhi. 40Kumpipa’n amaute kiang ah, chihtaktak in k’on hilh ahi, ‘hiai ka unau neupente lak a mi khat tung a na hih uh ka tung a hih na hi uh’ chi in, a dawng ding hi.

41“Huaikhit in, a veilam a mite kiang ah leng, ‘Hamsia thuakte aw, tangtawn mei Diabol leh a sawltakte dia mun bawl ah hon paimang san un; 42Ka gil a kial in, nekding n’on pekei ua; ka dang a tak in, dawn ding n’on pekei ua; 43Mikhual ka hih in, n’on zintun kei uh; vuaktang ka hih in, puan n’on silhsak kei ua; china leh suangkulh a ka om in, n’on veh louh ziak un’ a chi ding hi.

44“Huai hun chiang in amau leng, Toupa, chik in ahia gilkial hiam, vuaktang hiam, china hiam, suangkulh ah hiam k’on muh ua, na nna k’on sepsaklouh uh? chi in a dong ding uhi. 45Aman a kiang uah, Chihtaktak in k’on hilh ahi, ‘hiai mi neupente lak a mi khat tung a na hihlouh uh ka tung a hihlou na hi uh’ chi in, a dawng ding hi. 46Huan huaite tangtawn gawtna ah a pai ding ua; mi diktatte bel tangtawn hinna ah a pai ding uhi” a chi hi.

Currently Selected:

MATTHAI 25: PAITBSI

Highlight

Copy