JOHAN 8
8
Numei Angkawmlai Mat
1Olive tang ah Jesu a hohtou hi. 2Zingsang phalvak in Pathian biakin ah a lutnawn a, mi tengteng a kiang ah a hongpai ua, amah a tu a, amau thu a hilh hi. 3Laigelhmite leh Pharisaite’n numei khat a angkawm lai a mat uh a honpi ua; a lai ah a dingsak uhi. 4Jesu kiang ah, “Sinsakpa, hiai numei angkawm, a angkawm laitak a a mat uh ahi. 5Mosi Dan laibu in hichibang mi suang a denlup thu a honpia hi; nang bangchi na sa a?” a chi uhi. 6Huai thu amah ze-etna dia a chih uh ahi, hekna ding a muh theihna ding un. Huchi in Jesu a kun a, a thugen uh zalou bang in a khutzung in lei a gelh hi.
7Huan a dot lailai ziak un amah a daktou a a kiang uah, “Na lak ua khelhna neilou in amah suang in deng masa heh” a chi hi. 8A kun nawn a, a khutzung in lei ah a gelh nawn hi. 9Amau a thugen a zak un, upapen apan in a tawppha in, khatkhat in a gelkhia ua; huchi in numei a lai a a omna ngei a om toh Jesu kia a om uhi. 10Jesu a daktou a, “Numei, koi a om ahi ua? Kuamah in siamlouh hon tangsaklou uhia?” a chi hi.
11Huan aman “Toupa, kuamah in hon tangsakkei” a chi hi. Jesu’n, “Ken leng siamlouh k’on tangsak kei; pai inla, tuban hihkhial nawn ken” a chi hi.
Jesu Khovel Vak Ahi
12Jesu’n a kiang uah thu a gennawn a, “Kei khovel vak ka hi; kuapeuh honzui mial ah a khosa kei hial ding, hinna vak a nei zaw ding” a chi hi.
13Huchi in Pharisaite’n a kiang ah, “Nangmah thu theisak na hi; na thu theihsak a dikkei” a chi uhi.
14Jesu’n a kiang uah, “Keimah thu theisak na hita leng zong ka thu theisak a dik ahi. Ken ka hong kipatna leh ka manohna ding leng ka thei hi; noute’n bel ka hong kipatna leh ka manohna ding na theikei uhi. 15Nou sa dan in vai na hawmsak uh; ken kuamah vai ka hawmsak kei hi. 16Ahi, vaihawmsak na hi taleng zong, ka vaihawmsak a dik ding; keimah kia ka hi kei a, kei leh Pa hon sawlpa ka hi zaw uhi. 17Ahi, na dan laibu uah leng mi nih thu a dik, chih gelh ahi. 18Kei ka hihleh keimah thu theisakpa ka hi a, Pa hon sawlpan ka thu a theisak hi” a chi a, a dawng hi.
19Amau a kiang ah, “Na pa koi ah?” a chi uhi. Jesu’n, “Nou kei n’on theikei uh, ka Pa leng na theikei uh; kei honthei hile uchin, ka Pa leng na thei ding uh” chi in, a dawng hi.
20Huai thu Pathian biakin a thu a hilhkawm in, sumkoihna mun a a gen ahi; a hun a tun nailouh ziak in kuamah in amah a man sam kei uhi.
Pa Kiang a Pai Ding Genkholhna
21Huan aman a kiang uah, “Ka paimang ding a, nou n’on zong ding ua, na khelhna uah na si ding uh; ka hohna ding ah na hong theikei ding uh” a chi nawn hi.
22Judate’n, “Ka hohna ding ah na hong theikei ding uh, a chih, a kihihlum dia a diam?” a chi uhi.
23Aman a kiang uah, “Nou nuailam a kipan na hi ua; kei tunglam a kipan ka hi; nou khovel a na hi ua, kei zaw hiai khovel a ka hi kei hi. 24Huaiziak in na kiang uah, na khelhna uah na si ding uh, ka chih huai amah ka hi chih na gintak kei ua leh, na khelhna uah na si ngeingei ding uh” a chi hi.
25Huan amau a kiang ah, “Kua na hia?” a chi uhi. Jesu’n a kiang uah, “A tung a kipan in na kiang uah ka genta hi. 26Nou tungtang thu ah thil tampi gen ding leh ngaihtuah ding ka nei; himahleh, hon sawlpa zaw mi dik ahi; amah kiang a ka thuzakte khovel kiang ah ka hilh hi” a chi hi.
27Pa thu a kiang uah a gen chih a theisiam kei uhi. 28Huchi in Jesu mah in, “Nou mihing Tapa na khaikang nung un, amah ka hi chih leh, ken keimah thu in thil bangmah ka hihkei a, Pa in honhilh bangzel in hiai thu ka genzaw ahi chih na thei ding uhi. 29Hon sawlpa ka kiang ah a om a, Pa in kei kia in hon nusia ngeikei hi; a thil kipahlam peuhmah ka hihzel ziak in” a chi hi.
Thutak Suahtakna Ahi
30Huan huai thute a genlai in mi tampi’n amah a gingta uhi. 31Huchi in Jesu’n a gingta Judate kiang ah, “Ka thu a na om gige uleh, ka nungzuite na hi taktak ding uhi. 32Huan thutak na thei ding ua, thutak in a hon suaktasak ding” a chi hi.
33Huan amau a kiang ah, “Abraham suante keive ua, tutan in kuamah sal ah ka om ngeikei uh, suahtaksak in na om ding uh bangchi chih a chi na hia?” a chi ua, a dong uhi.
34Huan Jesu’n a kiang uah, “Chihtaktak in, chihtaktak in, k’on hilh ahi, kuapeuh thil hihkhial khelhna sal ahi. 35Sal chiklaipeuh in inn ah a om gige kei a; Tapa chiklaipeuh in a om gige hi. 36Tapa in sal apat a hon suahtaksak leh, na suakta taktak ding uhi. 37Abraham suante na hi uh chih ka thei hi, himahleh honthah na tum ngal ua, ka thu in nou ah mun a neih louh ziak in. 38Ken ka Pa kiang a thil ka muh ka gen a; nou leng na pa u kiang a thil na muh uh na hih uh” a chi hi.
39Huan amau a kiang ah, “Kou pa Abraham ahi” a chi ua, a dawng uhi. Jesu’n a kiang uah, “Abraham tate hile uchin, Abraham thilhih na hihta ding uhi a chi hi. 40Himahleh Pathian kiang a thutak ka zak, nou hon hilhpa kei tun ah hon thah na tum ngal ua; Abraham in zaw hichibang in ahihkei. Nou zaw na pa uh thil na hihnak uhi” a chi hi. 41Amau a kiang ah, “Angkikawm a piang ka hi kei uh, Pa khat kia ka nei uh, Pathian” a chi uhi.
42Jesu’n a kiang uah, “Pathian na Pa uh hita leh nou kei n’on it ding uh; Pathian apan hongpawt leh a kiang a kipan hongpai ka hi; keimah thu a hongleng ka hi sam kei, aman a honsawl zaw ahi. 43Bangziak a ka thugen theisiamlou? Ka thu na zak theihlouh ziak uh ahi. 44Nou zaw na pa uh Diabol a pawt na hi ua, na pa uh utna na hih ding uh. Amah zaw a tung a kipan tualthat ahi, thutak ah a omkei, asung a thutak himhim a omlouh ziak in. Zuauthu a gen in amah a ngei a gen ahi; zuauthei ahi ngal a, zuaupa leng ahi. 45Thutak ka gen ziak in nou hon gingtalou na hi uhi. 46Na lak uah kuan ahia gilou lam a siamlouh hontan thei om? Thutak ka gen in leng nou bang a chia hon gingtalou? 47Pathian apan pawt in, Pathian thu a pakta a; Pathian apan pawt na hihlouh ziak un na pakta kei uhi” a chi hi.
Jesu Leh Abraham
48Huan Judate’n a kiang ah, “Samari mi dawizawl na hi ka chih uh, ka chi dikngel kei umaw?” a chi ua, a dawng uhi.
49Jesu’n, “Dawizawl ka hi kei. Ka Pa ka zahtak ahizaw, nou kei n’on zahtak kei uhi. 50Himahleh keimah kilawmna zawng ka hi kei; a zawngmi leh a ngaihtuahmi khat a om ahi. 51Chihtaktak in, chihtaktak in, k’on hilh ahi, min ka thu a zuih leh tangtawn in sihna a mu kei ding” a chi hi.
52Huan Judate’n a kiang ah, “Dawizawl na hi chih tuin ka theita uhi. Abraham a sita, zawlneite toh, nang min ka thu a zuih leh, tangtawn in sihna a chiam kei ding, na chi hi. 53Ka pu uh Abraham sang in na thupizaw ahia? Amah leng a sita a, zawlneite leng a sita uh; kua a kibawl na hia?” a chi uhi.
54Jesu’n “Keimah kipahtawi leng ka kipahtawina bangmah ahi kei; na Pathian uh, na chih uh ka Pa, hon pahtawipa ahi; nou amah na theikei uhi. 55Ken zaw amah ka thei; Amah ka theikei chi leng noumau bang a zuau thei ka hi ding: huchi in amah ka thei a, a thu leng ka zuizel hi. 56Na pu uh Abraham, ka ni mu ding a hih ziak in a kipak a, huan a mu petmah a, a kipak hi” a chi a, a dawng hi.
57Huan Judate’n a kiang ah, “Nang kum sawmnga leng hi nailou pi in, Abraham na mu ahia?” a chi uhi.
58Jesu’n a kiang uah, “Chihtaktak in, Chihtaktak in, k’on hilh ahi, Abraham om ma in leng ka om” a chi hi.
59Huchi in a denna ding un suangte a tawm ua; himahleh Jesu a kibu a, Pathian biakin a kipan a pawtta hi.
Currently Selected:
JOHAN 8: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
