JOHAN 6

Mipi Sang Nga Vakna

(Matt. 14.13-21; Mk. 6.30-44; Lk. 9.1-17)

1Huai thilte khit in, Galili dil, Tiberias dil kichi gallam ah Jesu a paita hi. 2Damloute tung a thillamdang a hihte a muh ziak un mipi tampi in amah a zui uhi. 3Jesu tang ah a hohtou a, huai ah a nungzuite kiang ah a tu hi. 4Huan Paikan Ankuangluina, Judate Ankuangluina a naita hi. 5Jesu a dak a, mipi tampi in a kiang lam honzuan in a mu a, Philip kiang ah, “Hiaite nekding tanghou koi a lei ding i hi ua?” a chi hi. 6Huai thu amah ze-et nadia a gen ahi, a hih ding lah aman a theigige hi.

7Philip in a kiang ah, “Michih in tawmchik a a tan chiat ding u leng, makhai za nih man tanghou in a daihkei ding” chi in a dawng hi.

8Huan a nungzuite lak a khat, Simon Peter unau Andru in a kiang ah, 9“Barli buh tanghou phel nga leh ngasa nih nei pasal naupang khat hiai ah a om hi; himahleh mi hiai zah lawmlawm lak ah bang tham hizou ding ahia?” a chi hi.

10Jesu’n, “Mite tusak un” a chi hi. Huai ah loupa tampi a om hi. Huchi in pichingte a tuta ua, a tamlam uh sang nga vel ahi. 11Jesu’n tanghou phelte a la a, kipahthu a genkhit in a tute kiang ah a hawm a, huchi mah bang in ngasate leng a deihhun un a hawm sam hi. 12Huan a kham nung un, a nungzuite kiang ah, “Bangmah manglou ding in a nente luak un” a chi hi. 13Huchi in a luak ua, barli buh tanghou phel nga nete nekbang nente bawm sawmlehnih a hihdim uhi.

14Mite’n a thillamdang hih a muhtak un, “Hiai mi, zawlnei, khovel a hong dingpa a na hingei e” a chi uhi. 15Huchi in amah kumpipa dia bawl ding a mat teitei tum in a hong kuan ding uh chih Jesu’n a thei a, tang ah amah kia in a paituam nawnta hi.

Tuitung Ah Jesu Khe In A Pai

(Matt. 14.22-33; Mk. 6.45-52)

16Huan nitaklam in a nungzuite dil ah a paisuk uhi. 17Long ah a tuang ua, dil ah Kapernaum khua a zuan uhi. Khua a mialta a, Jesu lah a kiang uah a hongtung naikei hi. 18Huihpi hattak a nun ziak in tui a kihot sang hulhul hi. 19Ching sawmnih leh ching nga hiam, ching sawmthum hiam a kalh nung un, Jesu dil tung ah khe a pai a, long honnaih in a mu ua, a lauta uhi. 20Himahleh aman a kiang uah, “Keimah ka hi, lau kei un” a chi hi. 21Huchi in kilawptakin long ah Jesu a tuangsakta ua, huchi in long a zot gam uh a tungpah hi.

Mipite’n Jesu A Zong Uh

22A zing in dilgal lehlam a mipi dingte’n, long khat loungal long dang a omkei a, Jesu a nungzuite toh long ah a tuang tonkei a, a nungzuite amau kia in a pai uh chih a thei uhi. 23Himahleh Toupa’n kipahthu a gen nung a, tanghou a nekna kiang uh, Tiberias khua a kipan long neuchikchik a hongtung uhi. 24Huchi in mipi’n Jesu leh a nungzuite a omta kei uh chih a theih un, amau leng longneute a tuang in, Jesu zong in Kapernaum khua a hongtung uhi.

Jesu, Hinna Tanghou

25Huan dilgala a hong muh un a kiang ah, “Rabbi, chik in ahia hiai lam n’ong tun? a chi uhi. 26Jesu’n a kiang uah, “Chihtaktak in, chihtaktak in, k’on hilh ahi, thillamdangte na muh ziak ua hon zawng na hi kei ua, tanghou phel na nekvah ziak uh ahizaw. 27An mang theiphet zawng in phiaphia kei un, himahleh an, tangtawn hinpha a om gige ding, Mihing Tapa honpiak ding zong in phezaw un; Pa Pathian in amah a chiamtehta hi,” chi in a dawng hi.

28Amau a kiang ah, “Pathian nna ka sep theihna ding un bang ahia ka hih ding uh?” a chi uhi.

29Jesu’n a kiang uah, “Pathian nasep hiai ahi, a misawl gingta le uchin” chi in a dawng hi.

30Amau a kiang ah, “Chiamtehna bang ahia na hih ding, ka muh ua nang k’on gintak theihna ding un? Thil bang ahia na hih ding? 31Van a kipan a kiang uah amau tanghou nekding a pia chih gelh bang in, Ka pipute un gamdai ah manna a ne uhi” a chi uhi.

32Jesu’n a kiang uah, “Chihtaktak in, chihtaktak in, k’on hilh ahi, Van a kipan a tanghou na muh pen uh Mosi honpiak ahi kei, ka Pa’n van a kipan tanghou tak nou a honpia hi. 33Pathian tanghou van a kipan in a hong paisuk a, khovel kiang a hinna pepa ahi” a chi hi.

34Amau “Toupa, huai tanghou honpe gige in” a chi uhi. 35Jesu’n a kiang uah, “Keimah hinna tanghou ka hi; kuapeuh ka kiang a hongpai a gilkial kei ding, kuapeuh kei hon gingta chikmah chiang in a dangtak kei ding. 36Himahleh nou n’on muh un leng n’on gingta kei uh chih k’on hilhta ve. 37Pa’n honpiak peuhmah ka kiang ah a hong paivek ding uh; kuapeuh ka kiang a hongpai ka delhkhe kei hial ding hi. 38Kei deihlam hih ding in van a kipan a hong paisuk ka hi kei a, hon sawlpa deihlam hih ding a hong paisuk ka hi zaw hi. 39Hiai pen hon sawlpa deihlam ahi, aman honpiak tengteng bangmah mangsak lou in, nitawpni chiang in kaithou zaw leng. 40Hiai pen ka Pa deihlam ahi, kuapeuh Tapa mu a gingta in tangtawn hinna a neih a, nitawpni chiang in amah ka kaithou ding” a chi hi.

41Van a kipan a tanghou hong paisuk ka hi a chih ziak in, Judate a tung ah a phun uhi. 42“Hiai mi Joseph tapa Jesu ahi ka hia, a nu leh a pa leng i theih? Van a kipan a hong paisuk ka hi bangchi chih a chi ahia?” a chi uhi.

43Jesu’n a kiang uah, “Phunphun dah un. 44Pa honsawlpan a hip kei leh kuamah ka kiang ah a hongpai theikei. Ken a hongpai mi nitawpni chiah ka kaithou ding. 45Zawlneite laibu ah Pathian hilh in a omvek ding uh, chih gelh ahi. Michih Pa thu za a thei peuhmah ka kiang ah a hongpai uhi. 46Pathian a kipan pen loungal in kuamah in Pa a mu ngeikei, aman zaw Pa a mu hi. 47Chihtaktak in, chihtaktak in k’on hilh ahi, kuapeuh a gingta in tangtawn hinna a nei hi. 48Keimah hinna tanghou ka hi. 49Na pipute un gamdai ah manna a ne ua a si uhi. 50Hiai tanghou i chih pen van a kipan a hong paisuk ahi, min a nek ua a sihlouhna ding un. 51Keimah van a kipan a tanghou hing hong paisuk ka hi, kuapeuh in hiai tanghou a nek leh tangtawn in a hing gige ding; ahi, khovel hinna dia ka piak ding tanghou ka sa ahi” a chi hi.

52Huchi in Judate a kisel ua, “Hiai min bangchi’n a sa nek ding in honpe thei ding ahia?” a chi uhi.

53Jesu’n a kiang uah, “Chihtaktak in, chihtaktak in, k’on hilh ahi, Mihing Tapa sa na nek ua, a sisan na dawnkei uleh noumau in hinna neilou hive uchin. 54Kuapeuh ka sa ne a, ka sisan dawn in tangtawn hinna a nei; huan, nitawp ni chiang in amah ka kai thou ding hi. 55Ka sa zaw an taktak ahi a, ka sisan leng dawntak taktak ahi. 56Kuapeuh ka sa ne a, ka sisan dawn mi keimah ah a om gige a, keileng amah ah ka om gige hi. 57Pa hing in honsawl a, Pa ziak a hing ka hih mah bang in, kuapeuh kei hon nete keimah ziak in amah leng a hing ding hi. 58Hiai van a kipan a tanghou hong paisuk ahi; na pipute un tanghou a ne ua, a sih bang uh zaw ahi kei; kuapeuh hiai tanghou ne tangtawn in a hing gige ding” a chi hi.

59Huai thute Kapernaum khua a kikhopnain a thuhilh lai a a gen ahi.

Ginglah Nungzuite

60Huchi in a nungzuite a khen tampi in huai a zak un, “Hiai thuhaksa ahi, kuan a ngaikhe thei dia?” a chi uhi.

61Huchi in huai thu ah a nungzuite a phun uh chih Jesu’n a lungsim in a thei a, a kiang uah, “Hiai thu in honhih lunghilou hia? 62Mihing Tapa tuma lam a a omna ngei a kahtou mu le uchin, bang na chi ding ua? 63Hinna pia zaw kha ahi a, sa zaw bangmah din a phatuam kei; na kiang ua thu ka gente kha ahi a, hinna leng ahi. 64Himahleh na lak uah a khen gingtalou om na hi uh” a chi hi. Jesu’n a gingtaloute leh a mansak dingpa a tung a kipan in a theigige ngal a. 65Huan aman, huaiziak in ahi na kiang ua, “Pa in a piak kei leh kuamah ka kiang ah a hongpai theikei” ka chih, a chi hi. 66Hiai nung in a nungzuite a khen tampi a paikik ua, amah a kithuahpih nawnta kei uhi.

Peter In Khrist Gupna

67Jesu’n sawmlehnihte kiang ah, “Nou leng paimang sam na ut uhia?” a chi hi. 68Simon Peter in, “Toupa, kua kiang ah ahia ka pai ding uh? Nangman tangtawn hinna thute na nei hi, chi in a dawng hi. 69Nangmah Pathian Mi Siangthou na hi chih ka taksangta ua, theih leng ka thei uhi” chi in a dawng hi.

70Huan Jesu’n a kiang uah, “Nou sawmlehnihte keimah hon tel hilou na hi umaw? Na lak ua mi khat Diabol a hih laitei toh” a chi hi. 71Iskariot Simon tapa Judas, sawmlehnihte lak a telsam, huai thu a gen ahi, amah zuausan a mansakpa ding ahi.

Currently Selected:

JOHAN 6: PAITBSI

Highlight

Copy