GENESIS 19

Sodom Mite Khelhdan

1Huan, angel nih, nitaklam in Sodom khua a phasuk ua; Lot Sodom khaw kulh kongkhak ah a na tu hi. Lot in amau a na mu a, va mu ding in ading a, a mai lei ah a kunsak hi. 2“Ngai un, ka toupate aw, hehpih in na sikha inn ah honglut phot unla, giak unla, na khete uh sil un. Na thoubaih ding ua, na pai nawn na ding uh” a chi hi. Himahleh amau, “Hilou e, kholak ah ka giak zaw ding uh” a chi uhi.

3Himahleh aman nakpitak in a kun a; a kiang ah a pi a, a inn ah a lutta uh. Aman meh a bawl a, tanghou silngou sohlouh a kang a, a neta uhi.

4A lup ma un khomite, Sodom khomite, veng teng a mi tengteng, a tek a khang in a inn a umkim velta uh. 5Lot kiang ah, “Tu zan a na in a honglut mite koi a om uh ahia? Amau ka luppih theihna ding un ka kiang uah hon pikhia in” a hong chi uhi.

6Lot kongkhak bul ah a kiang uah a vapawt a, kongkhak a khak hi. 7“Ka unaute aw, hehpih in, hichitelin gilou dah un. 8Ngai un, pasal luppih ngei nailou tanu nih ka nei hi. Hon hehpih unla, amau na kiang uah k’on pikhe dia, hoih na sak bang un, a tung uah na hih na ding uh. Hiai mite tung ah zaw bangmah hih mahmah kei un. Hiai ding a ka inn sung a honglut lah ahi ngal ua” a chi hi.

9Amau, “Hon hon mai in” a chi uhi. Amau mah in, “Hiai mi soplai hiai a teng ding in a hong pem lut a, vaihawmpa a om a tup vial. Tu’n amau tung a hihsang in nang tung ah ka hihse zawsem ding uh” a chi uh. Lot a bohta ua, kongkhak hihse ding in a honnaih uhi. 10Himahleh mite’n a khut uh a golhkhia ua, Lot a kiang uah inn sung ah a kailut ua, kongkhak a khak bikbek uhi. 11Kongkhak bul a mite, a lian a neu in a mit uh a tawsak ua, Huchi in kongkhak a muzou takei uhi.

Lot In Sodom A Pawtsan

12Mite’n, Lot kiang ah, “Hiai mite lou hiai ah inkuanpih dang na nei hia? Na makpapate, na tapate, na tanute leh khaw sung a na neih peuhmahte khua a kipan pikhia in. 13Toupa ma a, a kikou husa uh a thupi luattak ziak in hiai khua hihmang ding ka hi uh. Hihmang ding in Toupa’n a honsawl hi” a chi uhi.

14Lot a paikhia a, a tanute kitenpih, a makpate kiang ah a vagen hi. “Thou unla, hiai khua a kipan pawtkhia un, Toupa’n khua hihmang ding ahi” a chi hi. Himahleh a makpate ngaih in chiamnuih thu gen banglel ahi. 15Phalvak in, angelte’n, “Thou inla, na zi leh hiai a na tanu nih omte pi in. Huchilou in zaw hiai khua gawtna ah na mang tel kha ding uh” chi’n, Lot a nohta uhi. 16Himahleh a awltat mahmah lai a, Toupa’n amah a hehpih ziak in mite’n a khut leh a zi khut leh a tanu nihte khut a len ua, a pikhia ua, khaw pawlam ah a koihta uhi. 17Hichi ahi a, pawlam a, a pikhiak khit un, “Na hinna ding in taikhia in; na nunglam nga kenla, Phaizang himhim ah leng khawl ken. Huai tangsang ah suahtak san in, huchilou in zaw na mangkhawm kha ding hi” a chi uhi.

18Himahleh Lot in a kiang uah, “Ka Toupa, huaizaw hi kei hen. 19Ngai in, na sikha in na hehpihna a mu a, nang na chitna na liansak a, huai chitna, ka hinna humbit in ka tung ah na langsak hi. Huai tangsang ah zaw ka tai theikei ding, thil hoihlou khat in honpha in ka si kha ding hi. 20Ngai in, huai khua taina ding in a naipen a, khaw neuchik leng ahi. Aw, huai ah, khaw neuchik ahi ka hia! hon taisak zaw in, Huchi in ka hing ding hi” a chi hi. 21Aman, a kiang ah, “Ngai in, hiai thil tungtang ah leng k’on mang hi, na khaw gen ka hihmang dah ding. 22Kin inla, huai ah tai in. Huai mun na tun mateng lah bangmah ka hihthei ngalkei hi” a chi hi. Huaiziak in, huai khaw min Zoar chih in a omta hi.

Sodom Leh Gomorrah Hihsiatna

23Lot Zoar khua a tun in leitung ah ni a hongsuak khinta hi. 24Toupa’n Sodom leh Gomorrah khaw tung ah van a Toupa kiang a kipan mei leh kat a zusak hi. 25Huai khuate, Phaizang tengteng, khua a mite tengteng leh leitung a thil poute tengteng a hihmang vekta hi. 26Himahleh Lot zi in nunglam a enkik a chikhuam a suakta hi.

27Abraham beltak in Toupa ma a, a dinna mun ah a hohtou hi. 28Sodom leh Gomorrah kholam leh phaizang gam tengteng lam a en hi. Ngai in, huai gam a meikhu, halzulna meikhu bang mai in a khu tou ngoingoi hi. 29Hichi ahi a, Pathian in phaizang khuate a hihmanlai in Pathian in Abraham a theigige a, Lot manthatna lak a kipan a sawlkhia hi.

Moabte Leh Ammonte Kipatna

30Zoar khua a kipan Lot a paitou a, tang ah a teng a, a tanu nihte leng a kiang ah a teng uhi; Zoar khua ah lah a teng ngam kei a, amah leh a tanu nihte kawhawm ah a tengta uhi. 31Huchi in a tanu upa zaw in a nauzaw kiang ah, “I pa a upata a, khovel tengteng dan bang a hon luppih ding lei ah pasal khat leng a om nawn kei hi. 32Kisa in, i pa uain i dawnsak dia, Huchi in i pa chisuan beilou a i bawl theihna ding in a kiang ah i lum ding” a chi hi. 33Huai zan in a pa uh uain a dawnsakta uh. A upa zaw a lut a, a pa kiang ah a va lum a; aman a luplam a na phawkkei a, a thohlam leng a phawk kei hi.

34Hichi ahi a, a zing in a upa zaw in a naupang zaw kiang ah, “Ngai in, zan in ka pa kiang ah ka lum a; tu zan in leng uain i dawnsak nawn dia; nang va lut inla, i pa chisuan beilou a, i bawl theihna ding in a kiang ah valum sam in” a chi hi. 35Huai zan in leng a pa uh uain a dawnsak nawn ua; a naupang zaw a thou a, a kiang ah a valumta hi. Aman a luplam a phawk kei a, a thohlam leng a phawk kei hi. 36Huchibang in Lot tanu nihte’n a pa ua pan nau a paituak uhi. 37A upa zaw in tapa a nei a, a min Moab a sa a, huai mi tulai a Moabte suangpa ahi. 38A naupang zaw in leng tapa a nei a, a min Ben Ammi a sa a, huai mi tulai a Ammonte suangpa ahi.

Currently Selected:

GENESIS 19: PAITBSI

Highlight

Copy