GENESIS 16
16
Hagar Leh Ishmael
1Huan, Abram zi Sarai in ta himhim a neihsak kei hi. Sarai in Aigupta mi sikhanu khat a nei a, a min Hagar ahi. 2Sarai in Abram kiang ah, “Ngai dih ve, Toupa’n lah ta ka neih hon phallou a; hehpih in ka sikhanu luppih in. Amah apan tate ka neih khak leh” a chi hi. Abram in Sarai thu a zuita hi. 3Abram zi Sarai in Abram Kanan gam a kum sawm a om nung in, a sikhanu Aigupta mi a pi a, a pasal Abram kiang ah a zi ding in a pia hi. 4Hagar a luppih a; a gaita hi. A gai chih a kitheihtak in, a pi a simmawh maimah hi.
5Sarai in Abram kiang ah, “Ka thil thuak mawh nang pua in. Ka sikhanu na kawi ding in k’on pia a; a gai chih a kitheihtak in, a hon simmawh maimah hi. Toupa’n nang leh kei kikal ngaihtuah hen” a chi hi. 6Abram in Sarai kiang ah, “Ngai in, na sikhanu na khut a om ahi, nang pha na saksak a tung ah hih in,” a chi hi. Sarai in a hih gentheih mahmah tak in a taimangsanta hi.
7 Toupa angel in gamdai a tuikhuk kiang a, Sur zotna lampi a tuikhuk kiang ah a na mu hi. 8A kiang ah, “Hagar, Sarai sikhanu aw, koi apan hongpai na hia, koi a hoh dia kisa na hia?” a chi hi. Aman, “Ka pi Sarai kiang a kipan taimang ka hi” a chi hi.
9 Toupa angel in, a kiang ah, “Na pi kiang ah kiknawn inla, a thuthu in om in” a chi hi. 10Toupa angel in, a kiang ah, “Na suante simsenglouh khop hial a tam in ka pungsak ding” a chi nawn hi. 11Toupa angel mah in, a kiang ah, “Ngai in, nau na paita, tapa na nei ding a; Toupa’n na gimthuakna a zak ziak in a min Ishmael na sak ding ahi. 12Amah gam sabiltung bang ahi ding a; michih a dou ding a, michih in leng amah a dou ding uh. A unaute a kipan a tuamten ding” a chi nawn hi.
13Hagar in amah houpih Toupa min, “Nang muthei Pathian na hi” chih a sa hi. “Pathian mu a, hinglai ka hi maw?” a chi ngal a. 14Huaiziak in huai tuikhuk Beer-lahai-roi sak ahita. Ngai in, Kadesh leh Bered khaw kikal ah a om hi.
15Hagar in Abram tapa a neihsak a; Abram in a tapa, Hagar in a neihsak min Ishmael a sata hi. 16Hagar in Abram adia Ishmael a neihsak lai in Abram kum sawmgiat leh guk a upa ahi.
Currently Selected:
GENESIS 16: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
Free Reading Plans and Devotionals related to GENESIS 16
Hymn of Heaven: A 12 Day Devotional With Phil Wickham
Not Forgotten
Belonging and Mental Health
