GENESIS 12

Pathian In Abram A Sam

1Huan, Toupa’n Abram kiang ah, “Na khua a kipan leh na tanaute a kipan leh na pa inn a kipan pawt inla, k’on etsak ding gam ah pai in. 2Chi thupi mahmah in k’on bawl dia, vual ka honzawl dia, na min ka hih thupi ding. Nang vualzawlna na hi ding.

3Nang hon vualzawlte ka vualzawl dia,

hon hamsiat peuhmah ka hamsiat ding.

Nang ah lei a namchih vualzawl in

a om ding uh” a chi hi.

4 Toupa’n a kiang a, a gen bang in Abram a kuankheta a; Lot in a zui hi. Abram, Haran khua a kipan a pawtlai in kum sawmsagih leh nga a upa ahi.

5Abram in a zi Sarai leh a naupa tapa Lot leh, a thil kaihkhawm tengteng uh leh Haran khua a, a mi neih tengteng uh a pi a; Kanan gam a teng ding in a pawtta ua; Kanan gam a tungta uhi.

6Abram huai gam a Sekem mun pha in, Moreh tosaw tan in, a pai zel hi. Huailai in, Kanante huai gam ah a teng uhi. 7Toupa Abram kiang ah a kilak a, “Hiai gam na suante kiang ah ka pe ding” a chi hi. Huai ah a kiang a kilak Toupa ading in maitam a dohta hi. 8Huai a kipan Bethel suahlam a tang ah a kisuan a, huai ah a puanin a kaita hi. A tumlam ah Bethel a om a, a suahlam ah Ai khua a om hi. Huai ah Toupa ading in maitam a doh nawn a, Toupa min a lou hi. 9Abram sim gam lam zuan in a kisuan lai hi.

Aigupta Ah Abram

10Huai gam ah kial a keta a; huai gam a nak kial mahmah ziak in, Abram Aigupta gam a omtadih ding in a paisukta hi. 11Hichi ahi a, Aigupta gam lut dia a kisaklai un, a zi Sarai kiang ah, “Ngai in, numei melhoih tak na hi, chih ka thei hi. 12Huchi in hichi ahi ding a, Aiguptate’n nang a honmuh chiang un, hiai a zi ahi, a chiding ua; kei a honthat ding ua, nang a honhawi ding uhi. 13Nang ziak a hoihtak a ka om theihna ding in leh nang vanga ka hin theihna ding in, a sanggamnu ka hi, hehpih in chi zel in” a chi hi. 14Hichi ahi a, Aigupta a Abram a lut leh, Aiguptate’n numei a mu ua, a melhoih a sa mahmah uh. 15Pharo miliante’n leng a mu ua, Pharo kiang ah a hoih dan a gen uh. Huchi in, numei Pharo inn ah a pi lutta uh. 16Aman Sarai ziak in Abram hoihtak in a hih a; belamte, bawngte, sabengtungpate, sikhapate, sikhanute, sabengtungnute leh sangawngsaute a neih lohta hi. 17Toupa’n Abram zi Sarai ziak in Pharo leh a inkuante tung ah hipi khawktak a tung sak hi.

18Pharo in Abram a sam a, “Ka tung a na thilhih bangchidan a mai a? Na zi ahi chih bangdia honhilh lou na hia? Ka sanggamnu ahi, bangdia chi na hia? 19Huaiziak a kei maw, ka zi dia ka na neih hial, huaiziak in, tu’n en in, na zi, pi inla, paimang in,” a chi hi. 20Pharo in a tungthu ah mi kiang ah thu a pia a, amah a va khat a ua, a zi toh, a neih tengteng toh.

Currently Selected:

GENESIS 12: PAITBSI

Highlight

Copy