EPHESATE 6

Nu Leh Pa Leh Tate

1Naupangte aw, hiai thildik a hih ziak in Toupa ah na nu leh pate uh thumang un. 2“Na nu leh pa zahtak in” hiai thupiak chiam nei masapen ahi. 3“Huchi in nang ading in a hoih dia, lei ah leng na damsawt ding hi.”

4Huan nou pate aw, na tate uh hih thangpai kei unla, Toupa thuzohna leh hilhna ah kem zaw un.

Sikhate Leh Pute

5Sikhate aw, Khrist thumang bang in laudansiam leh lingkawm in lungtang khat in sa dan a na pute uh thumang un: 6Mihing hih kipakte maimah bang a mitmei kia venglou in, Khrist sikha bang a lungtang a Pathian deihlam hihzaw in. 7Mihing nasem phet hilou in, Toupa nasem bang zaw a chitaktak kawm a nasem in 8Michih sikha hi in noplen himahleh thil hoih a hih bangmah Toupa kiang a kipan in a ngeimah a mu nawn ding uh chih thei in.

9Nou heutute aw, huchibang in amau leh noumau heutupa van ah a om chih leh aman mi deihsak tuam a neikei chih thei in vau lou in a tung uah hih sam un.

Khristian Galvan

10A tawppen in, Toupa leh a hatna thagui ah thilhihtheihna nei in hongom un. 11Diabol zekhemnate na dou zoh theihna ding un Pathian galvan kim in kivan un. 12I doute zaw sa leh sisan ahi kei ua, lalnate leh, thuneihnate leh tu a omlel mial tung a khovel vaihawmte leh vanmunte a kha gilou hon omte ahizaw uhi. 13Huaiziak in ni hoihlou a na dou zohna ding un leh na hihzoh vek nung ua leng na din theihna ding un, Pathian galvan kim la un.

14Na kawng uh thutak a gak in, diktatna awmphaw zang in, 15Lemna Tanchinhoih vanzat na khe ua bun in ding un: 16Huaite ban ah ginna lum la unla, huai in migilou thal kuangthei tengteng na hihmit thei ding uhi. 17Huan hotdamna lukhu leh Kha namsau, Pathian thu la unla: 18Thumna leh ngetna chiteng in bangchiklai peuh in leng Kha ah thum un. Huai lam ah misiangthou tengteng ading in phatuamngai leh ngen bilbel in limsak un. 19Tanchinhoih thuguk hangsantak a theisak ding a, ka kam ka kata thu gensaka ka om theihna ding in kei ding in leng hon ngetsak un. 20Ka gen ding bang hangsantaka ka gen theihna ding in. Huai Tanchinhoih palai khainiang bun ka hi.

Chibaibukna Nanung

21Himahleh nou leng bangchibang in ka om hiam ka tanchin na theihtheihna ding un, Taikika, Toupa a unau deihtak leh nasempa muanhuai in bangkim a honthei sak ding hi. 22Huaiziak in amah na kiang uah k’on sawl ahi, ka tanchin uh na theihna ding uleh aman na lungtang uh a khamuan theihna ding in. 23Pa Pathian leh Toupa Jesu Khrist kiang a kipan lemna leh ginna tel itna unaute kiang ah om hen. 24I Toupa Jesu Khrist tullou a itte tengteng kiang ah hehpihna om hen, Amen.

Currently Selected:

EPHESATE 6: PAITBSI

Highlight

Copy