EPHESATE 3
3
Khrist A Pathian Thuguk
1Hiaiziakin kei Paul, nou Jentelte ziak a Khrist Jesu hentapa in, 2Nou ading a Pathian hehpihna nasepna piak a ka omdan na za thamta ding uhi. 3Huchi a kilakna tungtawn a Khrist thuguk ka kiang a theihsaka a omdan, tuma a tomchika ka gelh bang in. 4Huai na sim un Khrist thuguk ka theihdan na thei ding uhi. 5Tu hun a a sawltak siangthoute leh a zawlnei siangthoute kiang ah Kha theihsaka a om bang in, tuma lam in mihing tate kiang ah theihsakin a om ngeikei hi; 6Huai thuguk hiai ahi, Tanchinhoih ziak in Khrist Jesu ah, Jentelte gouluahpihte, pumpi hiangte, leh thuchiam tanpihte ahi uhi.
7A thilhihtheihna nasepdan bang a, a thawnpiak Pathian hehpihna bangzel in huai Tanchinhoih nasemtu ding a bawl ka hi. 8Kei, misiangthou tengteng a neupen sang a neuzaw kiang ah hiai hehpihna piak ahi: Khrist hauhsakna suikhiak vuallouh Jentelte kiang a gen ding in; 9Huan Pathian thil bangkim siampa a tangtawn a sel a na om, thuguk kisel bang ahia chih mi tengteng musak ding in; 10Pathian pilna chiteng van munte a kumpi vaihawmte leh thuneihnate kiang a saptuamte zang a, tu hun a theihsak a hihna ding in; 11Hiai a tangtawn thiltup dungzui a Toupa Khrist Jesu a a tup leh sepdan ahi. 12Khrist Jesu i gin ziak in amah mah ah maingalna leh hangsantaka luttheihna i nei hi. 13Huchi in noute ziak a ka gimthuak ziak in lungkelou ding in ka hon ngen hi, huaite na thupina uh ahi.
Ephesate A Ding a Paul Thumna
14Huaiziak in i Toupa Jesu Khrist Pa ma ah ka khukdin hi; 15Lei leh van a inkuan chiteng min phuahkhiakna pa, 16A thupina hauhdan bangzel a, a Kha ziak a mihing sunglam a thilhihtheihna a hihhat a a hon omsak theihna ding in, 17Huan na lungtang ua Khrist ginna a a ten theihna ding in, nou a itna a zungkai leh kingakna nei a na om theihna ding un, 18Misiangthou tengteng toh a zatdan, a saudan, a sandan, leh a thukdan theihchian theihna leh, 19Khrist itna theih phaklouh, Pathian tangchinna chiteng bang a hihdim a na om theihna ding un.
20Huan eimah a semzel thilhihtheihna bang in, i nget leh i ngaihtuah tengteng sang a thupi zawtham hihtheipa kiang ngei ah, 21Tangtawn in suan tengteng tan in, saptuamte leh Khrist Jesu ah thupina om hen, Amen.
Currently Selected:
EPHESATE 3: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
