NASEPTE 4

Upate Mai Ah Peter Leh Johan

1Huan Peter leh Johan in mite kiang a thu a genlai un, siampute, biakin heutute leh Saddukaite a kiang uh a hongtung guih ua; 2mite a sinsak uh leh Jesu ziak a misi lak a kipan thohnawnna thu a hilh ziak un a lungkimkei uhi. 3Huan a man ua nitaklam a hih ziak in a zingsang pha in suangkulh ah a khumta uhi. 4Himahleh thungaikhete a khen tampite’n a gingta ua; a tamlam uh piching ngen leng sang nga vel a ching uhi.

5A zing in a heutute uh, upate, laigelhmite, 6Siampu lianpen Ana leh Kaiapha, Johan, Alexander, siampu lianpen tanau tengtengte leng Jerusalem khua ah a omkhawm uhi. 7Peter leh Johan a lai ah a dingsak ua, “Bang thilhihtheihna in ahia, kua min in ahia hiai na hih uh?” chi in a dong uhi.

8Huchi in Peter Kha Siangthou in a dim a, a kiang uah, “Nou mipite vaihawmte leh Israel upate aw, 9hiai mi damlou tung a na hoih ka sep thu uah, hiai mi bangziak in ahia a hong damtak chi in tuin salh leh dot a om ka hi umaw; 10Nou tengteng leh Israel mi teng in leng thei hen, Kros a Nazaret Jesu Khrist na kilhden uh, Pathian in misi lak a kipan in a kaithou nawn a, amah min ngei in hiai mi hiai ah na ma uah dam in a dingta ahi.

11‘Nou inlammite aw,

na suangpaih uh, a ning a,

suang phatuampen a hong hita,

huai amah ahi a chi uhi.’

12Midang kuamah kiang ah hotdamna a omkei, van nuai a mihing sak lak ah, hon hondam ding min dang a omkei” a chi hi.

13Peter leh Johan hansan dan a muh un, laisiamlou mi leh namtom maimai ahi uh chih a theih un lamdang a sa mahmah uhi; huchi in Jesu kiang ah a omkhinta uh chih a thei uhi. 14Huan mi a hihdam uh a kiang ua ding a muh un, bangmah a gense thei tuankei uhi. 15Huchi in a vaihawmna ua pat a a paituamsak nung un, a kihou ua, 16“Hiai mite bangchi’n i hihdia? Thillamdang minthang a hih uh Jerusalem khua a om tengteng in teltak in a theita uh; en leng i sel thei tuankei hi. 17Himahleh midang kiang a a than semsem louhna ding un tunung siah kuamah kiang ah hiai min a thu a genlouhna ding un i vau ding uh” a chi uhi.

18Huchi in amau a sam ua, Jesu min a thugen hetlou ding leh hilh hetlou ding in a chi chiltel uhi. 19Himahleh Peter leh Johan in a kiang uah, “Pathian mitmuh in Pathian thuman sang in noumau thuman a dikzaw hia ngaihtuah un. 20Kou zaw ka thilmuh uh leh ka zakte uh genlou in ka om theikei uh” a chi uhi. 21Huan amau tuh a vau semsem ua, a khahta uh, mipi ziak in gawtna lemtang a mu kei uhi; a thilhih ziak un mi tengteng in Pathian a pahtawi uhi. 22Thillamdang a a hihdam uh kum sawmli sang a tamzaw ahi.

Nungzuite’n Hangsanna Ngen Uh

23Huan Peter leh Johan a pawt un amau lawmte kiang ah a vahoh ua, siampu liante leh upate’n a kiang ua a gen peuh uh a hilh vek uhi. 24Huchi in a ngaikhete’n a kituak in aw ngaihtak in Pathian kiang ah “Toupa, nang tuh van leh lei, tuipi leh asung a omte tengteng Bawlpa na hi; 25Nang Kha Siangthou in, ka pu uh na sikha David kam in, hiai thu na gen ahi:

‘Jentelte bangchi’n eita a heh uh?

Namchih in bangchi’n ahia thil phatuamlou a ngaihtuah uh?

26Khovel kumpipate ading ua,

heutute leng a kikhawm ua,

Toupa leh a Khrist kalh in,’ chi in.

27Hiai khua ah na sikha siangthou, na thaunilh Jesu tung ah, Herod leh Pontia Pilat toh, Jentelte leh Israel mite toh a kikhawmta uhi. 28Na khut leh na lungsim a hongtung ding a na sehkholh peuh hih ding in. 29Huchi in tun ah, Toupa, a honvau dan uh ngai in; na sikhate kiang ah na thu hangsantak a gen theihna pia in. 30Damsak ding a na khut na zak a, na sikha Jesu min a chiamtehnate leh thillamdangte hih ahihlai in” a chi uhi.

31Huan a thum khit un a omkhawmna uh a hongling a, avek un Kha Siangthou in a dim ua, hangsantak in Pathian thu a hilhta uhi.

Thilneihte Kikopna

32Huan a gingta mipite lungsim munkhat leh ngaihtuah munkhat in a om ua: a lak ua khat in leng a thil thilneihte, kei a tuam ahi, a chi kei ua, thil tengteng a kikop uhi. 33Sawltakte’n thilhihtheihna thupitak in Toupa Jesu thohnawn thu a hilhhilh ua; avek ua tung ah hehpihna thupitak a om hi. 34Huan a lak uah leng tasam kuamah a omkei uh; gam leh inn nei peuh in a zuak ua, a thilkhotte uh a man a hontawi uhi. 35Huan sawltakte khe bul ah a koih zel ua, amau deihdong ching hun chiat in a hawmchiat zel uhi.

36Huan Levi chi a mi khat, Kupra tuikulh a kipan, Joses, sawltakte’n Barnaba a chih uh, huai min omdan, “Khamuanna Tapa” chihna ahi. 37Hiai mi in a gam neih a zuak a, a man a hontawi a, sawltakte khebul ah a koih hi.

Currently Selected:

NASEPTE 4: PAITBSI

Highlight

Copy