MATTHAI 9

Jisu zeng rang a midam

(Mrk 2:1-12; Luk 5:17-26)

1Jisu mawlawnga â lui a, tuiryhawl va rykannin, a awmnâ kho chu a hawng tung ta. 2En raw, âzeng luka in muna â inmi rang a kyn yng hawng rozon. Khanung, Jisu yng khym dân munin, âzengmi kyn chu, “Ky Sapâ, sungdâi taknin awm raw; ny rono ngyi chu mawzawk a chang ta,” a ti. 3Khanung, en raw, lekhasuimi ngyi lu nik thumka chu yng mulung sungnin, “Pathyn rang tou a misit hi,” yng ti. 4Jisu yng mulung ryvak ngyi hoinin, “Ilom maw nyng mulung le ryvak sy nyng ryvak ai? 5‘Rono ngyi kyntâ mawzawk ny chang ta,’ â ti le, ‘thou nang, phyi le lam sê ta raw,’ ti hi, hakami maw â ti awl chem at? 6Ato khawm chang synang, khawmola Maniâ Sapâ hi rono kyntâ mawzawk thyinâ â nyi tinin nyng hoinâ rang,” a ti. Azeng kyn chu, “Ding raw, ny ponphâ lar nang, ni ina sê raw,” a ti. 7Khanung, â ding a, a ina a sê ta. 8Khanung, mipui ngyi chu hamâ rang munin, yng chi a, maniâ ngyi kyn hakhanin kut â pêkmi Pathyn rang chu yng mypâk tâk.

Matthai rang Jisu ai kou

(Mrk 2:13-17; Luk 5:27-32)

9Jisu hanântâ thyi â sê ia, choirosongnâ muna â sung luka a riming Matthai rang â mu ia, a kyn, “Kyi hawng ruzul raw,” a ti. A ding a, a va ruzul tâk. 10Hikhanin â chang a, ina bu a nêknâ kyn, en raw, choirosongmi ngyi le maniâ rono ngyi tamka yng hawng a, Jisu le a nungzui ngyi chu khylai munka yng kawppui. 11Pharisai ngyi chu hamâ ha yng mu ia, a nungzui ngyi kyn chu, “Ilom maw nyng Pumâ chu, choirosong ngyi le mi rono ngyi bylap a nêk?” yng ti. 12Imyitinung, Jisu ha a hoi kale, “A syrang ngyi tâsik chu daktawr nang mak a, imyitinung syrang makmi ngyi tâ rang chu â nang. 13Khanung chu, ‘Robol nom lounin ryngmunâ ki nom;’ ti hi, a awmzy va rysyi rou; mi dik tak ngyi rang yng na hawng kou rangnin ki hawng chang mak a, mi rono ngyi rang yng na hawng kou rangnin ki hawng tou ha,” a ti.

Bu ngyi rou tâ rythangnâ

(Mrk 2:18-22; Luk 5:33-39)

14Hanin chu Johan nungzui ngyi kyn yng hawng a, “Itâ maw kyini le Pharisai ngyi chu bu kyi ngyi sin, imyitinung ny nungzui ngyi nung ngyi sin ma ngyi?” yng ti. 15Khanung, Jisu yng kyn, “Kaizylai ngyi bylap asami a awm tenka chu, kaizylai mi ngyi te yng ryngâisy thyi at maw? Imyitinung, a lompu ro rang ha yng kyntâ lâk zo te la awm at a, hatikân te bu la ngyi yng. 16Pon muluia pon thar le mi atu khawm sukthap sin ma ngyi, asik chu a sukthapnâ mun pon chu dyu tou mebek at, dyu mitou a beknâ ryza iat. 17Mi atu khawm a kawk muluia uain thar syk sin ma ngyi, yng syk a chang nung a kawk ngyi â kyi a, uain chu a rethek a, a kawk ngyi a rysyt sin. Imyitinung uain thar chu a kawk thara tou syk â chang sin, hanung chu, khak nikân ngan a rurung sin.”

Jaira sanu le nupang luka thi rysarmi rang Jisu a midam

(Mrk 5:21-43; Luk 8:40-56)

18Hâ chawng ngyi ha yng kyn a ril lâizing kyn, en raw, luka ulyn hawngnin a hawng lau va, “Ky sanu atun â thi a; imyitinung, hawng nang, a chunga ny kut bâng nang, hawng dam nok at,” a ti. 19Khanung chu, Jisu â ding a, a bylap â sê ia, a nungzui ngyi khawm yng va ruzul seng ta. 20En raw, nupang luka kum sawm lyi nika thi rysarnin dam mak a nunga â hawng a, a ponmor a ton a; 21“A ponmor reng ngan ton nang khawm, kyi dam at,” tinin a mulung ryvak â chang. 22Khanung, Jisu a nung tyng a en a, atak rang chu â mu ia, “Ky sanu, sungdâi taknin awm raw; ny khymnâ hi ny damnâ â chang,” a ti. Khanungchu, nupang chu, hâ zo tak kyn a dam ta. 23Khanung, Jisu ulyn ina a vâ lut a, sukmul tum ngyi le mi châk ur ur a rawchawk ngyi rang va munin. 24“Sok rou; nâupang chu thi mak, ai in tou hi,” a ti. Khanung, yngni chu atak rang yng munui tâk. 25Imyitinung, mipui ngyi rang yng nyng misok zou nung a vâ lut a, a kuta a man a, nâupang chu a hawng thou ta. 26Hâ maniâ retep chu hâ ram pumpuia pheng a rethek ta.

Mitcho lu nika rang Jisu ai midam

27Jisu hanântâ thyi â sê ia, lu nika mitcho, “David Sapâ, ryng kyi na mu raw!” ti bylam mêhêtnin yng va ruzul tâk. 28Ina a lut nung, mitcho ngyi a kyn yng hawng a; hanung, Jisu yng kyn, “Himâ hi ky tho thyi tinin ky nyng khym maw?” a ti. Yngni khawm a kyn, “Kyi khym Pumâ,” yng ti. 29Khanung, atak chu yng mit a ton a, “Nyng khym kuvangnin nyng chunga tung se,” a ti. 30Khanung chu, yng mit chu yng na vâr pêk ta. Khanung, Jisu yng kyn, “Mi atu khawm yng hoi mak rang kânin rikimnin awm rang tânin,” tit yng na khap tâk. 31Imyitinung yngni chu yng sok a, hâ ram pumpuia retep yng mirethek tâk.

Bawbâ rang Jisu a midam

32Yng sok lâizing kyn, en raw, chawng ril thyi mak luka rythâ thamak man rang a kyn yng hawng roi a. 33Khanung, rythâ thamak rang a misok zou kale nung chawng ril thyi mak mi chu chawng a hawng ril ta. Khanung, mipui ngyi chu luk yng na chawp pêk ta. “Israel ngyi sunga hikhanin hi la rumu sin mak,” yng ti. 34Imyitinung, Pharisai ngyi chu, “Rythâ thamak mylal ai chang tâsiknin, rythâ thamak ngyi rang yng na misok sin,” yng ti.

Jisu mipui ngyi rang ryng yng nâ mu

35Senagok ngyi kyn Jisu yng na rysyinin, Pathyn Ram Retep thâ rilnin, dam mak tinka le rikho tinka min damnin, khopui le khotê ngyi kyn pheng a lêng ta.

36Khanung chu, mipui ngyi rang yng na munin, a myrykmi nyi lou tâ merâ ngyi kuvang rawkhawl le retheknin yng awm tâsik, luk ryng yng na mu ta. 37Khanung chu, a nungzui ngyi kyn, “Sâng ât lom te luk â tam a, imyitinung â sin lommi yng rou; 38hamâsiknin, a sâng â ât lom dep rangnin, a Pumâ kyn zawng rou,” tinin yng na ril.

Currently Selected:

MATTHAI 9: MOLSBSI

Highlight

Copy