MATTHAI 23

Pharisai ngyi le dân â hoimi ngyi kyntâ rikimnâ

(Mrk 12:38-39; Luk 11:43-46; 20:45-46)

1Jisu mipui ngyi le a nungzui ngyi kyn chawng a ril a, 2“Lekhasui ngyi le Pharisai ngyi te Mosi sungmuna tou yng sung sin a, 3hamâsiknin nyng nyng ril kipka chu tho rou, thyi zawm rou; imyitinung yng tho sin kuvang chu tho ma rou ha, ril te yng ril sin a, thonin mi tho ma ngyi. 4Munrik tak ngyi yng sym a, mi chunga yng bâng sin a, imyitinung yngni te yng kutmar kongka khawm sen rang nom ma ngyi. 5Yng kâm tho kipka chu mi a mu rang kân tou yng tho sin a, yng tharo rubun ngyi yng milawk a, yng pon mor yng mirosol a, 6pantâ bu nenâ kyn mun tha chem, Senagok sungmun â tha chem ngyi kyn, 7bâzar dung ngyi kyn lau, mi ngyi Rabbi yng nyng ti ngyi yng nâ lung pêk. 8Imyitinung nyngni chu ‘Rabbi’ ritinin nyng awm lom chang mak; nyng pumâ chu luka reng tou, nyngni pheng kân munka parol rysâ tou nyng chang. 9Khanung, nêng chunga hi atu rang khawm ‘Ky Pâ’ ti ma rou; nyng Pâ chu luka reng tou â chang, atakte ryvâna â awm. 10A moroimi ngyi ritinin awm ma rou, nyng na moroimi chu luka reng ai awm, Krista chu. 11Nyng sung atâ a rysâng chemmi chu nyng sokro rangnin mitou a awm lom â chang. 12Mi atu khawm amân tâ amân a rysâng a riti khoka rang chu mirynym chang at a, mi atu khawm amân tâ amân a rotom khoka chu mirysâng chang at.

Yng thalêmkom Jisu a mêtêk

(Mrk 12:40; Luk 11:39-42,44,52; 20:47)

13“Imyitinung, nyngni lekhasui ngyi le Pharisai thalêmkom ngyi nyng vân âsy! Ryvân ram lampui mi ngyi rang tâ nyng khap sin; nyngni lekytâ lut mak chou a, mi a lut rang lom ngyi tâ khawm lut yng na phal sin mak chou! 14“Nyngni lekhasui ngyi le Pharisai thalêmkom ngyi, nyng vân âsy! Numyi sum nyng sâk a, mi ngyi rang yng na lêm rangnin sot takka chawng nyng mychai sin; hamâsiknin dikmaknin dyu nyng na ryman at,” ti â chang.

15Nyngni lekhasui ngyi le Pharisai thalêmkom ngyi, nyng vân âsy! Luka rang nyng duk thun rangnin ngan tuipui le khawmol nyng rêvêl sin, hanung, hakhanin a hawng awm kale, atak rang ha nyngni nêknin alyi inika rang Gehena Sapâ nyng sym sin!

16“Aw nyngni, a moroimi mitcho ngyi! ‘Mi atu khawm Pathyn byk in chingnin samâi â ton kipka, hamâ chu i chang mak; mi atu khawm Pathyn byk ina rângkychak chingnin samâi â ton kipka chu a miroso lom â chang,’ â ti ngyi, nyng vân âsy! 17Nyngni molmawng mitcho ngyi! Hakami maw â lung ai, rângkychak maw, Pathyn byk in, rângkychak rang a mirythyngmi? 18Khanung, ‘Mi atu khawm mâichâm chingnin samâi â ton kipka i chang mak; imyitinung a chunga awm tharo mylân chingnin samâi â ton kipka tâ chu a roso lom â chang,’ nyng ti. 19Nyngni mitcho ngyi hakami maw â lung chem, tharopêk maw, mâichâm, tharopêk a mirythyngmi ha? 20Khanung chu, mi atu khawm mâichâm chingnin samâi â ton khoka chu mâichâm le a chunga â awm tenka chingnin samâi a ton sin. 21Mi atu khawm Pathyn byk in chingnin samâi â ton khoka chu, Pathyn sungmun le a sunga â awm ngyi rang chingnin samâi a ton sin. 22Mi atu khawm ryvân chingnin samâi a ton nung, Pathyn sungmun le a chunga â sung rang chingnin samâi a ton sin. 23Nyngni lekhasui ngyi le Pharisai, thalêmkom ngyi, nyng vân âsy! Pudina, mohuri, zira ngyi chu sawm kyntâ khatka nyng pêk sin a, dân chawng â nang midiknâ, ryngrumunâ, khymawmnâ ngyi chu milung sin mak chou, imyitinung, hangyi tou ha nyng tho lom ngyi, a dang ngyi rang mekel lêm lounin. 24Nyngni a moroimi mitcho,

Tangsâm rang sakênin Makingkang rang a mawlawn sin ngyi!

25“Lekhasui ngyi le Pharisai thalêmkom ngyi, nyng vân âsy! Ruhum le khêng a pên tyngtâ nyng milang a, imyitinung a sung tyng chu muruknâ le rikim maknânin tou âbit. 26Nyngma Pharisai mitcho, ruhum le khêng a sung tyng mi lam mânsâ rusu raw, a pên tyng khawm a lang thyi rang kânin.

27“Lekhasui ngyi le Pharisai thalêmkom ngyi, nyng vân âsy! Thân phum lung ngou takka, a pên tyng rooi taknin ai rylang kuvang, a sung tyng lekytâ âthi ru ngyi le a repek tinka le ai bit kuvang ngyi tou nyng chang. 28Nyngni khawm hamâ kuvangnin, a pên tyngtâ chu maniâ mit munânin dik taknin yng na rylang sin a, imyitinung nyng sung tyngnin chu thalêmkom le âsy tou bitnin nyng awm.

Ron yng tawng lom a khâla mopongnâ

(Luk 11:47-51)

29“Nyngni lekhasui ngyi le Pharisai thalêmkom ngyi, nyng vân âsy! Zawlnyi ngyi thân in nyng sym a, maniâ thâ thân ngyi khawm nyng miryou a, 30‘Kyi rubul ngyi yng dam lâi ha awm tar nang khawm, zawlnyi ngyi thisen yng milongnâ kyn chu rechel nâ nung,’ nyng ti sin. 31Khanung chu, zawlnyi ngyi rang â thatmi ngyi synâu nyng chang tinin nyng riril â chang. 32Nyng rubul ngyi kâmtho roso mak chu nyngni miroso ta rou. 33Murul ngyi, murul rui ngyi, Gehena roubonâ kyntâ chu hakhanin maw kel thyi ta nyng? 34“En rou, hamâsiknin tou nyng zawlnyi ngyi rang, mising ngyi rang, lekhasuimi ngyi rang yng na hawng dep ket; atu rang mychang chu that nyng a, kros kyn mykhâi nyng, atu rang mychang Senagok ngyi kyn mevun rui le yng na hêm nyng a, kho tina thyi yng na ron nyng; 35hanung chu, Abel maniâ tha tak thisen kyntâ, Pathyn byk in le mâichâm rykâra, Barakia sapâ Zarakia nyng thatmi thisen tenka ha, nêng chunga midik thisen yng milong kipka chu, nyng chunga a la hawng tung thyi. 36Chawngtaktênin nyng na ki ril hi, hangyi kipka chu hi atuntâ kusung ngyi chunga la hawng tung thyi at.

Jisu Jerusalem rang a mawawl

(Luk 13:34-35)

37“Aw Jerusalem, Jerusalem zawlnyi ngyi rang â thatmi, ny kyn dep âchang ngyi rang lung le thênnin â thatmi, ârpuinu a tê ngyi rang a rythâ noia yng nai awp kuvangnin, ny nâu ngyi rang hazik vawika maw yng na awp rang ky rawthawk ha. Imyitinung, nom mak chou. 38En rou, nyng in chu a rawngnin tou mâk a chang ta. 39Nyng na ki ril hi, ‘Pumâ rimingnin â hawngmi chu mypâknin ai awm chang se,’ nyng ti mak tenka chu harawkhra kyi mu nok khâina chynyu,” a ti.

Currently Selected:

MATTHAI 23: MOLSBSI

Highlight

Copy