LUK 9

Jisu lu sawm lyi nika ngyi rang yng nai dep

(Mtt 10:5-15; Mrk 6:7-13)

1Lu sawm lyi nika ngyi rang munkân yng na kou a, rythâ thamak tinka ngyi chunga kutnyinâ le chuknâ, dam mak midam rang tânin yng na dep tâk. 2Khanung chu Pathyn ram chawng ril rangnin le rikhonyi ngyi rang yng na min dam rangnin yng na dep tâk. 3Yng kyn, “Nyng pêtnâ lampuia lâthâ, sawlâ, bai, sum i rawkawl ma rou; pâk nika tenka kanchili khawm rawkawl chang mar se. 4Nyng tungnâ ina, ngan pat awm ta rou, nyng sok tikân khawm ha in atâ sêk nyng sok rang kân. 5Nyng na lawm makmi ngyika chu hâ kho kyntâ nyng sok tikân yngni rang yng na mihoinâ rangnin nyng phyi myzâ kyntâ philphut chu thiknin ma rou,” a ti. 6Khanung chu, yng sê ta, a kho a kho yng lêng a, mun tinka kyn Pathyn chawng yng ril a, dam mak khawm thyi yng nyng min dam.

Herod mulung chukrypak

(Mtt 14:1-12; Mrk 6:14-29)

7Mylal Herod a kâm tho tinka chu a hoi ta; atu tu mychang Johan ha âthi kyntâ a hawng thou nok ta, yng ti. 8Atu tu mychang, “Elija ai hawng rylang tou tâk hi,” yng ti tâsiknin a mulung a chukrypak ta. 9Herod chu, “Johan lu te ky tan ta ha; imyitinung hikhanin hi ai chang ki hoi sin hi atu maw ai?” a ti. Khanung chu, atak rang mu rang a rawthawk tâk.

Jisu sasi ryngâka ngyi rang a mikhawp

(Mtt 14:13-21; Mrk 6:30-44; Jhn 6:1-14)

10A nungzui ngyi yng hawng kir nok nung, a kyn yng kâmtho ngyi yng hawng ril. Atak chu yngni rang yng na hoinin Bethsaida kho yng ti kyn a chawrainin a sê ta. 11Imyitinung mipui ngyi hamâ yng hoi a pylat yng ruzul tâk a, hanung, atak chu yngni rang yng na hai lawm a, Pathyn ram retep yng na ril a, dam rang â nang khoka rang chu yng na midam tâk.

12Khylou a hawng chang tyng tâk nung, lu sawm lyi nika ngyi yng hawng a, a kyn, “Yi kol atâ kho ngyi le lou ngyi kyn sênin, tungnâ le nêk sâk yng man thyi rang kânin hi mipui ngyi rang yng na dep ta raw; asik chu hi ram hi awm maknâ mun â chang hi,” yng ti. 13Imyitinung atak chu yng kyn, “Nyngni lam nêk sâk yng na pe rou,” a ti. Yngni chu, “Hingyi pheng tâsik nêk sâk kyi va rochok mak nung chu, bai lep ryngâka le pum nika ngâ reng chang lou chu i ngan nyi mung,” yng ti. 14Asik chu (ulyn hawl ngan sasi ryngâka kuvang yng chang.) Khanung a nungzui ngyi rang, “Lu sawm ryngâ lu sawm ryngâ kân a tâng a tângnin yng na misung rou,” a ti. 15Hakhanin pheng rang yng nyng min sung tâk. 16Baitêp têp ryngâka le ngâ pum nika rang a lâk a, ryvân tyng rawdawnnin bor a pêk a, a kham a, mipui ngyi kyn sem rang tânin a nungzui ngyi kyn a pêk tâk. 17Yng sâk nung, pheng yng na khawp ta, hanung, yng sâknâ bân adinawi ngyi ha rutnin tapawng sawm lyi nika a lâ bit.

Peter Jisu a changnâ a mopong

(Mtt 16:13-19; Mrk 8:27-29)

18Vawika hikhanin â chang a, Jisu amân dyk chawng a mychainâ kyn a nungzui ngyi a bylap yng awm a; yng kyn, “Mi ngyi atu maw â chang ky iyng bê?” tinin yng na rythang. 19Yng ti chu, “Baptisma â pemi Johan ni chang yng ti; imyitinung atu tu mychang Elija, atu tu mychang nung Zawlnyi mului ngyi sung atâ luka ai hawng thou nok tâk yng ti,” tinin yng ril. 20Atak chu yng kyn, “Khanung, nyngni te atu maw ky nyng bê?” a ti. Khanung, Peter chu, “Krista Pathyn ni chang,” tinin a ril tâk.

Jisu a tor rang le a thi rang a ril

(Mtt 16:20-28; Mrk 8:30; 9:1)

21Hâ chawng chu atu rang khawm ril mak rang tânin rikimnâ chawng a pêk; 22“Maniâ Sapâ hi tamka a tor lom â awm a, ulyn ngyi, awchai ulyn ngyi, lekhasuimi ngyi pawm lounin la awm at, that la chang at, ni thum ni kyn nung a la thou rang â chang,” a ti.

23Atak sêk mi awm tenka kyn, “Mi atu khawm ky nung zui rang â nom khoka chu atak rang rinilnin, nitin a Kros ruputnin kai zui chang se. 24Mi atu khawm amân tâ amân rurung rang â ti khoka chu sal at a; imyitinung kyima tâsik a rypai khoka chu rurung at. 25Maniâ khawmol pumpui mannin khawm a nun chem salnin la rymang ta synang atak tâsiknin imaw a lungnâ â awm? 26Mi atu khawm kyima tâ le ky chawng tâ kâ zakpui khoka chu, Maniâ Sapâ a roulynnâ le, a Pâ roulynnâ le, a ryvânpilâi rythyng ngyi roulynnâ le a hawng tika chu hamâ chu hawng zakpui at. 27Dik taknin nyng na ki ril hi, hinân â ding ngyi atu mychang ngyi hi Pathyn ram yng mu mak tenka chu thinâ dep retem nâ ni ngyi,” a ti.

Mêl rethengnâ

(Mtt 17:1-8; Mrk 9:2-8)

28Hikhanin hi â chang a, hi chawng ngyi ai ril zou tâ ni rytka deng nung, Jisu chu Peter, Johan, Jakob ngyi rang yng na roinin chawngmychai rangnin tânga a vâ lui. 29Khanung chawng a mychainâ kyn nung a mêl awm dân a hawng dang a, ai sil ngyi tenka khawm a hawng ngou a, mit rêêl rak kân a awm ta. 30Khanung, en raw, lu nika maniâ atak le yng rosonpui a, hangyi ha Mosi le Elija yng chang; 31Rysângnâ le rawthawmnin yng rylang a, Jerusalem kyntâ a thinâ le a rytannâ chawng yng roson.

32Imyitinung Peter le a champui ngyi yng in rumu a sê ta ia; imyitinung yng hawng sang kale nung a rysângnâ le a bylap lu nika â ding ngyi rang khawm yng nyng mu ta. 33Hikhanin hi â chang a, hâ maniâ ngyi ha Jisu kyntâ yng tyinâ rang kyn Peter chu Jisu kyn, “Pumâ, yini tâsiknin hinân yi awm hi â tha; pâk thumka thâmtê sym kyi a, nyngma tâsik pâkka, Mosi tâsik pâkka, Elija tâsik pâkka,” a ti, imaw a ril ngan hoi mak. 34Hâ chawng a rilnâ kyn rozing â hawng a, yngni rang yng na hawng mukhup tâk; hâ rozinga yng lutnâ kyn chu yng chi ta. 35Khanung, rozing sung atâ chawng a hawng sok a, “Himâ hi ky Sapâ, ki zen sai â chang a chawng ryngâi rou,” a ti. 36Chawng a mawng kale chu Jisu rang a mân reng yng mu tâk. Khanung, siring yng chang a, hanântâ yng tharo mu chu atu rang khawm i ril ma ngyi.

Rythâ thamak lut nâupang rang Jisu a midam

(Mtt 17:14-18; Mrk 9:14-27)

37Aninok tyng tâng atâ yng hawng chum nung mipui tamka yng va rawtawngpui. 38Khanung, en raw, mipui bil atâ luka mawrawngnin, “Pumâ, ky sapâ rang en rang tâ nyng ki u hi, sapâ luka dyk ki nyi â chang. 39En raw, rythâ thamak a man sin nung, vawikazawk a mêhêt sin; a michil mohon ngyi chul rak kânin a ron sin, sadim kân mirymangnin a mâk sin. 40Ny nungzui ngyi rang misoknin um rang tâsik yng na ky rep a; imyitinung thyi ma ngyi,” a ti. 41Khanung, Jisu chu, “Hi kusungthar atâ khym bou a rymang lom ngyi hazika maw awmnin, nyng na la ryvak thyi ket? Ny sapâ rang hinân hawng roi raw,” tinin a ril. 42Khanung, a hawngnâ kyn rythâ thamak chu atak rang a man a, sadim kân mehernin a tet tâk. Imyitinung Jisu chu rythâ rono rang a hal a, hâ nâupang rang a midam a, a pâ kyn a dep nok tâk. 43Khanung pheng ngan Pathyn roulynnâ chu luk yng na chawp pêk ta.

Jisu a thi rang tâ chawng a ril nok

(Mtt 17:22-23; Mrk 9:30-32)

Khanung chu mi awm tenka pheng a kâmtho tinka yng na chawp pêk lâi tak kyn, Jisu a nungzui ngyi kyn, 44“Hâ chawng chu nyng nâ kyn ai lut chang se; asik chu Maniâ Sapâ hi maniâ ngyi kuta mylân chang at,” a ti. 45Imyitinung a chawngril hi i hoi thyi ma ngyi a, yng hoi thyi mak rang kân a thup a, hâ a chawngril retep atak rang rythang ngam ma ngyi rêk.

Atu maw a rysângchem

(Mtt 18:1-15; Mrk 9:33-37)

46“Yng bil atâ atu maw rysâng chem at?” tinin yngni le yngni rykhalnâ yng nyi a. 47Khanung, Jisu chu yng mulung ryvak dân hoinin, nâupangtê rang a kâi a, a dema a miding a, 48yng kyn, “Mi atu khawm ki riming tâsiknin hi nâupangtê rang hi â lawm khoka chu kyima rang ky iyng lawm chang at; mi atu khawm kyima rang â lawm khoka chu kâ depmi rang yng lawm chang at; nyng bil atâ âtom chemmi hi, a rysângchem â chang,” a ti.

Nyng na rydoupui makmi chu nyng khakmi â chang

(Mrk 9:38-40)

49Johan chu, “Pumâ, mi luka ni rimingnin rythâ thamak ngyi rang misoknin ai um kyi mu, kyi bylap â zuimi chang mak siknin kyi khap tâk ha,” tinin a ril. 50Imyitinung Jisu chu a kyn, “Khap ma rou, atu khawm nyngni rang nyng na khâl makmi chu nyng khakmi â chang,” a ti.

Samari kho khatka Jisu rang pawm mak

51Hikhanin hi â chang a, atak rang chungtyng roi rang zo atuk kale nung, Jerusalem sê rang tâ rawthawknin â ngat a, 52a mâna pilâi ngyi rang yng na dep a; hanung chu yng sê ia, atak tâsik hai va rotok rangnin Samari mi ngyi kho khatka kyn yng vâ lut. 53Khanung, Jerusalem tyng mâi ai sak tâsiknin mi ngyi atak rang hai pawm khâi ma ngyi. 54Khanung chu a nungzui Jakob le Johan chu hamâ ha munin, “Pumâ, hi ngyi hi pheng yng na kâng rang kân ryvân atâ myi muchum nang ni nom maw?” yng va ti.

55Imyitinung atak chu yng tyng â ngat a, yng na hal tâk. 56Khanung, kho danga yng sê ta.

Jisu rang ruzul rang â nom ngyi

(Mtt 8:19-22)

57Lampui danga lam yng sêna kyn atu mychang luka a kyn, “Ny sêna khoka kyn nyng hawng ruzul ket,” a ti. 58Jisu chu a kyn, “Sial ngyi te khur yng nyi, chungrêl vâ ngyi khawm rubu yng nyi; imyitinung Maniâ Sapâ chu a lu tetnâ rang ngan mun nyi mak,” a ti. 59Khanung, a dang luka rang, “Kyi ruzul raw,” a ti. Imyitinung atak chu, “Pumâ, mânsâ sênin ky pâ rang kyi la va miphum raw,” a ti. 60Imyitinung Jisu chu a kyn, “Athi le âthi ruphum ngyi se; imyitinung nyngma chu Pathyn ram chawng lam va ril ta raw,” a ti. 61Hanung luka khawm, “Pumâ, nyng ruzul ket; imyitinung mânsânin ki in mi ngyi le rytyinâ kyi la va minyi raw,” a ti. 62Imyitinung Jisu chu a kyn, “Mi atu khawm langkhyn mannin a nung tyng â enmi chu Pathyn ram tâsik chu chuk mak,” a ti.

Currently Selected:

LUK 9: MOLSBSI

Highlight

Copy