TULSIN 23

1Paul chu roubomi ngyi tyng a en a, “Sokpui ngyi, avyni tenka Pathyn makunga âtha ki hoi kipka chu thonin ky lâ awm sin,” a ti.

2Awchai ulynchem Anania chu Paul dema â ding ngyi rang a mura bên rangnin yng na rep. 3Paul chu a kyn, “Nyngma lungbang rawng ruphul ngoupâ, nyngma mi rang tou Pathyn nyng la bên at; nyngma te Dân kânin kyi bo rangnin ni sung a, Dân kân chang lounin kyima mi kyi bên rangnin ny rawthawk maw?” a ti. 4A dem atâ mi ngyi, “Pathyn Awchai Ulynchem rang tou ny hal ngam dy?” yng ti. 5Paul chu, “Sokpui ngyi Awchai Ulynchem â chang tinin hoi ming ha; ‘Nu rui ngyi ulyn chunga chawng tha mak ril ma raw,’ tinin khawm sui â chang,” a ti.

6Paul chu lawkka Saddukai, lawkka Pharisai yng chang tinin a hoi kale nung roubo ngyi kyn a mêhêt a, “Sokpui ngyi, Pharisai ki chang, Pharisai sapâ khawm ki chang; âthi kyntâ thounoknâ khymnâ chawngnin roubo ki chang hi,” a ti.

7Khanung, hamâ a ril zou nung Saddukai ngyi le Pharisai ngyi yng rykhal ta, roubo ngyi chu mâitem yng chang ta. 8Saddukai ngyi a chang ta, “Athi thounoknâ siring khym ma ngyi, ryvânpilâi, rythâ awm rang i khym ma ngyi, imyitinung, Pharisai ngyi chu hangyi pheng yng khym. 9Luk yng na rawkhawl ta, Pharisai ngyi tyng tâ lekhasui ngyi bakka yng ding a, chawng yng mykhal a, “Himâ hi a dik maknâ i hoi mung; rythâ khawm ryvânpilâi khawm byk tar synang imaw a rysytnâ?” yng ti. 10Yng na rawkhawlnâ a hawng rysâng kale, Paul rang abawng abawngnin yng thêr thyi tinin, â chipui a, sipai ulyn, a sipai ngyi rang sênin mipui ngyi bil kyntâ râkal va dawnnin in rukula va syk rangnin yng na rep tâk.

11Hâ zâna Pumâ chu Paul dema â ding a, “Sungdâi taknin awm raw, Jerusalem kho kyn ky chawng ni ril kuvangnin Rom kho kyn khawm ni ril lom chang at,” a ti.

Paul rang that rang tâ yng rawthawk

12Zinga a vâr kale nung, Juda ngyi mulung munka changnin Paul rang yng that thyi mak tenka chu i ne rang sa mak rangnin samâi yng ton ta. 13Hâ samâi â ton ngyi chu sawm milika nêknin yng tam. 14Yngni ngyi chu awchai ulyn ngyi le ulyn ngyi kyn yng sê ia, “Paul rang kyi that mak tenka chu i ne mak sa mak rang tânin samâi kyi ton zou ta. 15Hamâsiknin hanungzika âtha kân rythang rang kuvangnin, sipai ulynchem Paul rang nyng kyn a hawng roi rang kânin zawng rou; kyini chu a dema a hawng tung mâna ngan hai that rangnin rawthawknin hai awm kyi,” yng ti.

16Imyitinung, Paul sarnu sapâ chu lampuia yng hai morong tinin a hoi kale, in rukula a vâ lut a, Paul rang a va ril tâk. 17Paul chu sipai lu ryzâka chunga ulyn luka rang a kou a, “Hi tangval rang mylal ulynchem kyn roi raw; a kyn imychang chawng ril lom â nyi chang at,” a ti. 18Hanung, sipai ulynchem kyn a roi a, “Paul, jil a rukhummi ka kou a, hi tangval rang hi ny kyn hawng roi rangnin ka merep a, ny kyn i i mychang chawng nang ril lom â nyi val,” a ti a.

19Sipai ulynchem chu a kuta a man a, a dang tyng â sêpui a, a ruthupnin, “Imaw kyi ril rang ni nyi chu?” tinin a rythang tâk.

20Khanung, atak chu, “Paul retep chu sadim kân ryvak nok rangnin thâituka roubo ngyi kyn roi rangnin Juda ngyi ny kyntâ zawng rangnin yng rawthawk ta. 21Imyitinung, yng chawng hai ryngâi ma raw; yng sunga mi sawm milika nêk â tam morong bylamnin yng awm a, hangyi ha atak rang yng that mak tenka i ne lou sa lou rangnin samâi yng ton zou ta; atun kyn ny chawng ngâknin rawthawk sainin yng awm ta,” a ti.

22Sipai ulynchem chu hâ tangval rang a dep a, “Hi chawng hi ki ni ril ta tinin atu rang khawm mihoi ma raw,” nget taknin a ril tâk.

Ram Awpmi Felik kyn Paul rang a ruthupnin yng roi

23Sipai lu ryzâka chunga ulyn lu nika a kou a, “Zân thuk takka kyn Kaisari tenka sê rangnin sipai ryza nika, sakawr chung luimi sawm sirika, syi â lek ryza nika ngyi le rawthawk rou,” yng na ti a; 24hanung, Ram Awpmi Felik kyn damnin yng mitung thyi rang kân, Paul a luinâ rang khawm rotok rangnin yng na rep a. 25Hikhanin lekhâ a sui a:

26“Klaudia Lusian Felik, Ram Awpmi tha chem chibai na buk. 27Himâ rang hi Juda ngyi yng man a, that rang yng rawthawknâ kyn sipai ngyi rang roinin ki sê ia, Rom mi â chang tinin ki hoi a, ky va chang a. 28A dik maknâ yng mu hoi rang ki nom siknin yng roubonâ kyn ky roi tâk. 29Hamâsiknin yng dân kânin a dik maknâ yng munâ rythangnin ki hoi chu, a thinâ rang le jila rukhum rang kânin chu a dik maknâ i mu ming. 30Juda ngyi atak rang yng morong tinin mi ngyi ky iyng ril kale nung ny kyn atak rang ky hawng dep tâk, a dik maknâ â mu ngyi khawm a chunga atinka ril rang â nom khoka chu ny kyn ril rangnin khawm ki ril ta,” a ti.

31Sipai ngyi chu yng nai rep kânin Paul rang hâ zâna ngan yng roi a, Antipatri kyn yng tung pui a. 32Aninoka nung sakawr chung lui ngyi chu a bylap pylat sê rangnin yng kir a, in rukula mi yng kir nok ta; 33yngni chu Kaisari kyn yng tung a, Ram Awpmi kyn lekhâ yng pêk a, Paul rang khawm a makunga yng miding a. 34Ram Awpmi chu a pawrê zou nung Paul awmnâ ram a rythang a; Kilikia ram kyntâ maniâ â chang tinin a hoi kale, 35“Diklounin na rêsêl ngyi yng hawng tung tikân ny chawng chu ryngâi ket,” a ti. Hanung, Herod ina myryk rangnin chawng a pêk a.

Currently Selected:

TULSIN 23: MOLSBSI

Highlight

Copy