मरकुस 9
9
1फिन आस चेलारिन इदन हूँ बाचस, “ऎन ओन्टा मुदे कत्थन निमन ब'अदन, अक्कुन इसन इज्जका आलर ती जोक्क आलर, धर्मेस सवंग ती राजी नन्नन बिगर ईरका मल खे'ओर।”
येसुसी ऎथ्रना बदलारा
(मत्ता 17:1-13; लूक 9:28-36)
2छे उल्ला ही ख़ॊख़ा येसुस पतरस अरा याकॊब अरा यॊहनसिन तंग्है गने ओन्टा मेच्छा परता मइय्याँ होच्चस। असन आर तामलेका रहचर, आ बारी आर ही मुन्दहारे आसी ऎथ्रना बदलारा केरा।#2पत 1:17,18 3आसी किचरी नगदे पंडरु बिल्चा हेलरा, अरा एन्ने कोड़हे पंडरु मंजा का ख़ॆख़ेल नू एकअम धोबियस हूँ एन्ने कोड़हे पंडरु नॊड़ा पोल्लोस। 4आर गे चिरान ता ऎंड़ धर्मेसी कत्था तिंगुर मूसस अरा एलियस ऎथ्रर। आर दुयो झन येसुस गने कछनख्र'आ हेलरर।
5एगघड़ी ख़ॊख़ा पतरस येसुसिन बाचस, “अना गुरु! नमा इसन र'अना नगदे बॆस र'ई। ख़ने एमा तीन गोटंग कुम्बा कम'आ गे चि'आ, ओन्टा निंगा, ओन्टा मूसस गे, ओन्टा एलियस गे।” 6एन्देरगेका आर नगदे इल्चियर केरर, पतरस एन्देर ब'अना र'ई अदिन बल्लालियस।
7ख़ने ओन्टा बदाली आरिन कुल्लिया चिच्चा, अरा बदाली ती धर्मे बबस अबड़ा चेलारिन बाचस, “ईस एंग्है चोन्हा ख़द्दस, ख़ने ईसहीन मेना।”#मत्ता 3:17; मर 1:11; लूक 3:22
8तहाँ अबड़ा चेलर ओनबेंड़र'आ ईरियर, आ बारी आचका ईरियर ख़ने असन येसुस लेका रहचस, मूसस अरा एलियस मल रहचर।
यॊहन नॊड़रत'उस लेक्खा मसीस हूँ सतार'ओस
9आर परता ती एत्तालियर, आ बारी येसुस आरिन आनियस का, “मनवा ख़द्दन ऎन केचका ती उज्जा चो'अना गूटी, नीम इसन एन्द्रा ईरकर अदिन नॆकन हूँ अमके तेंगा।” 10ख़ने आर ई कत्थन सुरता उइय्यर, लिकिन आर ताम घड़ी घड़ी मेंजनखरर, केचका ती उज्जा चो'अना ही माने एन्देर मनी?
11ख़ने आर आसिन मेंजर, “एन्देरगे नॆग सिखाब'उर ब'अनर का मसीसी ख़ॆख़ेल नू बरना ती मुन्द एलियस गे अउरिम बरना र'ई?”#मला 4:5; मत्ता 11:14
12-13येसुस आरिन बाचस, “ईद मानिम का एलियस मुन्द बर'ओस ती एंगन परिघ'आ गे आलारिन सपड़'ओस। एलियस#9:12-13 अउरिम बरना एलियस यॊहन नूड़ुस दिम हवे। इदन मत्ता 17:13 ती नाम अख़दत। बरचकादस, धर्मेसी कत्था तिंगुर आसी पत्त नू तिंका लेक्खा नम्है मुद्ध आलर आसिन एकासे नना बिद्दियर अन्ने आसिन सताबाचर। लिकिन सोच'आ का मनवा ख़द्दन एंगा पत्त नू धर्मेसी कत्था तिंगुर एन्देर लिखचर। ऎन नगदे दुक्खे चॊद'ओन अरा आलर एंगन दुस'ओर।”
येसुस मलदौ बॊलता धरचका ख़द्दासिन कोड़े नन्दस
(मत्ता 17:14-20; लूक 9:37-43)
14इकला येसुस अरा आसी तिनियों चेलर आसी नन्ना चेलर गुसन किर्रिम बिच्चियर, ख़ने आर ईरियर का आर ही ओनबेंड़र'आ कोहाँ गोंहड़ा ख़ूँड़रकी र'ई, अरा जोक्को नॆग सिखाब'उर आर ही गने आनानखर'आ लगियर। 15येसुसिन उर्मी गोंहड़ा ईरिया ख़ने, अबड़ा आलर नगदे अकबकरर, औंगे आसी गुसन बोंगर ती मोंजरा नंजर।
16आस अबड़ा चेलारिन मेंजस, “नीम ईर गने एन्देर आनानखर'आ लगदर?”
17गोंहड़ा ती ओर्तोस बाचस, “अना गुरु! ऎन एंग्दासिन निंग्है गुसन ओन्द्रकन का आसिन नीन कोड़े नना ओंगोय। आस मइय्याँ ओन्टा मलदौ बॊलता समसार'ई। आद आसिन कछनख्र'आ मल चि'ई। 18आद आसिन इकलअम धर'ई, होले आद असानिम ख़ॆख़ेल नू पखिड़'ई, अरा आस बई ती बोट्टो ओथ्रदस, अरा पल्लन चब्र'अरकी टनटनरदस। ऎन निंग्है चेलारिन ई मलदौ बॊलतन ओथ्र'आ गे बाचकन, लिकिन आर ओथ्र'आ गे पोल्लर।”
19ख़ने येसुस अबड़ा आलारिन आनाकिर्त'अर आनियस, “अना मल पत्त'ऊ आलारो, ऎन इकला गूटी निम्है गने र'ओन?, ऎन ऎ उल्ला गूटी निम्है गने सह'ओन? आ कुक्कोसिन एंग्है गुसन ओन्द्र'आ।”
20ख़ने आर कुक्कोसिन आसी गुसन ओन्द्रर। आ बॊलता येसुसिन ईरिया ख़ने, ख़द्दासिन दरका नंजा अरा आस ख़ॆख़ेल नू खत्तरस। आस लोट्टरस अरा आसी बई ती बोट्टो उरखा।
21येसुस ख़द्दासी तम्बासिन मेंजस, “ईस एवन्दा उल्ला ती एन्ने मन्दस?” आस किर्त'अर बाचस, “ओन सन्नी ती एन्ने मन्दस। 22तहाँ आद आसिन पिटा गे घड़ी घड़ी चिच्ची नू महले अम्मु नू हूँ टिड्डा, लिकिन नीन एमा गे इन्द्रिइम नना ओंग्दय होले, एम्है मइय्याँ सोग्गे ऎरा अरा सहाड़ा नना।”
23ख़ने येसुस आसिन बाचस, “‘नीन नना ओंग्दय होले’ एन्ने अमा ब'आ, एन्देरगेका एंगन पत्त'ऊ आलर गे ऎन इन्द्रिइम नना ओंग्दन।” 24लॆम आ कुक्कोसी तम्बस चिच्चियारनुम बाचस, “ऎन पत्त'अदन का नीन एंगन सहाड़ा नना ओंग्दय, एंग्है पत्त'अनन अउरिम बड़ियर मना गे सहाड़ा नना।”
25गोंहड़ा ही असन बोंग ख़ॊंड़रनन येसुस ईरियस। ख़ने आस एन्ने बाचस ती मलदौ बॊलतन खखवाचस, “अनय कुन्दी अरा बैरी ननू बॊलता ऎन निंगन पॆसदन, ईसी मइय्याँ ती उरखय बरय, अरा इकला हूँ ईसी मइय्याँ अमके कोर'आ।”
26ख़ने आ बॊलता चिच्चियारा अरा कुक्कोसिन नगदे मुरकुटचा अरा आसिन ती उरखा बरचा। अरा आस केचका लेक्खा मंजस केरस। ख़ने असला बग्गे आलर एन्ने बाचर का ईस गा केच्चस केरस। 27लिकिन येसुस आसिन ख़ेक्खन धर'अरकी चॊदस। ख़ने आ कुक्कोस इज्जस केरस।
28फिन येसुस अरा आसी चेलर ताम लेका एड़पा नू रहचर, ख़ने चेलर आसिन मेंजर, “ऎम आ मलदौ बॊलतन एन्देरगे ओथ्र'आ पोलकम?”
29येसुस आरिन बाचस, “नीम ई मदहे मलदौ बॊलतन बिन्ती [अरा उपास] ती लेका ओथ्र'आ ओंगोर।”
येसुस तंग्है खे'अना ही पत्त नू फिन मुन्द तेंगदस
(मत्ता 17:22,23; लूक 9:43-45)
30फिन येसुस अरा आसी चेलर असलेक ती केरर, ती गलिलेया जिला मन्नुम कालियर। आसी मने मल रहचा का आसी ई चक नू र'अनन नेकईम अख़'ओर। 31एन्देरगेका ई बेड़ा नू आस तंग्है चेलारिन ओन्टा मुदे कत्थन सिखाब'आलियस। आस आरिन ब'आलियस, “उन्दुल जोक्क आलर मनवा ख़द्दन एंगन नन्ना आलर ही आकुस नू चि'ओर, अरा आर एंगन पिटोर। लिकिन उल मुन्द नू ऎन केचका ती उज्जा चो'ओन।” 32लिकिन चेलर इबड़ा कत्थन मल बुझ्रर, ती आर ई पत्त नू आसिन मेना गे हूँ इल्चियर।
धर्मेसी ऎरना नू नॆ उर्मी ती कोहाँ
(मत्ता 18:1-5; लूक 9:46-48)
33फिन येसुस अरा आसी चेलर कफरनहूम केरर। एकाबारी आर एड़पा नू रहचर, आ बारी आस तंग्है चेलारिन मेंजस, “नीम डहरे नू एका पत्त नू कछनख्र'आ लिक्कर?” 34लिकिन आर एन्देर हूँ मल बाचर, एन्देरगेका आर डहरे नू ताम ताम कछनख्र'आलियर, “नम्है नू नॆ उर्मी ती कोहाँ हवे।”#लूक 22:24 35ख़ने आस ओक्करकी बारा चेलारिन तंग्है गुसन मीख़ियस अरा आरिन बाचस, “नीकईम धर्मेसी ऎरना नू ओर्मर ती कोहाँ मना गे बेद्दोस होले, आस तंगन ओर्मर ती सन्नी सोचना र'ई, अरा ओर्मर गे तेतर-सुसर नन्ना र'ई।”#मत्ता 20:26,27; 23:11; मर 10:43,44; लूक 22:26
36फिन आस ओन्टा सन्नी ख़द्दासिन हो'अरकी आर ही मझी नू ओक्ताचस। ख़द्दासिन आस पक्कियस अरा आरिन बाचस, 37“एका ओर्तोस ई बेसे ओन्टा ख़द्दासिन एंग्है बदली#9:37 युनानी भखा नू “एंग्है नामे ती” एन्ने लिख्रकी र'ई। नू इंझ्रदस आस एंगन इंझ्रदस। इदही माने एन्ने हवे, आस एंगन लेका मल इंझ्रदस लिकिन एंगन तइय्का एंग्है बबासिन हूँ इंझ्रदस।”#मत्ता 10:40; लूक 10:16; यॊ 13:20
नॆ नम्है गने अरा नॆ नम्है बिड़दो नू र'ई?
(लूक 9:49,50)
38ख़ने यॊहनस येसुसिन बाचस, “अना गुरु! ऎम ओन्टा आलासिन नीन आस गे आकुस#9:38 युनानी भखा नू “एंग्है नामे ती” एन्ने लिख्रकी र'ई। अरा 9:39 नू हूँ। चिच्चकय ब'अरकी नाद ओथ्रनन ईरकम, अरा ऎम आसिन छेकचकम, एन्देरगेका आस चेलर एमा नू ती मल रहचस।”
39येसुस आरिन बाचस, “नीम आसिन अमा छेक'आ, एन्देरगेका एका ओर्तोस ऎन आस गे आकुस चिच्चकन ब'अरकी अकबक नलख नन्दस, आस एंगन लॆम मलदौ मल ब'ओस। 40एका ओर्तोस नम्है बिड़दो मलकस आस नम्है सहाड़ा ननुस हिकदस।#मत्ता 12:30; लूक 11:23 41इदिन हूँ मेना का नेकईम निमा गे ओन मौनी अम्मु लेका ओन्त'अदस, एन्देरगेका नीम ऎन मसीसी आलर हिकदर, होले आस मानिम धर्मेस ती इनाम ख़क्खोस।”#मत्ता 10:42
पत्त'उरिन पाप मल नन्त'अना र'ई
(मत्ता 18:6-9; लूक 17:1,2)
42लिकिन येसुस आरिन एन्ने हूँ बाचस “एका ओर्तोस एंगन पत्त'अदस, आस ई सन्नी ख़द्दस लेक्खा मान मलका आलस होले हूँ, आसिन एंग्है ती नीन कगर'अदय होले, निंग्है ख़ेसेर नू ओन्टा कोहाँ पखनन हें'अरकी निंगन समुदर नू हेबड़ना, धर्मेसी चि'अना दंडे ती जुक्की र'ई। 43औंगे निंग्है ओन्टा ख़ेक्खा निंगन एंग्है ती कगरारना ही चड्डे मनी होले, अदिन सम्ड़ह'आ। एंग्है ती कगरारना ती सम्ड़ह'आ गे आ ख़ेक्खन खंडना मनो होले हूँ अदिन खंडा चि'आ। एंग्है ती कगरारना चड्डे ऎंड़ ख़ेक्खा ही र'अनुम नरक नू मल तेभरना चिच्ची नू हेबड़्रना ती, एंग्है ती बिगर कगरारका ठुठा मनरकी धर्मेस गने जनमजुग ही उज्जना नू कोरना निंगा दौ र'ई।#मत्ता 5:30 44[ नरक नू आर जनमजुग गूटी दुक्खे सारनर,#9:44 युनानी भखा नू “पोचगो मल खि'ई” एन्ने लिख्रकी र'ई। अरा 9:46,48 नू हूँ। अरा असन चिच्ची हूँ जनमजुग गूटी लघर'आली। ] 45अरा निंग्है ओन्टा ख़ेड्डे निंगन एंग्है ती कगरारना ही चड्डे मनी होले, अदिन सम्ड़ह'आ। एंग्है ती कगरारना ती सम्ड़ह'आ गे आ ख़ेड्डेन खंडना मनो होले हूँ अदिन खंडा चि'आ। एंग्है ती कगरारना चड्डे ऎंड़ ख़ेड्डे ही र'अनुम नरक नू हेबड़्रना ती, एंग्है ती बिगर कगरारका ती लेंग्ड़ा मनरकी धर्मेस गने जनमजुग ही उज्जना नू कोरना निंगा दौ र'ई। 46[ नरक नू आर जनमजुग गूटी दुक्खे सारनर, अरा असन चिच्ची हूँ जनमजुग गूटी लघर'आली। ] 47अरा निंग्है ओन्टा ख़न्न निंगन एंग्है ती कगरारना ही चड्डे मनी होले, अदिन सम्ड़ह'आ। एंग्है ती कगरारना ती सम्ड़ह'आ गे आ ख़न्नन टोटरना ओथ्रना मनो होले हूँ अदिन टोटर'आ ओथ्र'आ। एंग्है ती कगरारना चड्डे ऎंड़ ख़न्न र'अनुम नरक नू हेबड़्रना ती, एंग्है ती बिगर कगरारका ती कना मनरकी धर्मेस गने जनमजुग ही उज्जना नू कोरना निंगा दौ र'ई।#मत्ता 5:29 48नरक नू आर जनमजुग गूटी दुक्खे सारनर, अरा असन चिच्ची हूँ जनमजुग गूटी लघर'आली।#यसा 66:24
49नॆ एंगन पत्त'ओर अबड़ा ओर्मर गे दुक्खे सारना#9:49 युनानी भखा नू “ओर्मर बॆक ती झंझियार'ओर” एन्ने लिख्रकी र'ई। मनो। अरा चिच्ची आलॊ गुट्ठिन सुध ननी, अन्नेम निम्है दुक्खे हूँ र'ई। आलर तम्है दाँड़ेन सुध नना गे बॆकन सजनर, अन्नेम ईद हूँ र'ई। 50बॆक डउल हिके। लिकिन बॆक ही तीनना मेटर'ओ कालो होले, अदही तीनना एकासे कमर'ओ? निम्है पत्त'अना आ बॆक लेक्खा र'ई, औंगे निम्है पत्त'अना नू जिटजिट ने र'आ। अरा नीम ओरोत इरिब नू मेसेर'अरकी उज्जा।”#मत्ता 5:13; लूक 14:34,35
Currently Selected:
मरकुस 9: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
