मरकुस 7

नॆग सिखाब'उर ही भितरी ता सफा ही पत्त नू सिखाब'अना

(मत्ता 15:1-20)

1उन्‍दुल येरुसलॆम नगरे ती बरचका जोक्को फरिसीर अरा नॆग सिखाब'उर येसुस गुसन ख़ॊंड़रर। 2तहाँ आर येसुसी जोक्को चेलारिन आर ही बिगर नॊंढ़रका ख़ेक्खा ती मंडी ओन्नन ईरियर। एकदा यहूदीर ही चाल मंडी ओन्ना ही मुन्‍द ख़ेक्खन नॊंढ़रना रहचा। 3(एन्‍देरगेका फरिसीर अरा उर्मी यहूदीर पूरखर ही तिं‍का नॆग लेक्‍खा, एका गूटी ख़ेक्खन मल नॊंढ़रनर आ गूटी मंडी मल ओन्नर। 4अन्नेम आर बजार ती किर्रनर ख़ने हूँ आर तमन बिगर नॊड़रका मल ओन्नर। लोटा अरा मौनी अरा तांमा ही संजगिन नॊड़ना मंजना, एन्ने कैनो गोटंग चाल र'ई, अबड़ा नू हूँ आर ऎकनर।)

5आ फरिसीर अरा नॆग सिखाब'उर येसुसिन मेंजर, “निंग्‍है चेलर एन्‍देरगे पूरखर ही चाल नू मल ऎकनर?, अरा ख़ेक्खा बिगर नॊंढ़रका मंडी ओन्नर।”

6येसुस किर्त'अर बाचस, “धर्मेस नीम उत्तुरमाड़ुर ही पत्त नू धर्मेसी कत्‍था तिंगू यसायास ती चिरान नू तिंगियस।#यसा 29:13

‘इबड़ा आलर तम्‍है कत्‍था ती गा एंग्‍है म‍ईन नन्नर,

लिकिन ईर मानिम नू एंगन मल पॆस्रनर।

7ईर अनभनियाँ नू एंग्‍है महबा नन्नर,

ईर गा आलर ही कमचका पॆसकन धर्मेसी पॆसका ब'अरकी सिखाब'अनर’।

8निमन धर्मेस एन्‍देर पॆसस अदन तरकूटी नन्‍दर, लिकिन आलर ही चालन चिहुंक लगे नन्‍दर।”

9येसुस आरिन फिन बाचस, “नीम निम्‍है चालन मन'आ गे एकासे बॆस बने धर्मेसी पॆसकन तरकूटी नन्‍दर! 10उदाहरन गे नम्‍है पूरखस मूसस बाचस, ‘निंग्‍है अयो बबन म‍ईन नना, अरा एकअम ओर्तर तम्‍‍‍है अयो बबन मलदौ आनोर होले, आर पिटर'ओर दिम।’#निर्ग 20:12; 21:17; व्य 5:16; लौव्य 20:9 11लिकिन नीम निम्‍है अयंग बंगन ब'अदर का ऎन निमन सहाड़ा नना पोल्‍लोन, एन्‍देरगेका ऎन निमा एन्‍देर चि'अना रहचा अदन धर्मेस गे दान लेक्‍खा चि'आ गे किरया मोक्‍कन। 12एन्ने नीम आसी तंग्यो अरा तम्‍बासी एन्‍देर हूँ सहाड़ा नना गे मल चि'अदर। 13ई बेसे नीम निम्‍है चाल ती धर्मेसी कत्‍थन तरकूटी नन्‍दर, एकदन नीम कमचका र'अदर। ईद ओन्‍टा उदाहरन हवे, एन्ने एन्ने नीम कैनो बग्‍गे नन्‍दर।”

14ख़ने येसुस गोंहड़ा आबोन तंग्‍है गुसन मीख़ियस अरा बाचस, “नीम ओर्मर एंग्‍है कत्‍थन मेना ती बुझुर'आ। ऎन ओन्‍टा जोक्‍खा ख़ीरी तेंगोन। 15आलारिन बहरी ता एन्‍द्रिइम लो आसी उला कुर'ई आद आसिन धर्मेसी ऎरना नू मलदौ मल कम'ई, लिकिन आलर ही जिया ती उरखी आदिम आसिन धर्मेसी ऎरना नू मलदौ कम'ई। [16ऎन एन्‍देर ही पत्त नू ब'आलदन अदिन नॆका बुझुरना र'ई होले आस एंगन चिहुंक लगे मेनके।”]

17येसुस गोंहड़ा आबोन अम्‍बरकी तंग्‍है डेरा एड़पा केरस, ख़ने आसी चेलर आस ती ई जोक्‍खा ख़ीरी ही पत्त नू मेंजर। 18ख़ने आस आरिन बाचस, “नीम हूँ मल बुझुर'उर हिकदर का? नीम मल ईरकर का?, एन्‍द्रिइम ओन्ना-मॊख़ना आलासी ब‍ई ती कुर'ई आद आसिन धर्मेसी ऎरना नू मलदौ पुल्ली कम'आ। 19एन्‍देरगेका आद जिया नू मल कुर'ई, लिकिन आद कूल नू कुर'ई अरा पच'अरकी बहरी उरखी काली।” (एन्ने ब'अरकी उर्मी ओन्ना-मॊख़ना आलॊन सफा बाचस।)

20अरा आस बाचस, “एकदा आलासी ब‍ई महले जिया ती उरखी आद आलासिन धर्मेसी ऎरना नू मलदौ कम'ई। 21एन्‍देरगेका आलर जिया नू मलदौ सोचनर। ई चड्डे आर पेहरन ही सोतरा नलख नन्नर अरा आर ख़ड़नर, आल पिटनर, नन्ना आली गुसन कानर, 22चिबाख़ारनर, मलदौ नलख नन्नर, ठगनर, पेहरन ही मलदौ ख़न्न ऎरनर, पड़गनर, हींड़नर, तरगरनर, अरा बैतल नलख नन्नर। 23आलर मलदौ सोच सोचनर ती इबड़ा उर्मी मलदौ नलखन नन्नर, ईद आलारिन धर्मेसी ऎरना नू मलदौ कम'ई।”

सुरोफिनिकिसा आली ही पत्त'अना

(मत्ता 15:21-28)

24फिन येसुस असलेक ती उरखरकी तुरोस अरा सीदॊन जिला नू बरचस। आस ओन्‍टा एड़पा नू केरस। आसी मने रहचा का नॆ हूँ आसिन अम्‍बोर अख़'आ, लिकिन आस आलर ती नूख़ुर'आ पोल्‍लस। 25ओन्‍टा आली येसुसी हलन मेनरकी आसी गुसन बरचा, अरा लॆम आसी ख़ेडमूली खत्तरा। अदही सन्नी तंग्‍दन ओन्‍टा मलदौ बॊलता धरचकीचा। 26आद सीरिया जिला ही फिनिकिया नगरे ता युनानी आली#7:26 आद यहूदनी मल्‍ली। रहचा। आद येसुस गुसन तंग्‍दा ती नाद आबोन ओथ्र'आ गे गोहरार'आ।

27यहूदीरिन ख़द्दर अरा नॆ यहूदी मलनर आरिन अल्‍ला बेसे जोक्‍खरकी येसुस अदिन बाचस, “ख़द्दर ही ओन्ना-मॊख़नन अल्‍ला गे चि'अना दौ मल्‍ली, मुन्‍द ख़द्दारिन ओन्‍त'अना र'ई।”

28लिकिन आद आसिन किर्त'अर बाचा, “मानिम दिम उर्बायो, लिकिन अल्‍ला हूँ गा ख़द्दर ही ओन्ना-मॊख़ना ही जुट्ठा-अट्ठा खत्तरकन पिसी मूख़ी।”

29ख़ने आस अदिन बाचस, “नीन दौ उतारा चिच्की, औंगे निंग्‍दा ती नाद उरखकी र'ई, नीन निंग्‍है एड़पा कलय।” 30आद तंग्‍है एड़पा केरा अरा तंग्‍दन खटी नू बिड़रका ईरिया। अरा आद ती नाद उरखतारा केरा।

येसुस भ‍ईरा अरा कोन्‍दा आलासिन कोड़े नन्‍दस

31तहाँ येसुस तुरोस चक आबोन अम्‍बरकी सीदॊन केरस। तहाँ आस देकापोली चकभार मन्नुम गलिलेया समुदर तरा कालालियस। 32आ बारी जोक्को आलर असन ओन्‍टा भ‍ईरा अरा कोन्‍दा आलासिन आसी गुसन ओन्‍द्रर। अरा आर आसिन कोड़े नना गे आसी म‍इय्‍याँ तंग्‍है ख़ेक्खा उइय्‍या गे येसुसिन गोहरारर।

33ख़ने आस आसिन गोंहड़ा ती भिनगे होच्‍चस ती तंग्‍है अंगलिन आसी ख़ेबदा नू सज्‍जस, अरा आस तंग्‍है अंगली नू लालेन ननरकी आसी ततख़न ऎसड़स। 34अरा आस मेर्ख़ा तरा ऎररकी नींख़चारचस, अरा अरामी भखा नू बाचस, “एप्‍‍फता” इदही माने “कोलर'अय कलय”। 35लॆम आसी ख़ेबदा कोल्‍लरा केरा, अरा आसी ततख़ा ही हॆंरका कोल्‍लरा, अरा आस फरीफरी ब'आ हेलरस।

36ख़ने येसुस आरिन आनियस का इदन नॆकन हूँ अमके तेंगा। लिकिन आर आस अमके तेंगा ब'अरकी ऎ बग्‍गे बाचस, आ बग्‍गेम आर ई कत्‍थन मेन्‍त'आ हेलरर। 37नॆ ई कत्‍थन मेंजर आर नगदे अकबकरर, अरा ब'आ हेलरर, “आस एन्‍देर एन्‍देर नलख नंजस अबड़ा उर्मिन दौ दिम नंजका र'अदस। आस भ‍ईरा आलासिन मेना गे हूँ नन्‍दस, अरा कोन्‍दा आलासिन कछनख्र'आ गे हूँ सवंग चि'अदस।”

Currently Selected:

मरकुस 7: KURUXBSI

Highlight

Copy