मरकुस 12

ठिका होच्चका उर्बर ही जोक्‍खा ख़ीरी

(मत्ता 21:33-46; लूक 20:9-19)

1येसुस एन्ने यहूदी मुद्धर गने कछनख्रस ती आस ई जोक्‍खा ख़ीरिन तिंगियस।#यसा 5:1,2 “ओन्‍टा आलस रहचस। आस ओन्‍टा अंगुर ही बटकी कमचस, अरा चरियो तरा पगड़ हड़चस, अरा अंगुर ती रासी ओथ्र'आ गे चचड़ी नू कुंडा कमचस, अरा ख़ापा गे मचा कमचस, अरा अदिन उर्बर गे ठिका चिच्‍चस, फिन तान ओन्‍टा नन्ना राजी केरस। 2फिन आस पानना ही बेड़ा नू ठिका होच्चका उर्बर गुसन हिसा ओन्‍द्र'आ गे ओन्‍टा जॊंख़ासिन त‍इय्‍यस। 3लिकिन आर आसिन धर'अरकी लौचर, अरा आसिन नीदी ख़ेक्खा त‍इय्‍यर। 4फिन आस अउरिम ओन्‍टा जॊंख़ासिन आर ही गुसन त‍इय्‍यस। ख़ने आर आसी कुक्‍कु नू लौचर, अरा आसिन लज्‍जे मॊख़ताचर। 5फिन आस अउरिम ओन्‍टा जॊंख़ासिन त‍इय्‍यस, ख़ने आर आसिन पिटियर। आस अउरिम बग्‍गेरिन त‍इय्‍यस। अइय्‍या ती आर जोक्‍कोरिन लौचर अरा जोक्‍कोरिन पिटियर।

6अक्‍कु त‍इय्‍या गे आस गुसन आसी चोन्‍हा ख़द्दस लेका रहचस। ‘एंग्‍है ख़द्दासिन आर म‍ईन ननोर’ सोच्‍चस ती छेद्दे नू तंग्‍है ख़द्दासिन त‍इय्‍यस।

7आसी ख़द्दस बरचस ख़ने, अबड़ा ठिका होच्चका उर्बर ताम ताम नू बाचनखरर, ‘ईसिम गा पुंजी हिकदस, बरा नाम ईसिन पिटोत होले ईसी ई बटकी नम्‍है मनो कालो।’ 8अन्नेम आर आसिन धरचर अरा पिटियर ती आसी केचका मॆदन बटकी ती बहरी हिबड़ियर चिच्‍चर।”

9फिन येसुस बाचस, “ऎन निमन तेंगोन, बटकी उर्बस एन्‍देर ननोस? आस अबड़ा ठिका होच्चका उर्बारिन पिटोस अरा बटकी ही ठिका नन्ना उर्बर गे चि'ओस। 10नीम नेम्हा पुथी नू मल्‍ला पढ़चका का?#भज 118:22,23

‘एका पखनन राजमिस्‍त्रीर तरकूटी ताड़चका रहचर,

आ पखना दिम गोट्टा एड़पन बड़ियर ननू पखना मंजा केरा।

11उर्बस इदन नंजस,

अरा नम्‍है ऎरना नू ईद अकबक र'ई।’”

12येसुसी एन्ने ब'अनन यहूदी मुद्धर मेंजर ती येसुसिन धर'आ बिद्दियर, एन्‍देरगेका आर बुझुर ख़च्चिका रहचर का येसुस आर ही बिड़दो नू ई जोक्‍खा ख़ीरिन बाचकाचस। लिकिन आर आलारिन इल्चियर ती येसुसिन अम्‍बरकी किर्रिम बिच्‍चियर।

यहूदी मुद्धर येसुसिन बझाब'आ गे मालगुजारी ही पत्त नू मेन्ना

(मत्ता 22:15-22; लूक 20:20-26)

13फिन यहूदी मुद्धर येसुसिन कत्‍था नू बझाब'आ गे जोक्को फरिसीर अरा हॆरॊदॆरिन आसी गुसन त‍इय्‍यर। 14आर येसुस गुसन बरचर ती बाचर, “अना गुरु! ऎम अख़दम का नीन उजगो आलय, नीन आलर एन्‍देर सोच'ओर अदही पत्त नू गुनन मल नन्‍दय, अरा नीन तीना मल ख़ाँड़दय। नीन धर्मेसी डहरेन मानी गने तेंग‍दय। यहूदी नॆग नमन कैसरस गे मालगुजारी चि'आ गे पॆस'ई का मला? 15ऎम मालगुजारी चि'ओम का मला?”

लिकिन येसुस आर ही चतरा आबोन अख़'अरकी बाचस, “नीम एंगन एन्‍देरगे बिढ़दर? ओन्‍टा रोमी ढिबन एंग्‍है गुसन ओन्‍द्र'आ का ऎन अदिन ऎरोन।” 16आर ढिबन ओन्‍द्रर अरा आस गे चिच्‍चर। आस मेंजस, “ई नामे अरा छपा नॆखा हवे?” आर बाचर, “कैसरसी।”

17ख़ने येसुस आरिन बाचस, “कैसरस गे एन्‍देर चि'अना र'ई अदिन कैसरस गे चि'आ, अरा धर्मेस गे एन्‍देर चि'अना र'ई, अदिन धर्मेस गे चि'आ।” ख़ने आर येसुसी ई कत्‍थन मेनरकी अनचकरर केरर।

सदुकीर येसुसिन केचका ही ख़ॊख़ा ता उज्‍जना ही पत्त नू मेन्नर

(मत्ता 22:23-33; लूक 20:27-40)

18जोक्‍क उल्‍ला ख़ॊख़ा, केचका ख़ॊख़ा उज्‍जा चो'अना र'अम मलकी ब'ऊ सदुकीर#12:18 सदुकी यहूदी समाज ता ओन यहूदी धरम खोंड़हा हवे। येसुस गुसन बर'अरकी मेंजर,#त‍इ 23:8 19“अना गुरु! मूसस एमा गे एन्ने पॆसका चिच्‍चस, का एकअम ओर्तस बिगर ख़द्द-ख़र्रा ही खे'अदस कादस, अरा आसी तंग्‍आली बछरकी र'ई, होले आसी भइय्योस अदिन बेंज्रना ती केचका तंग्‍है भइय्योस गे ख़द्द कुन्‍द्रत'अना र'ई।”#व्य 25:5 20सदुकीर अउरिम एन्ने ब'आलियर, “ओंग्‍होन सात भइय्योर रहचर, कोहँस बेंज्र'अरकी बिगर ख़द्द-ख़र्रा ही केच्‍चस केरस। 21ख़ने मझलस आ रड़ियाही आबोन बेंज्रस, अरा बिगर ख़द्द-ख़र्रा ही केच्‍चस केरस। ख़ने सझलस अदिन बेंज्रस। 22अन्नेम सतियो भइय्योर अदिन ओरोत ही ख़ॊख़ा ओरोत बेंज्रर ती जम्मर बिगर ख़द्द-ख़र्रा ही केच्‍चर। छेद्दे नू आ आली हूँ केच्‍चा केरा। 23अक्‍कुन एमन तेंगा, केचका आलर ही उज्‍जा चो'अना नू आद नॆखा आली मनो, एन्‍देरगेका अदिन सतियो भइय्योर बेंज्रकाचर।”

24इदन मेनरकी येसुस आरिन बाचस, “नीम नेम्हा पुथी नू उज्‍जा चो'अना ही पत्त नू एन्‍देर लिख्रकी र'ई अदिन बलदर अरा धर्मेस एन्‍देर नना ओंग्‍दस अदन हूँ बलदर, ई चड्डे नीम अन्नेम मलदौ सोचदर। 25इकला आलर केचका ती उज्‍जा चो'अनर, आलर अरा आलीर मल बेंज्रनर। आर मेर्ख़ा नू मेर्ख़ा पैकर लेक्‍खा मनोर, एन्‍देरगेका पैकर हूँ मल बेंज्रोर। 26नेम्हा पुथी नू एन्ने लिख्रकी र'ई का इकला धर्मेस मूसस गे लघरना ख़ोप्‍पा नू ऎथ्रस ख़ने आस बाचस, ‘ऎन अब्राहम अरा इसाक अरा याकॊबसी धर्मे हिकदन।’#निर्ग 3:6 27आस केचका आलर ही धर्मेस मलदस, लिकिन आस उज्‍जना आलर ही धर्मेस हिकदस। अब्राहमस अरा इसाकस अरा याकॊबस केच्‍चर अन्नु हूँ आर उज्‍जालनर। औंगे नाम अख़दत का नम्‍है मॆद ही केचका ख़ॊख़ा हूँ नम्‍है बॊलता उज्‍जो। नीम गा मलदौ पत्त'अदर का केच्चकर उज्‍जा मल चो'ओर।”

धर्मेसी पॆसका नू ती कोहाँ पॆसका

(मत्ता 22:34-40; लूक 10:25-28)

28ओन्‍टा नॆग सिखाब'उस असन रहचस ती आर ही कत्‍था बरतन मेना लगियस। येसुस सदुकीर गे लूरगर ती किर्त'अर ब'अनन आस ईरियस ती येसुसिन मेंजस, “धर्मेस नमा गे बग्‍गे पॆसका चिच्कादस अबड़ा ती कोहाँ पॆसका एकदा हवे?”#लूक 10:25-28

29येसुस आसिन किर्त'अर बाचस, “उर्मी पॆसका ती ईद कोहाँ हवे। ‘इस्राऎल आलारो एंग्‍हैन मेना, नम्‍है उर्बस धर्मेस ओन्‍टे लेका उर्बस हिकदस।#व्य 6:4,5 30नीन निंग्‍है धर्मे उर्बासिन निंग्‍है उर्मी जिया गने अरा निंग्‍है उर्मी बॊलता गने अरा निंग्‍है उर्मी लूर गने अरा निंग्‍है उर्मी सवंग गने चोन्‍हा नना।’ 31अरा दोसरा पॆसका ईद हवे, ‘नीन निंगन एकासे चोन्‍हा नन्‍दय अन्ने नन्नारिन हूँ चोन्‍हा नना।’ धर्मेस इबड़ा ऎंड़ पॆसका ती कोहाँ एका पॆसकन हूँ मल्‍ला चिच्का।”#लौव्य 19:18

32आ नॆग सिखाब'उस बाचस, “अना गुरु! नीन नगदे बने मानिम बाचकय, धर्मेस ओन्‍टा दिम र'अदस, आसिन अम्‍बरकी नन्ना धर्मेस मलकस।#व्य 4:35 33आसिन उर्मी जिया गने अरा उर्मी बुझुरना गने अरा उर्मी सवंग गने चोन्‍हा नना अरा नन्नारिन तंग्‍है लेक्‍खा चोन्‍हा नना। एका दान बस्‍सरनर ती अरगनर अरा नन्ना मदहे दान अरगना ती ईद कोहाँ हवे।”#हो 6:6

34येसुस ईरियस का आस लूरगर ती किर्त'अर बाचस, ख़ने आस आसिन बाचस, “धर्मेस निंगन सेब्‍बा ती राजी नना ओंग्दस।” फिन नॆका हूँ येसुसिन इन्द्रिइम मेना गे डिढ मल मंजा।

येसुस ब'अदस मसी दाऊदस ती कोहाँ हिकदस

(मत्ता 22:41-46; 23:1-36; लूक 20:41-47)

35फिन येसुस धर्मेसी मन्दिर नू सिखाब'आ लगियस ख़ने आस मेंजस, “नॆग सिखाब'उर एन्‍देरगे ब'अनर का मसीस दाऊदसी ख़द्दस हिकदस? 36दाऊद नेम्‍हा बॊलतस नू मनरकी बाचस,#भज 110:1

‘धर्मे उर्बस एंग्‍है उर्बासिन बाचस का,

नीन एंग्‍है तीना पक्‍खे ओक्‍करकी एंग्‍है गने राजी नना,

ऎन निंग्‍है बैरीरिन नास नंज ख़च्‍चोन।’

37दाऊदस गा तानिम आसिन उर्बस अन्ने ब'अदस, होले आस दाऊदसी पिड़ही ता लेका मला आसी उर्बस हूँ हिकदस।” गोंहड़ा येसुसी कत्‍थन मेंजा ती नगदे रिझ्रा।

38येसुस तंग्‍है सिखाब'अना नू अउरिम बाचस, “नॆग सिखाब'उर ती चिहुंक र'आ। आर दिगहा किचरी अत्तरकी कुद्दनर, अरा बजार टोंका गुट्ठी नू मोंजरा ख़क्‍खा गे बेद्दनर। 39आर गोड़हा एड़पा गुट्ठी नू मुध मचिया गुट्ठिन अरा मदी गुट्ठी नू म‍ईन अड्डा गुट्ठिन ख़क्‍खा गे बेद्दनर। 40लिकिन आर रड़ियाहिरिन ठकनर ती आरिन अमल'अनर। अरा आर धरम नू तमन कोहाँ ऎद'आ गे दिगहा दिगहा बिन्‍ती नन्‍नर। धर्मेस आर गे दंडे चि'ओस दिम।”

कीड़ा रड़ियाही ही दान

(लूक 21:1-4)

41तहाँ येसुस धर्मेसी मन्दिर नू दान बकसा ही मुन्‍दहारे ओक्‍करकी बकसा नू गोंहड़ा ही दान सजनन ऎरालियस। बग्‍गे उरुब आलर नगदे पैसा कौड़ी सज्‍जर। 42फिन ओन्‍टा कीड़ा रड़ियाही बरचा। आद ऎंड़ सन्नी सिक्‍कन सज्‍जा।

43येसुस तंग्‍है चेलारिन हेद्दे मॆख़रकी बाचस, “ऎन निमन मानिम ब'अदन, धर्मेसी मन्दिर ही दान बकसा नू सजका आलर ती ई कीड़ा रड़ियाही उर्मी ती बग्‍गे सजकी र'ई। 44एन्‍देरगेका ओर्मर तम्‍है खुर्जी ही बढ़ती ती सज्‍जर। लिकिन ईद नगदे कीड़ा आली हवे। इदही गुसन ऎ बग्‍गे रहचा उर्मिन सज्‍जा। ईद तंग्‍है उज्‍जा गे रहचा जम्मन धर्मेस गे चिच्‍चा।”

Currently Selected:

मरकुस 12: KURUXBSI

Highlight

Copy