मरकुस 1

यॊहन नूड़रत'उस मसीस गे डहरेन चत्र'अना

(मत्ता 3:1-12; लूक 3:1-18; यॊ 1:19-28)

1ईद धर्मेसी ख़द्दस येसु मसीसी दौ कत्‍था। 2ईद एन्ने ऒड़ मनी, धर्मेसी कत्‍था तिंगू यसायास तंग्‍है पुथी नू लिखचकादस,

“ऎरा! ऎन एंग्‍है पैकासिन निंग्‍है मुन्‍द त‍इय्‍या लगदन,

आस निंग्है डहरेन सपड़'ओस।#मला 3:1

3ओर्तोस टोड़ंग नू चिच्चि‍यारदस

‘उर्बस गे डहरेन सपड़'आ, आस गे डहरेन चत्र'आ।’”#यसा 40:3

4औंगे यॊहन नूड़रत'उस टोड़ंग नू ऎथ्रस अरा आलारिन मेन्त'आलियस, “जियन किर्त'आ, अदही चिन्‍हा गे ऎन निमन अम्मु ती नॊड़रत'अदन। होले धर्मेस निम्है पाप गुट्ठिन छमा ननोस।” 5येरुसलॆम नगरे अरा यूदेया जिला ही नन्ना नन्ना अड्डा ती नगदे आलर आसी गुसन कालालियर। असन आर आसी कत्‍थन मेनरकी तम्‍है पाप गुट्ठिन पत्त'आलियर। ख़ने यॊहनस आरिन यरदन ख़ाड़ नू नॊड़रत'आलियस। 6यॊहनस ऊंट ही चुट्टी ती कमचका ओन्‍टा कड़कड़हा किचरिन चो'आलियस। अरा तंग्‍है कड़मा नू चपटा ही कमरपटी हें'आलियस। आस बोक्‍खो गुट्ठी अरा पतड़ा तीनिन लेका मॊख़ालियस।#2बॆल 1:8 7आस एन्ने मेन्त'आलियस, “ओर्तोस लॆम बर'ऊ र'अदस आस एंग्‍है ती कोड़हे सवंगिय र'अदस। ऎन ख़ोलख़र'अरकी आसी खरपन इँचना ही हूँ जॊगे मलकन। 8ऎन गा निमन अम्मु ती लेका नॊड़रत'अदन, लिकिन आस निमन नेम्‍हा बॊलतस ती नन्ना घत्त नू नॊड़त'ओस।”

येसुसी नॊड़रना अरा बिढ़्रना

(मत्ता 3:13-17; 4:1-11; लूक 3:21,22; 4:1-13)

9अबड़ा उल्‍ला नू उन्‍दुल येसुस गलिलेया जिला ही नासरेत पद्दा ती बर'अरकी यॊहनस हेद्दे केरस। यॊहनस आसिन यरदन ख़ाड़ नू नॊड़रताचस। 10आस अम्मु ती बहरी उरखस ती लेथेम मेर्ख़ा तिसग्रनन अरा नेम्‍हा बॊलतन पेरवाँ लेक्‍खा तंग्‍है म‍इय्‍याँ एत्तनन ईरियस। 11अरा मेर्ख़ा ती धर्मे बबस बाचस, “नीन एंग्‍है ओन्‍टे लेका चोन्‍हा ख़द्दय हिकदय, ऎन निंग्‍है ती बग्‍गे खुसमारदन।”#उत्प 22:2; भज 2:7; यसा 42:1; मत्ता 3:17; 12:8; मर 9:7; लूक 3:22

12तहाँ धर्मेसी बॊलतस लॆम येसुसिन टोड़ंग तरा त‍इय्‍यस। 13आस टोड़ंग नू चालीस उल्‍ला रहचस। ख़ने आस सैतान ती बिढ़्रस। येसुस पतड़ा मेक्‍खो गने रहचस, अरा मेर्ख़ा पैकर आसी तेतर-सुसर नंजर।

येसुस दौ कत्‍था मेन्‍त'अदस

(मत्ता 4:12-17; लूक 4:14,15)

14हॆरॊदॆस बॆलस यॊहनसिन जेहेल नू स‍जताचस। अदही ख़ॊख़ा येसुस गलिलेया जिला नू केरस अरा धर्मेसी पत्त नू दौ कत्‍थन मेन्‍त'अना बारी रहचस। 15अरा आलारिन ब'अना बारी रहचस, “धर्मेस आलर ही उज्‍जना नू राजी नन्ना ही बेड़ा हेद्दे अंड़सकी र'ई। औंगे जियन किर्त'आ अरा ई दौ कत्‍थन इंझ्र'आ।”#मत्ता 3:2

येसुस चार झनरिन चेला गे मीख़ियस

(मत्ता 4:18-22; लूक 5:1-11)

16उन्‍दुल येसुस गलिलेया समुदर ही पिंडी नू ईकनुम कालियस ख़ने, सिमॊन अरा आसी भइय्योस अन्‍द्रेयसिन ईरियस। आर केवँटर रहचर औंगे आर समुदर नू जल्‍ली इँच'आलियर। 17येसुस आरिन बाचस, “एंग्‍है गने बरा, नीम एकासे इंजोन धर'आ लगदर अन्नेम ऎन निमन सिखाब'ओन आलारिन एकासे एंग्‍है चेला मना गे ओन्‍द्रना र'ई।” 18ख़ने लॆम आर तम्‍है नलखन अम्‍बरकी आसी गने चॊंख़्रर।

19आर जोर गेच्‍छा केरका ख़ॊख़ा आस जेबदयु तंग्‍दस याकॊब अरा आसी भइय्योस यॊहनसिन ईरियस। आर डोंगा नू तम्‍है जल्‍लिन तुन'आ लगियर। 20आस आरिन ईरियस ती आरिन हूँ लॆम तंग्‍है चेला मना गे मीख़ियस। ख़ने आर तम्‍बा जेबदयुसिन भुथियार गने डोंगा नू अम्‍बरकी येसुस गने चॊंख़्रर।

येसुस मलदौ बॊलतन ओन्‍टा आलस ती बोंग्तादस

(लूक 4:31-37)

21जोक्को उल्‍ला ख़ॊख़ा येसुस अरा अबड़ा चेलर कफरनहूम नगरे केरर। अरा आस ख़ॊख़ा ता यहूदी ख़न्न ऎख़ना उल्‍ला#1:21 हप्‍ता ही छेद्दे उल्‍ला (सातवां उल्‍ला)। यहूदीर गे ईद सुक्रवार बीड़ी पुत्तना ती सनीवार बीड़ी पुत्तना गूटी। नू यहूदी गोड़हा एड़पा कालरकी असला जुमुरका आलारिन सिखाब'आ हेलरस। 22ख़ने आसी सिखाब'अना ही तरिका ती आलर अनचकरर केरर। एन्‍देरगेका आस यहूदी नॆग सिखाब'उर लेक्‍खा मला, लिकिन आकुस उइय्‍युस लेक्‍खा आरिन सिखाबाचस।#मत्ता 7:28,29

23आ बेड़ा नू आ यहूदी गोड़हा एड़पा नू लेथेम ओन्‍टा मलदौ बॊलता रस्‍सका आलस चिच्चियारस अरा बाचस, 24“हे नासरेत पद्दा ता येसु! एम्‍है गने निंगा गे एन्‍देर नलख र'ई? नीन एमन नास नना गे बरचका र'अदय का? ऎन अख़दन नीन एका ओर्तय, नीन गा धर्मेस ती बरचका नेम्‍हा आलय।”

25येसुस मलदौ बॊलतन चेताब'अरकी आनियस, “कलेकले र'अय, ई आलस ती उरखय कलय।” 26ख़ने मलदौ बॊलता आसिन नगदे दरकाचा अरा जॊरसरिया चिच्चि‍यारनुम आसिन अम्‍बिया चिच्‍चा।

27असन रहचर ओर्मर अनचकरर केरर, अरा ताम ताम कछनख्र'आ हेलरर, “बब्बारे! ई सिखाब'अना एकासे? ईद गा आकुस गने पुना सिखाब'अना। आस मलदौ बॊलतन हूँ आनदस, अबड़ा हूँ आसी कत्‍थन मिनी।” 28येसुसी पत्त ता ई कत्‍थन लॆम अबड़ा आलर गलिलेया जिला ही बग्‍गे अड्डा नू तिंगियर।

येसुस सिमॊन तंग्सासन कोड़े नन्‍दस

(मत्ता 8:14-17; लूक 4:38-41)

29येसुस सिमॊन अरा अन्‍द्रेयस, याकॊब अरा यॊहनस यहूदी गोड़हा एड़पा ती उरखर। अदही ख़ॊख़ा आर लॆम सिमॊन अरा अन्‍द्रेयसी एड़पा केरर। 30असन सिमॊनसी तंग्सास नगदे कोड़हे नाड़ी ती बिड़रकी रहचा। एड़पा नू रहचर आर लॆम अदही पत्त नू येसुसिन तिंगियर। 31ख़ने आस अदही गुसन कालरकी अदिन ख़ेक्खन धर'अरकी चॊदस। लॆम अदही नाड़ी तम्मिया केरा। तहाँ आद चॊचा ती आर गे ओन्ना-मॊख़ना चिच्‍चा।

येसुस बग्‍गे रोगियारिन कोड़े नन्‍दस अरा नादन बोंग्त'अदस

32अउला पुतबारी बीड़ी पुत्तका ख़ॊख़ा जोक्को आलर रोगियर अरा नॆखा म‍इय्‍याँ नाद रस्‍सकी रहचा अबड़ा ओर्मारिन येसुस गुसन ओन्‍द्रर बरचर। 33अरा कफरनहूम नगरे ता बग्‍गे आलर सिमॊनसी एड़पा गुसन ख़ॊंड़रर। 34येसुस कैनो मदहे रोगे ती लिंड़रका नगदे बग्‍गे आलारिन कोड़े नंजस। अरा कैनो नाद आबोन हूँ आलर ती बोंग्ताचस। अरा अबड़ा नादन आसी पत्त नू ब'आ मल चिच्‍चस, एन्‍देरगेका अबड़ा आसिन अक्‍खा का आस नॆ तंग्‍है।

येसुस गोट्टा गलिलेया नू दौ कत्‍थन मेनत'अदस अरा नादन ओथ्रदस

(लूक 4:42-44)

35दोसर उल्‍ला पैरी, बीड़ी अरगना ती मुन्‍द ऊख़ुर ऊख़ुर नू येसुस चॊचस। अरा एड़पा ती उरखरकी उछिन्‍द अड्डा नू केरस, अरा असन बिन्‍ती नना लगियस। 36आ बारी सिमॊनस अरा आसी संगेर येसुसिन बेद्दा केरर। 37एकाबारी आर आसिन ख़क्‍खियर ख़ने आसिन बाचर, “एम्‍है गने नगरे नू बरा, एन्‍देरगेका असन नगदे आलर निंगन बेद्दा लगनर।”

38ख़ने येसुस आरिन बाचस, “मला, बरा नाम अड्‍डे-बेड्‍डे पद्दा नू क'ओत नेक‍अन। होले ऎन असन हूँ दौ कत्‍थन मेन्‍त'ओन, एन्‍देरगेका ऎन इदगेम ख़ॆख़ेल नू बरचका र'अदन।” 39ख़ने आस अरा आसी चेलर गोट्टा गलिलेया जिला नू केरर। असन आस यहूदी गोड़हा एड़पा नू दौ कत्‍थन मेन्‍त'आलियस। अरा आस आलर म‍इतले नादन हूँ ओथ्र'आलियस।#मत्ता 4:23; 9:35

येसुस खसरा रोगियासिन कोड़े नन्‍दस

(मत्ता 8:1-4; लूक 5:12-16)

40उन्‍दुल ओन्‍टा खसरा रोगियस येसुस गुसन बरचस, अरा आसी मुन्‍दहारे मूकलिदरस ती गोहरारस, “एंगन कोड़े ननम चि'आ एन्‍देरगेका ऎन अख़दन, निंग्‍है मने र'ई होले नीन एंगन कोड़े नना ओंग्दय।”

41इदन मेनरकी येसुस गे आसिन नगदे सोग्‍गे लग्‍गिया। ख़ने आस तंग्‍है ख़ेक्खन बड़हाबाचस ती आ आलासिन ऎवंढरस अरा बाचस, “एंग्‍है मने र'ई, औंगे ऎन निंगन कोड़े नन्‍दन।” 42लॆम आस कोड़े मंजस केरस। फिन आस खसरा रोगी मल रहचस।

43येसुस आसिन कोड़हे चेता ब'अरकी लॆम त‍इय्‍यस। 44आस एन्ने चेता बाचस, “निंग्‍है कोड़े मंजका ही पत्त नू नॆखा गुसन हूँ एन्‍द्रा हूँ अमके तेंगा। लिकिन कालरकी निंगन नैगासिन ऎद'आ। होले आस अख़'ओस का नीन कोड़े मंजकय। अरा खसरा रोगियर कोड़े मन्‍नर ख़ने एन्‍देर दाँड़े अरगना मनी अदिन मूसस आनियस, अदिन नीन सफा मना गे नैगस गुसन चि'आ। होले आस अदिन धर्मेस गे दाँड़े अरगोस, फिन आलारिन तेंगोस का नीन कोड़े मंजकय।”#लौव्य 14:1-32 45लिकिन आस तंगन येसुस एकासे कोड़े नंजस अदन नगदे आलारिन तेंगा हेलरस। ई चड्डे येसुस आलर ही ऎथ्रना नू एकअम नगरे नू काला पोल्‍लस, एन्‍देरगेका कोहाँ गोंहड़ा ख़ॊंड़रा। औंगे आस नगरे ही बहरी उछिन्‍द अड्डा नू रहचस। अन्नु हूँ ओनबेंड़र'आ ती आलर आसी गुसन बर'आलियर।

Currently Selected:

मरकुस 1: KURUXBSI

Highlight

Copy