मत्तायोस 25
25
दस गोटंग डिंडा पेल्लर ही जोक्खा ख़ीरी
1आ बारी नू मेर्ख़ा राजी दस गोटंग डिंडा पेल्लर लेक्खा र'ओ, नॆ तम्है होरन धरचर ती बेंजा जॊंख़ासिन भेंटार'आ गे उरखर।#लूक 12:35 2अबड़र ती पाँच गोटंग पेल्लर बोया रहचर, अरा पाँच गोटंग पेल्लर लुरगर रहचर। 3बोया पेल्लर तम्है होरा गा होच्चर लिकिन तम्है संगे इसुंग मल होच्चर। 4लिकिन लुरगर पेल्लर गा तम्है होरा गने कुड़ुवा नू इसुंग हूँ निंदर ती होच्चर। 5बेंजा जॊंख़स चाँड़हे मल बरचस ख़ने, अबड़र कूगा हेलरर अरा ख़न्द्रर केरर।
6अधरात माख़ा नू अंदोड़ मंजा, ‘ऎरा, बेंजा जॊंख़स बर'आ लगदस, गुचा, आसी गने भेंट मना गे।’ 7ख़ने उर्मी पेल्लर चॊचर ती होरा गुट्ठिन लघाब'आ हेलरर। 8अरा बोया पेल्लर लुरगर पेल्लर ती बाचर, ‘निम्है इसुंग ती जोक्क एमा हूँ चि'आ, एन्देरगेका एम्है होरा गुट्ठी तेभ्र'आ लगी।’ 9लिकिन लुरगर पेल्लर आनाकिर्ताचर, ‘र'ई आद एमा अरा निमा गे मल मनो, औंगे बीसू आलर गुसन कला अरा निमा गे ख़ॆन्दा।’
10आ बारी अबड़र इसुंग ख़ॆन्दा काला लगियर ख़ने, बेंजा जॊंख़स अंड़सियस। अरा नॆ नॆ सपड़ारका रहचर आर आसी गने बेंजा एड़पा भितरी किर्रिम बिच्चियर। अरा बली मुच्चतारा केरा।
11ख़ॊख़ा नॆखा गुसन इसुंग मल रहचा, आर इसुंग ख़िन्दियर ती बरचर ती ब'आ हेलरर, ‘अना उर्बायो, अना उर्बायो, एमा गे बलिन तिसग'आ चि'आ।’ 12लिकिन आस आनाकिर्ताचस, ‘ऎन निमन मानिम ब'अदन, ऎन निमन बलदन।’#लूक 13:25 13औंगे नीम एज्रका र'आ, एन्देरगेका नीम आ उल्लन महले आ बेड़न बलदर।
तीन जॊंख़ारी जोक्खा ख़ीरी
(लूक 19:11-27)
14अउर हूँ मेर्ख़ा राजी ओर्त आलस लेक्खा र'ई, एकास नन्ना राजी कालो बारी तंग्है जॊंख़ारिन मीख़ियस ती तंग्है खुर्जिन सोंपचस चिच्चस।#लूक 19:11-27 15आस ओर्मर गे तम्है सवंग ही लेक्खा चिच्चस, ओर्तोस गे पाँच थइला सोना ढिबा चिच्चस, नन्नस गे ऎंड़ थइला सोना ढिबा, अरा तिसरस गे ओन थइला सोना ढिबा चिच्चस ती आस नन्ना राजी किर्रिम बिच्चियस। 16तहाँ नॆका पाँच थइला सोना ढिबा ख़क्ख्रकी रहचा आस लॆम केरस ती ख़िन्दियस पिटियस ती पाँच थइला सोना ढिबा अउरिम अर्जाचस। 17एन्नेम ऎंड़ थइला सोना ढिबा ख़क्खकाचस, आस हूँ ऎंड़ थइला सोना ढिबा अउरिम अर्जाचस। 18लिकिन नॆका ओन थइला सोना ढिबा ख़क्ख्रकीचा, आस केरस ती अरख़ियस ती तंग्है उर्बासी सोना ढिबन मंडियस चिच्चस।
19नगदे उल्ला ख़ॊख़ा अबड़ा जॊंख़र ही उर्बस बरचस ती आर ती लेखा हो'आ हेलरस। 20नॆका पाँच थइला सोना ढिबा ख़क्ख्रकीचा, आस बरचस ती पाँच थइला सोना ढिबा अउरिम ओन्द्रस ती बाचस, ‘अना उर्बायो, नीन एंगा पाँच थइला सोना ढिबा सोंपचका रहचकय, ऎरा, ऎन पाँच थइला सोना ढिबा अउरिम अर्जाचकादन।’ 21उर्बस बाचस, ‘नीन दौ नंजकय, बॆस अरा पत्त'अना जॊगे जॊंख़य, नीन जुक्की नू पत्त'अना जॊगे रहचकय, निंगन बग्गे जिनिस मइय्याँ अदिया कम'ओन। बरा, निंग्है उर्बासी रिझ नू मेस्र'आ।’
22तहाँ नॆका ऎंड़ थइला सोना ढिबा ख़क्ख्रकीचा, आस हूँ बरचस ती बाचस, ‘अना उर्बायो, नीन एंगा ऎंड़ थइला सोना ढिबा सोंपचकाचकय, ऎरा, ऎंड़ थइला सोना ढिबा अउरिम अर्जाचकादन।’ 23आसी उर्बस आसिन बाचस, ‘नीन दौ नंजकय, बॆस अरा पत्त'अना जॊगे जॊंख़, नीन जुक्की नू पत्त'अना जॊगे रहचकय, निंगन बग्गे जिनिस मइय्याँ अदिया कम'ओन। बरा, निंग्है उर्बासी रिझ नू मेस्र'आ।’
24तहाँ नॆका ओन थइला सोना ढिबा ख़क्ख्रकीचा, आस बरचस ती बाचस, ‘अना उर्बायो, ऎन अख़'आ लिक्कन का नीन नगदे बेड़हा आलय, नीन एसन मल चाँख़दय असन नीन ख़ोयदय, अरा एसन मल बीजदय असन नीन ख़ॊंड़दय। 25औंगे इल्चिकन केरकन अरा केरकन ती निंग्है सोना ढिबन ख़ज्जो नू नुड्डकन चिच्कन। ऎरा, निंग्है र'ई आद ईदिम।’ 26आसी उर्बस आसिन किर्त'अर बाचस, ‘अना मलदौ अरा लंडी जॊंख़, नीन अख़'आ लिक्कय का ऎन एसन मल चाँख़दन, असन ख़ोयदन अरा मल बीजदन असन ख़ॊंड़दन। 27होले निंगा एंग्है सोना ढिबन कंतर हु'उर गे चि'अना रहचा, औंगे ऎन आर ती ख़द्दो आबोन ऊज'ओन हो'ओन दने।’
28औंगे उर्बस आनियस, ‘आसी गुसले आ थइला सोना ढिबन हो'आ ती नॆख'आ गुसन दस थइला सोना ढिबा र'ई आस गे चि'आ। 29एन्देरगेका नॆखअय गुसन र'ई आस गे अउरिम चीतार'ओ अरा आसी गुसन बग्गे मनो कालो। लिकिन नॆखअय गुसन मल्ला आसी गुसले एकदा र'ई आद हूँ होतार'ओ कालो।#मत्ता 13:12; मर 4:25; लूक 8:18 30अरा ई जॊगे मलका जॊंख़ासिन बहरी ऊख़ा नू सज'आ चि'आ, असन चींख़ना ओलख़ना अरा पल्ल चब्रना मनो।’#मत्ता 8:12; 22:13; लूक 13:28
छेद्दे ता नेंवई
31इकला मनवा ख़द्दन ऎन एंग्है महबा नू उर्मी मेर्ख़ा पैकर गने बर'ओन, अरा ऎन एंग्है महबा ही बॆल-गदिया नू ओक्कोन।#मत्ता 16:27; 19:28 32अरा उर्मी राजी ता आलारिन एंग्है मुन्दहारे ख़ॊंड़त'ओन। अरा महरस एकासे भेंडोन दरा ऎड़न हिगड़'अदस चि'अदस, अन्नेम ऎन अबड़ारिन हिगड़'ओन। 33भेंडोन ऎन एंग्है तीना पक्खे, अरा ऎड़न एंग्है डेब्बा पक्खे इजत'ओन।
34तहाँ ऎन बॆलन एंग्है तीना पक्खे ता आलारिन ब'ओन, ‘अना एंग्है बंगासी आसीस ख़क्खका आलारो, बरा, आ राजी ही अदिया ननू मना कला, एकदा हुल्लो ती निमा सपड़ाचका र'ई। 35एन्देरगेका ऎन कीड़ा रहचकन नीम एंगन मंडी ओन्ताचकर, ऎन ओन्क'आ रहचकन नीम अम्मु ओन्ताचकर, ऎन नन-राजियन रहचकन नीम एंगन निम्है एड़पा नू ओकोरताचकर, 36ऎन लंगड़ा रहचकन नीम एंगन किचरी अत्ताचकर, ऎन बेमरहा रहचकन नीम एंगन ईरकर ख़ूजकर, ऎन जेहेल नू रहचकन नीम एंगन भेंटार'आ बरचर।’
37आ बारी उजगो आलर आनाकिर्त'ओर, ‘अना उर्बायो, इकला ऎम निंगन कीड़ा ईरकम ती ओन्ताचकम, मलता ओन्क'आ ईरकम ती निंगन अम्मु ओन्ताचकम? 38ऎम इकला नन-राजियय ईरकम ती एम्है एड़पा नू ओकोरताचकम? मलता लंगड़ा ईरकम अरा किचरी अत्ताचकम? 39ऎम इकला निंगन बेमरहा ईरकम मलता जेहेल नू ईरकम ती निंगन भेंटार'आ बरचकम?’ 40होले ऎन बॆलन आरिन किर्त'अर ब'ओन, ‘ऎन निमन मानिम ब'अदन, नीम इबड़ा एंग्है सन्नी ती सन्नी भइय्योर नॆखअम गने नंजकर अदिन एंग्है गनेम नंजकर।’
41आ बारी ऎन बॆलन डेब्बा पक्खे ता आलारिन ब'ओन, ‘अना सरपारका आलारो, एंग्है मुन्द ती आ मल तेभ्रना चिच्ची नू किर्रिम बि'आ, एकदा नाद अरा अदही पैकर गे सपड़ाचका र'ई। 42एन्देरगेका ऎन कीड़ा रहचकन नीम एंगन मंडी मल ओन्ताचकर, ऎन ओन्क'आ रहचकन नीम एंगन अम्मु मल ओन्ताचकर। 43ऎन नन-राजियन रहचकन नीम एंगन निम्है एड़पा नू मल ओकोरताचकर, ऎन लंगड़ा रहचकन नीम एंगन किचरी मल अत्ताचकर, अरा ऎन बेमरहा अरा जेहेल नू रहचकन नीम एंगन मल ईरकर ख़ूजकर।’
44आ बारी आर किर्त'अर ब'ओर, ‘अना उर्बायो, ऎम निंगन इकला कीड़ा मलता ओन्क'आ मलता नन-राजियय मलता लंगड़ा मलता बेमरहा मलता जेहेल नू ईरकम, अरा निंग्है तेतर-सुसर मल नंजकम?’ 45आ बारी ऎन बॆलन किर्त'अर ब'ओन, ‘ऎन निमन मानिम ब'अदन का नीम इबड़ा सन्नी ती सन्नीर गने नॆखअम संगे मल नंजकर, अदिन एंग्है गने हूँ मल नंजकर।’ 46अरा ईर मुंजामलका गूटी दंडे भोग'आ गे क'ओर, लिकिन उजगो आलर मुंजामलका उज्जना नू कोर'ओर।”#दानि 12:2
Currently Selected:
मत्तायोस 25: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
