मत्तायोस 23
23
सात ओहरे
(मर 12:38-40; लूक 11:37-52; 20:45-47)
1ख़ने येसुस गोंहड़ा ती अरा तंग्है चेलर ती बाचस, 2“नॆग सिखाब'उर अरा फरिसीर मूसासी गदिया नू उक्का र'अनर। 3औंगे उर्मिन आर निमन नना गे आनोर अदिन नना अरा मन'आ, लिकिन आर ही लेक्खा नलख अमके नना, एन्देरगेका आर ब'अनर लिकिन मल नन्नर। 4आर गा ओत्था चिर्खिन चॊद'आ गे जोगड़नर अरा अबड़न आलर ही ख़ेसेर नू लदनर, लिकिन ताम तम्है अंगली ती हूँ चॊद'आ मल बेद्दनर।
5आर आलारिन ऎद'आ गे तम्है उर्मी नलखन नन्नर, आर तम्है ताबीजन चकड़ नन्नर अरा तम्है फुदनन जुर्त'अनर।#मत्ता 6:1; व्य 6:8; गन 15:38 6अरा मदी गुट्ठी नू मईन अड्डा अरा गोड़हा एड़पा गुट्ठी नू मुध मचिया गुट्ठी नू ओक्कना, 7बजार गुट्ठी नू मोंजरा अरा आलर नू ‘गुरु’ बारना आर गे दौ लग्गी।
8लिकिन नीम ‘गुरु’ अमके बार'आ, एन्देरगेका निम्है गा ओर्तलेका गुरु र'अस अरा नीम ओर्मर भइय्योर हिकदर। 9अरा ख़ॆख़ेल नू नॆकन हूँ बबा अमके ब'आ, एन्देरगेका निम्है ओर्तलेका बंगस र'अस, आस मेर्ख़ा नू र'अस। 10अरा नीम ‘मुद्धस’ हूँ अमके बार'आ, निम्है गा ओर्तलेका मुद्धस र'अस, आस मसीस। 11नॆ निम्है ती कोहाँ मना बेद्दोर आस निंग्है जॊंख़ मन्दस नेकअन।#मत्ता 20:26,27; मर 9:35; 10:43,44; लूक 22:26 12एन्देरगेका नॆ तमन कोहाँ ननो आर सन्नी नन्तार'ओर अरा नॆ तमन सन्नी ननो आर कोहाँ नन्तार'ओर।#लूक 14:11; 18:14
13अना उतुरमाड़ू नॆग सिखाब'ऊ अरा फरिसीरो, ओहरे निमा। नीम आलर ही मुन्दहारे मेर्ख़ा बलिन मुच्चदर। नीमिम हूँ कोरदर मला अरा कुर'उरिन हूँ कोर'आ मल चि'अदर।
[14अना उतुरमाड़ू नॆग सिखाब'ऊ अरा फरिसीरो, ओहरे निमा। नीम रड़ियाहिरिन ठकदर ती आरिन अमल'अदर। अरा नीम धरम नू निमन कोहाँ ऎद'आ गे दिगहा दिगहा बिन्ती नन्दर। औंगे धर्मेस निमा गे कोड़हे दंडे चि'ओस दिम।]
15अना उतुरमाड़ू नॆग सिखाब'ऊ अरा फरिसीरो, ओहरे निमा। नीम ओर्त आलासिन निम्है ख़ोंड़हा नू ओन्द्र'आ गे समुदर अरा ख़ॆख़ेल नू कुद्दका कुद्ददर। लिकिन आस ख़ोंड़हा नू बरदस होले निमन ती कोड़हे नरक ही ख़द्द कमदर चि'अदर।
16निमा ओहरे, कना कड़हाब'उरो, नीम ब'अदर का ‘नीकईम धर्मेसी मन्दिर ही किरया मॊख़ोर होले आद एन्द्रा हूँ मल्ली, लिकिन नीकईम धर्मेसी मन्दिर ता सोना ही किरया मॊख़ोर होले, अदन पूरा नन्ना दिम र'ई।’ 17अना बोक्को अरा कना आलरो, एन्द्रा कोहाँ र'ई सोना का सोना आबोन नेम्हा ननू धर्मेसी मन्दिर? 18नीम अउरिम एन्ने ब'अदर, ‘नीकइम गोड़हा ही किरया मॊख़ोर होले आद एन्द्रा हूँ मल्ला, लिकिन अइय्या ता दाँड़े ही किरया मॊख़ोर होले, अदन पूरा नन्ना दिम र'ई।’ 19अना कना आलारो, एन्द्रा कोहाँ र'ई अरगका दाँड़े का दाँड़ेन नेम्हा ननू गोड़हा? 20औंगे नॆ गोड़हा ही किरया मॊख़दस आस अदही अरा ऎ बग्गे अइय्या र'ई अदही हूँ किरया मॊख़दस। 21अरा नॆ धर्मेसी मन्दिर ही किरया मॊख़दस आस मन्दिर ही अरा मन्दिर नू र'अदस आसी हूँ किरया मॊंख़दस। 22अरा नॆ मेर्ख़ा ही किरया मॊख़दस आस धर्मेसी बॆल-गदिया ही अरा अइय्या उक्कुसी हूँ किरिया मॊंख़दस।#यसा 66:1; मत्ता 5:34
23अना उतुरमाड़ू नॆग सिखाब'ऊ अरा फरिसीरो, ओहरे निमा। नीम फुदेना, सौंप अरा जीरा ही गा दसवान्स चि'अदर। लिकिन नीम नॆग ही मुद्ध कत्था नेंवई, सोग्गे, पत्त'अना गुट्ठिन अम्बका चिच्कादर। इबड़न गा नन्ना र'ई अरा अबड़न अम्बना मल रहचा।#लौव्य 27:30 24अना कना कड़हाब'उरो, नीम सन्नी कत्थन गा कोड़हे चिहुंक नन्दर, लिकिन कोहाँ कत्थन चिहुंक मल नन्दर।
25अना उतुरमाड़ू नॆग सिखाब'ऊ अरा फरिसीरो, ओहरे निमा। नीम मौनी दरा छिपन बहरी बहरी मंजदर, लिकिन निम्है भितरी चिबाख़ारना अरा लोभ निंदकी र'ई। 26अना कना फरिसीरो, मुन्द मौनी अरा छिपन भितरी मंज'आ का आद बहरी हूँ सफा मनो।
27अना उतुरमाड़ू नॆग सिखाब'ऊ अरा फरिसीरो, ओहरे निमा। नीम चुन्ना ईगका मसड़ा लेक्खा र'अदर, आद बहरी ती गा फब'ई, लिकिन भितरी केच्चकर ही ख़ॊचोल अरा उर्मी बेसे कित्तका चंअना ती निन्दकी र'ई।#तइ 23:3 28एन्नेम नीम आलर गे उजगो ऎथ्रदर, लिकिन जिया भितरी उतुरमाड़ना अरा नॆग टांड़ना निंदकी र'ई।
29अना उतुरमाड़ू नॆग सिखाब'ऊ अरा फरिसीरो, ओहरे निमा। नीम धर्मेसी कत्था तिंगुर अरा नन्ना उजगो आलर ही मसड़ा गुट्ठिन कमदर अरा अबड़न सिंगर'अदर। 30अरा नीम ब'अदर, ‘ऎम एम्है पूरखर ही परिया नू रहचकम होले धर्मेसी कत्था तिंगुर ही पिटना नू आर ही गने मल मेस्र'ओम दने।’ 31एन्ने ती गा नीम नीमिम तेंग्रदर का नीम धर्मेसी कत्था तिंगुरिन पिटुर ही ख़द्दर हिकदर। 32अरा नीम निम्है पूरखर ही ख़ॊख़ा ऎकदर अरा आर ही लेक्खा नलख नन्दर।
33अना नेर्रे अरा करैत गुट्ठी लेक्खा बिक्ख ती निन्दका आलारो, नीम नरक ही मुंजा मलका दंडे ती एकासे बछ्र'ओर?#मत्ता 3:7; 12:34; लूक 3:7 34औंगे मेना! ऎन निम्है गुसन धर्मेसी कत्था तिंगुरिन अरा लुरगर आलारिन अरा नॆग सिखाब'उरिन तइय्यालदन। आर ती जोक्कोरिन नीम पिटोर अरा क्रुस नू ठोक'ओर, अरा जोक्कोरिन गोड़हा एड़पा नू कोर्रा ल'ओर अरा ओन्टा नगरे ती नन्ना नगरे खेच्का कुद्दोर। 35औंगे उजगो आलस हाबेलसी पिट्रना ती धर्मेसी मन्दिर नू नेम्हा अड्डा अरा गोड़हा ही मझी नू नीम पिटका बराख़ियसी तंग्दस जकरियासी पिट्रना गूटी, नीम ख़ॆख़ेल नू पिटका उर्मी उजगो आलर ही बदी निम्है कुक्कु नू मनो।#उत्प 4:8; 2इति 24:20,21 36ऎन निमन मानिम ब'अदन, ‘नीम अरा निम्है पूरखर नंजका उर्मी मलदौ गे धर्मेस निमा गे दंडे चि'ओस।’
येसुस येरुसलॆम गे खोबरारदस
(लूक 13:34,35)
37अना येरुसलॆम ता आलारो, नीम धर्मेसी कत्था तिंगुरिन पिटकर अरा नॆकन निम्है गुसन ऎन तइरकन आरिन पखना ल'अदर ती पिटदर। ढ़ॆर हॆल धर्मेस बिद्दयस का ख़ॆर तंग्है ख़द्दन डेना किइय्या ख़िवड़'ई, अन्नेम धर्मेस हूँ निम्है ख़द्दारिन ख़ेवड़'ओस, लिकिन नीम एन्ने नना मल चिच्चकर। 38ऎरा, निम्है एड़पा निमा उझड़ारका अम्बतार'ई।#यिर्म 22:5 39ऎन गा निमन ब'अदन, ‘नॆ उर्बासी नामे ती बरदस आस आसीस ख़क्खू र'अदस’ एन्ने नीम अरगी ब'अना बेड़ा गूटी नीम एंगन अउरिम मल ऎरोर।”#भज 118:26
Currently Selected:
मत्तायोस 23: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
