मत्तायोस 21

येरुसलॆम नू येसुस जितचका बॆलस बेसे कोरदस

(मर 11:1-11; लूक 19:28-38; यॊ 12:12-19)

1फेन येसुस अरा आसी चेलर येरुसलॆम गुसन अंड़सियर, अरा जैतून मन्न परता नू बॆतफगे नू बरचर। ख़ने ऎंड़ चेलारिन एन्ने बाचस ती तइय्यस, 2“मुन्‍दहारे ता पद्दा नू कला, अइय्या कोरना गनेम लॆम ओन्‍टा गदही खुटुरका अरा अदही गने ख़द्दो निमा ख़क्‍ख्र'ओ। अबड़न बिछ्र'आ ती एंग्‍है गुसन ओन्‍द्र'आ। 3अरा नीकईम निमन एन्‍देर ननालदर ब'अरकी मेनोर होले, नीम ब'अके एम्‍है उर्बस गे इदही चाड़ र'ई, अरा आस अबड़न लॆम तइय्योस चि'ओस।”

4ईद इदगे मंजा का धर्मेसी कत्‍था तिंगुर ती बातारकी रहचा आद मनो, एकासे का,

5“येरुसलॆम ता आलारिन ब'आ,

‘ऎरा, निंग्‍है बॆलस निंग्‍है गुसन बर'आलदस।

आस लुदऊ र'अस, अरा गदहा नू ओक्‍कदस ती,

गदही ख़द्द नू ओक्‍कदस ती बरदस’।”#जक 9:9

6अबड़ा ऎंड़ चेलर केरर ती एकासे येसुस बाचकाचस अन्नेम नंजर। 7गदही अरा ख़द्दोन येसुस गुसन ओन्द्रर, अरा अदही म‍इय्‍याँ तम्‍है किचरी गुट्ठिन नंजर, अरा येसुस अइय्‍या उक्‍कियस। 8ख़ने कोड़हे आलर तम्‍है किचरी गुट्ठिन डहरे नू अट्टियर, अरा नन्नर मन्न ता डहुड़न खं‍डियर ती डहरे नू अट्टियर। 9आसी मुन्‍द ईकुर अरा ख़ॊख़ा ईकुर चिच्चि‍यारनुम ब'आलियर,#भज 118:25,26

“दाऊदसी ख़द्दस गे महबा मनन!#21:9 युनानी भखा नू ‘होसान्ना’ लिख्रकी र'ई।

धर्मेस ईसिन बरकत नन्‍दस नॆ उर्बासी आकुस#21:9 युनानी भखा नू “नामे नू” लिख्रकी र'ई। गने बरदस।

उर्मी ती म‍इय्याँ मेर्ख़ा नू र'ऊ धर्मेसी महबा मनन!”#भज 118:25,26

10आस येरुसलॆम नगरे नू कोर्चस ख़ने, सौंसे नगरे ता आलर अकबकरर केरर, अरा मेंजर, “ईस एका ओर्तस?” 11अरा आलर बाचर, “गलिलेया जिला ही नासरेत पद्दा ता धर्मेसी कत्‍था तिंगू येसुस।”

येसुसी धर्मेसी मन्दिर आबोन सफा नन्ना

(मर 11:15-19; लूक 19:45-48; यॊ 2:13-22)

12येसुस धर्मेसी मन्दिर चाली नू कोर्चस। असन आलर दाँड़े नन्ना ही मेक्‍खोन ख़ॆंदा पिटालियर।#21:12 एन्ने आलर ओहमा अड्डन नठाब'आलियर। ख़ने येसुस आरिन अइय्या ती बहरी ओथ्रस अरा रोम राजी ता ढिबन धर्मेसी मन्दिर ही ढिबा नू बदलुर ही कं‍डोन, अरा पेरवाँ बीसुर ही मचियन हूँ बिड़दाचस चिच्‍चस। 13अरा आस बाचस, “नेम्हा पुथी नू ईद एन्ने लिख्रकी र'ई का,

‘एंग्‍है मने र'ई का एंग्‍है एड़पन एंगन ओहमा नन्ना अरा बिन्‍ती नन्ना ही एड़पा ब'ओर।’

लिकिन नीम इदिन डाकुर ही अड्डा कमचका चिच्कादर।”#यसा 56:7; यिर्म 7:11

14अन्धहा अरा लेंगडर धर्मेसी मन्दिर नू आसी गुसन बरचर, अरा आरिन आस कोड़े नं‍जस। 15लिकिन मुध नैगर अरा नॆग सिखाब'उर इबड़ा अकबक नलख गुट्ठिन ईरयर एकदन येसुस नंजस। अरा ख़द्दर धर्मेसी मन्दिर नू “दाऊदसी ख़द्दस गे धर्मेसी महबा मनन” एन्ने चिच्चियारनन मेंजर। ख़ने आर कैर मं‍जर, 16अरा येसुसिन बाचर, “नीन मेन्दय का ई ख़द्दर एन्‍देर ब'आलनर?” येसुस बाचस, “हाँ, एन्‍देर नीन नेम्हा पुथी नू इकलअम मल्‍ला पढ़चका का: ‘ख़द्दर अरा बॊलॊ ख़द्दर ही बई ती नीन ओहमा ख़क्‍खकय?’”#भज 8:2 17अरा आस आरिन अम्‍बियस ती बेतानिया पद्दा केरस अरा माख़ा असन रहचस।

येसुस अंजीर मन्नन सरपाचस

(मर 11:12-14,20-24)

18पहपहरना बेड़ा येसुस एकाबारी येरुसलॆम नगरे गे किर्रालियस ख़ने, आस गे कीड़ा लग्‍गिया। 19डहरे नू ओन्‍टा अंजीर मन्‍नन ईरयस ती आस अदही गुसन केरस। लिकिन अइय्या अतख़न अम्‍बर एन्‍दरन हूँ मल ख़क्‍खियस ती अदिन आनियस, “अक्‍कु ती इकला हूँ मल ख़ंज'ओय!” अरा अंजीर मन्न लॆम ख़इय्या केरा। 20अरा इदिन ईरियर ती चेलर अकबक मंजर अरा अबड़र बाचर, “ई अंजीर मन्न लॆम एकासे ख़इय्या केरा?”

21ख़ने येसुस आरिन आनाकिर्ताचस, “मानिम ऎन निमन ब'अदन, नीम पत्त'ओर अरा मल धुकचुक्र'ओर होले, ई अंजीर मन्न गे मंजकी र'ई अदिन लेका मला, लिकिन ई परतन हूँ ब'आ ओंग्दर, ‘चड्र'अय ती कलय समुदर नू खत्र'अय’, अरा अन्नेम मनो।#मत्ता 17:20; 1कोरि 13:2 22अरा उर्मिन नीम पत्त'आनुम निम्‍है गोहरारना नू ने'ओर, अबड़ा उर्मी निमा ख़क्‍ख्र'ओ।”

येसुसी अदिया ही पत्त नू मेन्ना

(मर 11:27-33; लूक 20:1-8)

23तहाँ आस धर्मेसी मन्दिर नू केरस ती सिखाब'आ लगियस ख़ने, मुध नैगर अरा सेयान आलर आसी गुसन बरचर ती आसिन मेंजर, “नीन इबड़ा नलखन नॆखा आकुस ती ननालदय? अरा निंगा इबड़न नन्ना ही आकुस नॆ चिच्‍चा?” 24येसुस किर्त'अर बाचस, “ऎन हूँ निमन ओन्‍टा कत्‍था मेन्‍दन। अदिन किर्त'अर तेंगोर होले, ऎन हूँ निमन तेंगोन का ऎन इबड़ा नलखन नॆखा आकुस ती नन्‍दन। 25यॊहनस गे नॊड़रत'अना ही आकुस धर्मेस चिच्‍चस का आलर चिच्‍चर? अदिन एंगन तेंगा।” ख़ने आर ताम तामिम कछनख्रर ती बाचर, “नाम धर्मेस आकुस चिच्‍चस ब'ओत होले, आस नमन ब'ओस, ‘अन्नु हूँ नीम एन्‍देरगे यॊहनसिन मल पत्ताचकर?’ 26लिकिन आलर आकुस चिच्‍चर ब'ओत होले, आलर ती इल्चका र'ई। एन्‍देरगेका ओर्मर यॊहनसिन धर्मेसी कत्‍था तिंगू मननर।” 27औंगे आर येसुसिन किर्त'अर बाचर, “ऎम बलदम।” ख़ने येसुस आरिन बाचस, “नीम एंगन मल तिंकर औंगे ऎन हूँ निमन मल तेंगोन इबड़ा नलखन नॆखा आकुस ती नन्दन।

ऎंड़ ख़द्दर ही जोक्‍खा ख़ीरी

28नीम एन्‍देर इदही पत्त नू सोचदर? एकअम आलासी ऎनोटा ख़द्दर रहचर। आस कोहँस गुसन केरस ती बाचस, ‘बेटा, इन्ना अंगुर बटकी नू नलख नना कला।’ 29आस आनाकिर्ताचस, ‘ऎन मल क'ओन।’ लिकिन ख़ॊख़ा पस्‍तारस ती केरस। 30फेन तम्‍बस सन्निस गुसन केरस ती अन्नेम बाचस। आस आनाकिर्ताचस, ‘कालदन।’ लिकिन मल केरस। 31इबड़र ती एका ओर्तर तम्‍बासी मने लेक्‍खा नंजर?” अबड़र बाचर, “कोहँस।” येसुस आरिन बाचस, “ऎन निमन मानिम ब'अदन का ऊज'उर अरा खिल्डिर निमन ती मुन्‍द धर्मेसी राजी नू कोरनर। 32एन्‍देरगेका यॊहनस गा उज्‍जा गे उजगो डहरेन ऎद'आ गे निम्‍है गुसन बरचस। आसिन नीम मल पत्ताचकर, लिकिन ऊज'उर अरा खिल्डिर आसिन पत्ताचर। अन्‍ति नीम इदिन ईरकर ती ख़ॊख़ा हूँ आसिन पत्त'आ गे मल पस्‍तारकर।#लूक 3:12; 7:29,30

ठिका होच्चका उर्बर ही जोक्‍खा ख़ीरी

(मर 12:1-12; लूक 20:9-19)

33अउर ओन्‍टा जोक्‍खा ख़ीरिन मेना, ओन्‍टा ख़ल्ल उर्बस रहचस। आस ओन्‍टा अंगुर ही बटकी हंड़चस, अरा ओनबेंड़र'आ कुर्गस, अरा अइय्या अंगुर ती रासी ओथ्र'आ गे चचड़ी नू कुंडा कमचस, अरा ख़ापा गे मचा कमचस, अरा अदिन उर्बर गे ठिका चिच्‍चस ती नन्ना राजी किर्रिमबिच्चियस।#यसा 5:1,2 34फिन खंजना ही बेड़ा अंड़सिया ख़ने आस जॊंख़ारिन ठिका होच्चका उर्बर गुसन हिसा ओन्‍द्र'आ गे त‍इय्‍यस। 35लिकिन आर आसी जॊंख़ारिन धरचर अरा ओर्तोसिन लौचर, अरा नन्नासिन पिटियर अरा अउर ओर्तासिन पख़ना ती लोड़गर। 36फिन आस मुन्‍द ता जॊंख़र ती बग्‍गे नन्ना जॊंख़ारिन त‍इय्‍यस। अरा आर आरिन हूँ अन्नेम नंजर। 37छेद्दे नू आ उर्बस एन्ने सोच'अरकी तंग्‍दासिन आर ही गुसन त‍इय्‍यस का आर एंग्दासिन म‍ईन ननोर।

38लिकिन ठिका होच्चका उर्बर तंग्‍दासिन ईरियर ती ताम ताम बाचनखरर, ईसिम गा पुंजी हिकदस, बरा नाम ईसिन पिटोत ती ईसी बटकी आबोन हो'ओत। 39अन्नेम आर आसिन धरचर अरा अंगुर बटकी ती बहरी ओथ्रर ती पिटियर। 40औंगे अंगुर बटकी उर्बस बरदस ख़ने, अबड़ा ठिका होच्‍चका उर्बर गने एन्‍देर ननोस?”

41अबड़र आसिन बाचर, “आस अबड़ा मलदौ आलारिन पिटा ख़च्‍चोस, अरा अंगुर बटकी ही ठिका नन्‍ना उर्बर गे चि'ओस नॆ आस गे ख़ंजपा आबोन ख़ंजना बेड़ा नू अंड़सत'ओर।” 42येसुस आरिन बाचस, “नीम नेम्हा पुथी नू इदन मल्‍ला पढ़चका का?#भज 118:22,23

‘एका पखना आबोन राजमिस्‍त्रीर तरकूटी ताड़चका रहचर,

आ पखना दिम गोट्टा एड़पन बड़ियर ननू पखना मंजा केरा।

उर्बस इदन नंजस,

अरा नम्‍है ऎरना नू ईद अकबक र'ई।’

43औंगे ऎन निमन ब'अदन का धर्मेसी राजी निम्‍है ती होतार'ओ अरा अदही ख़ंजपा चि'अना आलर गे चीर'ओ। 44अरा ई पखना नू खत्तर'ओर अबड़ा ओर्मर कुटकूटा मनोर क'ओर, अरा नॆखा म‍इय्याँ आद खत्तर'ओ आरिन ख़ोसो चि'ओ।”

45मुध नैगर अरा फरिसीर येसुसी जोक्‍खा ख़ीरिन मेंजर ख़ने, आर अगमाचर का आस तम्‍है पत्त नू कछनख्रदस। 46अरा आर आसिन धर'आ बिद्दियर, लिकिन आलर ती इल्‍चियर का आर आसिन धर्मेसी कत्‍था तिंगुस मन'आलियर।

Currently Selected:

मत्तायोस 21: KURUXBSI

Highlight

Copy