मत्तायोस 16

अकबक ही चिन्‍हा ने'अना

(मर 8:11-13; लूक 12:54-56)

1उन्‍दुल फरिसीर अरा सदुकीर येसुस गुसन बरचर ती आसिन बिढ़'आ गे आसिन बाचर, “एमन मेर्ख़ा ता इन्द्रिइम अकबक ही चिन्‍हा ऎद'आ।”#मत्ता 12:38; लूक 11:16

2येसुस आरिन आनाकिर्ताचस, (“पुतबारी मेर्ख़ा ख़ॆंसो र'ई होले, नीम ब'अदर, इन्ना रगी ननो। 3अरा पैरी बारी मेर्ख़ा ख़ॆंसो अरा धुंधरहा र'ई होले नीम ब'अदर, इन्ना धूका मनो। नीम मेर्ख़ा ता ऎथ्रनन ऎरदर ती लख'आ ओंग्दर, लिकिन अक्‍कु एन्‍देर मना लगी अदिन नीम बुझ्र'आ पोलदर।) 4मलदौ अरा नन्ना आली गुसन कालू आलर ही परिया ता आलर अकबक नलख ही चिन्‍हा बेद्दनर, लिकिन धर्मेसी कत्‍था तिंगू यॊनासी उज्‍जना नू मंजका अकबक नलखन अम्‍बरकी आर गे नन्ना एन्‍देर चिन्‍हा हूँ मल चितार'ओ।” अरा आस आरिन आम्‍बियस ती किर्रिम बिच्‍चियस।#मत्ता 12:39; लूक 11:29

फरिसीर अरा सदुकीर ही सिखाब'अना

(मर 8:14-21)

5ख़ॊख़ा चेलर समुदर ही आ पक्‍खा अंड़सियर, अन्‍ति आर असमा हो'आ मॊधरर केरर। 6येसुस आरिन चेताबाचस, “ऎरा, नीम फरिसीर अरा सदुकीर ही बिदगी#16:6 येसुस इसन फरिसीर अरा हॆरॊदॆर ही उत्तुरमाड़ू चालन अरा सिखाब'अनन ‘बिदगी’ ब'अदस। मत्ता 16:12 ती नाम इदन अख़'आ ओंग्दत। ही पत्त नू बड़ियर र'अके।”#लूक 12:1 7आर तम्‍है नू आनानखर'आ हेलरर, “आस इदन ब'अदस एन्‍देरगेका नाम असमा मल्‍ला ओन्‍द्रका।” 8लिकिन इदिन अक्‍खस ती येसुस आरिन बाचस, “अना पत्त'अना नू पयहा आलारो, निम्‍है गुसन असमा मल्‍ला अदही पत्त नू नीम एन्‍देरगे बाचनखर'आ लगदर? 9नीम अक्‍कुन गूटी बलदर अरा मल बुझुरदर का? एंग्‍है नंजका अकबक नलख निमा गे सुरता मल र'ई का? ऎन पांच हजार आलर गे पांच गोटंग असमा ती ओन्‍ताचका बेड़ा नीम असमा ही एंगरका टुटकन पेत्तकर ती एवन्‍दा ड‍उड़ा निन्‍दकर?#मत्ता 14:17-21 10महले ऎन चार हजार आलर गे सात गोटंग असमा ती ओन्‍ताचका बेड़ा नीम असमा ही एंगरका टुटकन पेत्तकर ती एवन्‍दा ड‍उड़ा नू निन्‍दकर?#मत्ता 15:34-38 11ऎन निमन असमा ही पत्त नू मल्‍ला बाचका। नीम एन्‍देरगे इदन मल बुझुरदर? ऎन गा फरिसीर अरा सदुकीर ही बिदगी ती चिहुंक र'आ गे ब'आलदन।” 12ख़ने चेलर बुझ्रर का येसुस असमा ता बिदगी ही नू मला लिकिन फरिसीर अरा सदुकीर ही सिखाब'आना ती चिहुंक र'आ गे आनका रहचस।

पतरस येसुसी पत्त नू तेंगना

(मर 8:27-30; लूक 9:18-21)

13येसुस कैसरेया फिलिप्‍पी चक नू बरचस ख़ने, तंग्‍है चेलारिन मेंजस, “मनवा ख़द्दन एंगन आलर एन्‍देर ब'अनर?” 14आर बाचर, “जोक्‍क आलर ब'अनर यॊहन नूड़रत'उस, अरा जोक्‍क आलर ब'अनर धर्मेसी कत्‍था तिंगू एलियस, अरा नन्नर ब'अनर येरेमियास महले चिरान ता धर्मेसी कत्‍था तिंगुर ती नन्ना ओर्तोस”#मत्ता 14:1,2; मर 6:14,15; लूक 9:7,8 15तहाँ आस आरिन मेंजस, “लिकिन नीम एंगन नॆ ब‍'अदर?” 16ख़ने सिमॊन पतरस आनाकिर्ताचस, “नीन मसी, उज्‍जना धर्मेसी ख़द्दय हिकदय।”#यॊ 6:68,69 17येसुस आसिन आनाकिर्ताचस, “अना सिमॊन यॊनासी ख़द्दय नीन आसीस ख़क्‍ख्रका आलय, एन्‍देरगेका एक‍अम आलस मला लिकिन एकास मेर्ख़ा नू र'ऊ एंग्‍है बंगस ई कत्‍थन निंगा गे दहदर नंजकादस। 18अउर हूँ ऎन निंगन ब‍'अदन का नीन पतरस#16:18 पतरस मने पखना। हिकदय, ऎन ई चचड़ी मइय्याँ एंग्‍है कलीसिया आबोन कम'ओन, अरा खे'अना ही सवंग अदन जित'आ पोल्‍लो। 19ऎन निंगा‍ मेर्ख़ा राजी ही कुँची गुट्ठिन चि'ओन, अउर नीन इन्द्रिइम ख़ॆख़ेल नू नना मल चि'अदय अदन धर्मेस हूँ नना मल चि'अदस, अरा नीन इन्द्रिइम ख़ॆख़ेल नू नना चि'अदय अदन धर्मेस हूँ नना चि'अदस।”#मत्ता 18:18; यॊ 20:23 20ख़ने येसुस चेलारिन चेताबाचस, नीम नॆकन हूँ अमके तेंगा का ऎन मसी हिकदन।

येसुस तंग्‍है खे'अना ही पत्त नू तेंगना

(मर 8:31—9:1; लूक 9:22-27)

21आ बेडा ती येसुस तंग्‍है चेलारिन तेंगा हेलरस का “एंगा गे येरुसलॆम काना दिम मनो, अइय्या यहूदी सेयान आलर अरा मुध नैगर अरा नॆग सिखाब'उर ती अजम खिलपत मन्ना मनो अरा पिटतार'ओन, लिकिन ऎन तीन उल्‍ला ख़ॊख़ा उज्‍जा चॊर'ओन।” 22ख़ने पतरस आसिन तरकूटी हो'अरकी कड़का हेलरस अरा बाचस, “उर्बायो, अम्‍बो मना का इकल'अम निंग्‍हा गने एन्ने मनो।” 23तहाँ आस किर्र ईरियस ती पतरसिन बाचस, “अना सैतान, एंग्‍है मुन्‍दहारे ती तरकूटी मना। नीन मूड़ना ही अड्डा हिकदय, नीन धर्मेसी सोचना लेक्‍खा मल सोचदय, आलर ही सोचना लेक्‍खा सोचदय।”

24फिन येसुस तंग्‍है चेलारिन बाचस,#मत्ता 10:38; लूक 14:27 “नीक‍ईम एंग्‍है चेला मना बेद्ददर होले, आर गे ताम तम्‍है नना बेद्दना लेका अम्‍बोर नना, ऊजी नू तम्‍है क्रुस#16:24 इय्या क्रुस ही माने ‘तंग्‍है मने ती खिलपत सहना अरा लज्‍जे मॊख़रना खे'आ गे हूँ’। आबोन चेड़'अरकी एंग्‍है गने चॊंख़्रना र'ई। 25एन्‍देरगेका नीक‍ईम तंग्‍‍है उज्‍जनन तंग्‍गा गे उज्‍जा बेद्ददस होले, आस धर्मेस गने जनमजुग ही उज्‍जनन एबस'ओस, लिकिन आस एंग्‍है चड्डे तंग्‍‍है उज्‍जनन चि'अदस होले, आस धर्मेस गने जनमजुग ही उज्‍जनन ख़क्‍खोस।#मत्ता 10:39; लूक 17:33; यॊ 12:25 26ओन्‍टा आलस ई ख़ॆख़ेल ता उर्मी जिनिसन अर्ज'ओस, अरा धर्मेस गने जनमजुग ही उज्‍जनन एबस'ओस होले, आस गे एन्‍देर नाफा मनो? आलस एबस्रका उज्‍जनन फेन ख़क्‍खा गे ऊजी नू एन्‍दरन हूँ चि'आ पोल्‍दस। 27मनवा ख़द्दन ऎन एम्‍बासी महबा अरा आसी पैकर गने किर्रोन। अरा आ उल्‍ला ऎन ओर्मर गे तम्‍‍है तम्‍‍है नलख लेक्‍खा ख़ंजपा चि'ओन।#मत्ता 25:31; भज 62:12; रोमी 2:6 28ऎन निमन मानिम ब'अदन, अक्‍कुन इसन इज्जका आलर ती जोक्‍कोर मनवा ख़द्दन ऎन बॆल लेक्‍खा किर्रनन बिगर ईरका मल खे'ओर।”

Currently Selected:

मत्तायोस 16: KURUXBSI

Highlight

Copy