लू‍कस 21

कीड़ा रड़ियाही ही दान

(मर 12:41-44)

1फिन येसुस उरुब आलारिन दान बकसा नू दान सजनन थिथाब'अर ईरियस। 2अरा आस ओन्‍टा कीड़ा रड़ियाही मुक्‍कन हूँ ऎंड़ सन्नी सिक्कन अइय्या सजना ईरियस। 3ख़ने आस बाचस, “ ऎन निमन मानिम ब'अदन, ई कीड़ा रड़ियाही मुक्‍का जम्मर ती बग्‍गे सज्‍जकी र'ई। 4एन्‍देरगेका इबड़ा ओर्मर तम्‍है खुर्जी ही बढ़ती ती सज्‍जर। लिकिन ईद नगदे कीड़ा आली हवे। ईद गुसन ऎ बग्‍गे रहचा उर्मिन सज्‍जा। ईद तंग्‍है उज्‍जा गे रहचा जम्मन धर्मेस गे चिच्‍चा।”

ख़ॆख़ेल मुंज्रना ही चिन्‍हा

(मत्ता 24:1-21,29-35; मर 13:1-19,24-31)

5फिन जोक्‍क आलर धर्मेसी मन्दिर ही पत्त नू ब'आ लगियर का, एकासे आद बॆस पखना अरा दान ती सिंगरारकी र'ई। ख़ने येसुस बाचस, 6“नीम ऎरदर ईद उर्मी, आ उल्‍ला बर'ओ का पखना म‍इय्याँ पखना मल र'ओ, उर्मी दिम धंसतार'ओ कालो।”

7आर येसुसिन मेंजर, “अना उर्बायो! इबड़ा कत्‍था इकला मनो? अरा इबड़ा कत्‍था जम्मा मनो, इदन अख़'आ गे एन्‍देर चिन्‍हा मनो?” 8आस आरिन बाचस, “चिहुंक र'आ, निमन नीक‍ईम अम्‍बोर ठक'आ। नगदे आलर एंग्‍है नामे ती बर'अरकी ब'ओर, ‘ऎन मसीस हिकदन’ अरा बेड़ा अंड़सा ख़च्‍चकी र'ई, नीम आर ही ख़ॊख़ा अमके काला। 9अरा इकला नीम लड़‍ई अरा हुलहुली गुट्ठी ही हलन मेनोर, आ बारी अमके बयार'आ। एन्‍देरगेका इबड़ा ही मुन्‍द मन्ना चाड़ र'ई, लिकिन मुंज्रना बेड़ा लॆम मल बर'ओ।”

10तहाँ आस आरिन बाचस, “ ओन्‍टा जातियर नन्ना जातियर ही बिड़दो नू, अरा ओन्‍टा राजी नन्ना राजी ही बिड़दो नू लड़ाई गे चो'ओ। 11अरा ख़ॆख़ेल नू कैनो अड्डा नू कोड़हे ख़ॆख़ेल नुकुरना अरा आकाल अरा कोहाँ कोहाँ बेमार गुट्ठी मनो। अरा मेर्ख़ा नू नगदे भयभयान ऎथ्रना अरा कोहाँ कोहाँ चिन्‍हा गुट्ठी ऎथ्र'ओ। 12लिकिन इबड़ा उर्मी कत्‍था ही मुन्‍द आलर निमन धर'अरकी सताब'ओर। अरा निमन गोड़हा एड़पा नू बिढ़'आ गे सोंप'ओर अरा जेहेल नू सज'ओर अरा बॆलर अरा राजीखापुर ही मुन्‍द इजतार'ओर। एन्‍देरगेका नीम एंग्‍है गने चॊंख़्र‍'उर हिकदर। 13लिकिन ईद निमा गे एंग्‍है पत्त नू आरिन तेंगना ही मोका मनो। 14औंगे नीम मुन्‍द तिम तम्‍है तम्‍है जियन सपड़'आ का ऎम एन्‍देर आनाकिर्त'ओम ब'अरकी अमा एल्‍चा।#मत्ता 10:17-20; लूक 12:11,12 15एन्‍देरगेका ऎन निमन एन्ने ब'अना अरा लूर चि'ओन का निम्‍है जम्मा बैरिर निम्‍है बिड़दो नू खंडा अरा इज'आ पोल्‍लोर। 16निंग्यो निम्‍बर अरा भइय्योर अरा पाहियर अरा संगेर हूँ निमन धरत'ओर अरा निम्‍है ती जोक्‍क आलारिन पिटोर। 17नगदे आलर निमन बिड़दो ननोर, एन्‍देरगेका नीम एंग्‍है गने चॊंख़्रकर। 18लिकिन निम्‍है कुक्‍क ता ओन्‍टा चुट्टी हूँ मल खत्तर'ओ। 19नीम बड़ियर सहना गने इज्जका र'ओर होले निम्‍है जियन लाड़ोर।#मत्ता 10:22

20एकाबारी नीम येरुसलॆम नगरेन ओनबेंड़र'आ ती फउद बेढ़चका ऎरोर। आ बारिम अख़के का अदही उझड़ारना अंड़सकी र'ई। 21अउलम यूदेया जिला नू र'उर परता म‍इय्याँ बोंके कालके।#दानि 9:27; 11:31; 12:11 अरा नॆ येरुसलॆम भितरी र'ओर आर गे बहरी उरखना मनो, अरा नॆ नगरे ही बहरी नू र'अनर आर अइय्या अम्‍बोर कोर'आ। 22एन्‍देरगेका इदिम दंडे चि'अना उल्‍ला मनो, एकत्रु धरम पुथी नू लिखचका उर्मी कत्‍था मंज ख़च्‍चो।#हो 9:7 23अबड़ा उल्‍ला नू ओत्‍था ऎख़ अरा ख़दमाख़ो मुक्‍कर गे नगदे सस्‍ती मनो। अरा ख़ॆख़ेल नू नगदे सस्‍ती मनो, अरा धर्मेस आलर म‍इय्याँ कोहाँ खींस ननोस। 24आर तबेल ती पिटतार'ओर, अरा उर्मी राजी नू हें'अरकी होतार'ओर। अरा नन-यहूदी आलर ही उल्‍ला अरगी मन्ना गूटी येरुसलॆम आर ही आकुस नू र'ओ।

25चन्‍दो बीड़ी अरा बीनको नू चिन्‍हा गुट्ठी ऎथ्र'ओ। अरा समुदर अरा लहरा ही ख़रख़ना ती ख़ॆख़ेल नू राजी राजिन्‍ता आलर एलचोर अरा अन्‍भूल मनोर।#यसा 13:10; यहेज 32:7; योए 2:31; दहद 6:12,13 26आलर ख़ॆख़ेल नू बरना खिलपत ही पाब ऎरना ती बयार'ओर अरा केचका आलर लेक्‍खा मनोर, एन्‍देरगेका धर्मेस मेर्ख़ा नू र'ऊ उर्मी आलॊन नुक'ओस। 27फिन उर्मी आलर मनवा ख़द्दन एंगन बदाली नू बरनन ऎरोर। अरा एंगा ख़ॆख़ेल ता आलारिन राजी नना गे कोड़हे महबा अरा आकुस मनो।#दानि 7:13; दहद 1:7 28अरा इकला इबड़ा कत्‍था ही ऒड़ मनो नीम मॆन ऎररकी इज्जका र'अके। एन्‍देरगेका निम्‍है नाड़रना लॆम बर'ऊ र'ई।”

29तहाँ येसुस आरिन ई जोक्‍खा ख़ीरिन तिंगियस। “अंजीर मन्नन अरा उर्मी नन्ना मन्नन ऎरा। 30अबड़ा नू ख़ॊरनन नीम ऎरदर होले, नीम अख़दर का बिड़ना उल्‍ला अंड़सिया। 31ई लेक्‍खम इकला नीम इबड़ा कत्‍थन एन्ने मन्नुम ऎरोर, निमा अख़ना र'ई का धर्मेस आलारिन राजी नन्ना ही बेड़ा हेद्दे र'ई। 32ऎन निमन मानिम ब'अदन, एका गूटी इबड़ा उर्मी कत्‍था मनो आ गूटी ई परिया ता जोक्को आलर उज्‍जोर। 33मेर्ख़ा अरा ख़ॆख़ेल छपर'ओ कालो, लिकिन एंग्‍है कत्‍था मनो दिम।

34नीम चिहुंक ननके। ख़ॆख़ेल ता ओन्ना-मॊख़ना ही चिबाख़ारना अरा उंखना अरा ख़ॆख़ेल ही जिनिस ता फिकर ती निम्‍है जिया अम्‍बन बेहड़ार'आ का आ उल्‍ला निमा गे ‍अचका ही ‍अंड़सा ख़च्‍चो। 35आद गा ख़ॆख़ेल ता ओर्मा र'ऊ आलर म‍इय्याँ एन्नेम फन्‍दा बेसे बर'ओ। 36औंगे उर्मी बेड़ा एज्रका र'आ। अरा गोहरार'आ का बर'ऊ अबड़ा जम्मा खिलपत ती बछर'आ गे सवंग अरा मनवा ख़द्दन एंग्हा मुन्‍दहारे इजना जॊगे मन्‍दर नेक‍अन।”

37येसुस उल्‍ला बारी धर्मेसी मन्दिर ही चाली नू सिखाब'आ लगियस, अरा माख़ा बारी नगरे ही बहरी कालरकी जैतून नामे परता नू र'आ लगियस।#लूक 19:47 38अरा पैरिम ओर्मा आलर आसहीन मेना गे धर्मेसी मन्दिर ही चाली नू आसी गुसन बर'आ लगियर।

Currently Selected:

लू‍कस 21: KURUXBSI

Highlight

Copy