लू‍कस 19

ऊज'ऊ जक्‍क'ईस

1येसुस येरिहॊ नू कोरचस ती काला लगियस। 2असन जक्‍कई नामे ओर्त आलस रहचस। आस मुध ऊज'उस अरा उरुब रहचस। 3आस येसुसिन नॆ ब'अरकी ऎरा बिद्दियस। लिकिन आस पुड्डा रहचका चड्डे गोंहड़ा ती ऎरा पोल्‍ला लगियस। 4ख़ने आस मुन्‍द बोंगस अरा आसिन ऎरा गे ओन्‍टा डुम्‍बारी मन्न नू अरगियस। एन्‍देरगेका येसुस आ डहरे नू काना रहचा। 5अरा येसुस आ अड्डा अंड़सियस ख़ने, मॆन ईरियस ती आसिन बाचस, “अना जक्‍कई, लॆम एत्ता बरा, इन्ना एंगा गे निंग्‍है एड़पा नू र'अना र'ई।” 6ख़ने आस लॆम इत्तियस ती रिझ गने आसिन तंग्‍है एड़पा होच्‍चस। 7ख़ने ओर्मर इदन ईरियर ती टुरपुसर'आ हेलरर का ईस पपहस गुसन पाही कोरचस। 8जक्‍कईस उर्बासी मुन्‍द इज्‍जस ती बाचस, “अना उर्बायो! ऎन एंग्‍है ओन भाग खुर्जिन किड़र गे चि'ओन, अरा नेखैन नेंव‍ई ती बिड़दो होच्‍चकादन होले, आर गे चार गुना किर्रत'ओन चि'ओन।” 9ख़ने येसुस आसिन बाचस, “इन्ना ई एड़पा गे नाड़ना बरचा, एन्‍देरगेका ईस हूँ गा अब्राहमसी ख़द्दस र'अदस। 10मनवा ख़द्दन ऎन एबस्रकारिन बेद्दा अरा नाड़ा बरचकादन।”#मत्ता 18:11

तीन जॊंख़र ही जोक्‍खा ख़ीरी

(मत्ता 25:14-30)

11आलर इबड़ा कत्‍थन मेना लगियर ख़ने, येसुस ओन्‍टा जोक्‍खा ख़ीरी तिंगियस। एन्‍देरगेका आस येरुसलॆम हेद्दे रहचस अरा आर सोच'आ लगियर का धर्मेसी राजी लॆम दहदर मन्ना र'ई। 12आस बाचस, “ओन्‍टा उर्बस तंगा गे बॆल अदिया ख़क्‍खा ती फिन किर्रा गे गेच्‍छा राजी केरस। 13आस काना ती मुन्‍द तंग्‍है दस जॊंख़ारिन मीख़ियस अरा आर गे दस गोटंग मोहोर चिच्‍चस ती बाचस, ‘एंग्‍है किर्ना गूटी ख़ेन्‍दके पिटके।’ 14लिकिन आसी नगरे ता आलर आसिन हींड़'आ लगियर। अरा एन्ने ब'अरकी आसी ख़ॊख़ा ओन्‍टा पैकारिन त‍इय्यर का ईसिन एम्‍है बॆल उइय्या गे एमा मने मलकी।

15लिकिन आस बॆल अदिया ख़क्‍खियस ती किर्रियस। ख़ने आस तंग्‍है जॊंख़ारिन मॆख़ा गे आनियस नॆ तंग्‍है ती मोहोर ख़क्‍खर। इदगे का आस अख़'आ ओंग्‍दस का आर ऎ बग्‍गे अदिन ती अर्जाचर। 16ख़ने मुन्‍दतस बरचस ती बाचस, ‘अना उर्बायो। निंग्‍है चिच्का ओन मोहोर ती दस मोहोर अर्जाचकन।’ 17ख़ने बॆलस आसिन बाचस, ‘बॆस बने! नीन दौ जॊंख़स हिकदय। नीन जुक्‍किम नू पत्त'अना जॊगे रहचकय, ख़ने नीन दस गोटंग नगरे ही उर्बस मना।’ 18अरा दुसरस बरचस ती बाचस, ‘अना उर्बायो। निंग्‍है चिच्का ओन मोहोर ती पांच गोटंग मोहोर अर्जाचकन।’ 19ख़ने बॆलस आसिन बाचस, ‘नीन हूँ पांच गोटंग नगरे ही उर्बस मना।’

20तहाँ तिसरस बरचस ती बाचस, ‘अना उर्बायो, ऎरा, इदिम निंग्‍है मोहोर, इदिन ऎन ओन्‍टा किचरी नू गठिय'अरकी नुड्डका उइय्का रहचकन। 21ऎन गा निंगन एल्‍चा लिक्‍कन, इदगे का नीन खरखर आलय हिकदय, नीन मल ख़ॊंड़च‍कय अदिन हो'अदय अरा मल चाँख़कय अदिन ख़ोयदय।’ 22ख़ने बॆलस आसिन बाचस, ‘अना मलदौ जॊंख़, निंग्‍है कत्‍था तिम ऎन निंगन नेंव‍ई नन्‍दन। नीन एंगन अक्कय का ऎन खरखर आलन हिकदन, ऎन मल ख़ॊंड़च‍कन अदिन हो'अदन अरा मल चाँख़कन अदिन ख़ोयदन। 23होले नीन एंग्‍है मोहोरन एन्‍देरगे नहड़ा हो'उर गे मल चिच्‍कय? होले ऎन बर'ओन ती अदिन ख़द गनेम हो'ओन दने।’ 24ख़ने बॆलस हेद्दे इज्‍जका आलारिन बाचस, ‘ई मोहोरन ईसी गुसते हो'आ अरा नॆखा गुसन दस मोहोर र'ई आस गे चि'आ।’ 25अरा आर आसिन बाचर, ‘अना उर्बायो, आसी गुसन गा दस गोटंग मोहोर र'ई।’ 26बॆलस बाचस, ‘ऎन निमन ब'अदन का नॆखा गुसन र'ई आर गे चीर'ओ, अरा नॆखा गुसन मल्‍ला आसी ती र'ई अदिन हूँ होतारो।#मत्ता 13:12; मर 4:25; लूक 8:18 27लिकिन एंग्‍है अबड़ा बैरीरिन नॆ तम्‍है म‍इय्‍याँ ऎन राजी नना गे मल बिद्दियर, आरिन एंग्‍है मुन्‍दहारे ओन्‍द्र'आ ती पिटा।’”

येसुस येरुसलॆम नू बॆलस लेक्‍खा कोरदस

(मत्ता 21:1-11; मर 11:1-11; यॊ 12:12-19)

28इबड़ा कत्‍थन बाचस ती येसुस येरुसलॆम तरा काला हेलरस। 29अरा आस जैतून नामे परता हेद्दे बॆतफगे अरा बेतानिया पद्द गुट्ठी हेद्दे बरचस। ख़ने तंग्‍है चेलर ती इरिबारिन एन्ने बाचस ती त‍इय्यस। 30“निम्‍है मुन्‍दहारे ता पद्दा नू कला, अरा नीम अइय्या कोरना गनेम ओन्टा गदहा ख़द्दन खुटुरका ख़क्‍खोर, अइय्या नॆ हूँ इकला हूँ मल अरगकी र'ई, अदिन बिछर'आ ती ओन्‍द्र'आ। 31नेक‍ईम इदन एन्‍देर नना गे बिछरदर ब'ओर होले, ब'अके, उर्बस गे इदही चाड़ र'ई।”

32त‍इरका आलर केरर अरा एकासे येसुस आरिन बाचस अन्नेम ख़क्‍खियर। 33अरा आर गदहा ख़द्दन बिछर'आलियर, ख़ने अदही उर्बर आरिन मेंजर, “नीम ख़द्दन एन्‍देरगे बिछरदर?” 34आर बाचर, “उर्बा येसुस गे इदही चाड़ र'ई।” 35आर अदिन येसुस गुसन ओन्‍द्रर, अरा तम्‍है किचरी गुट्ठिन गदही ख़द्द म‍इय्याँ झपचर अरा येसुसिन अइय्या ओकताचर। 36आस एकासे एकासे मुन्‍दहारे काला लगियस ख़ने आलर तम्‍है किचरिन डहरे नू अट्टनुम केरर। 37आस जैतून परता ही दलखा हेद्दे अंड़सियस ख़ने चेलर ही गोट्टा गोंहड़ा आर ईरका आसी जम्मा सवंग ही नलख गुट्ठी चड्डे खुसमारर अरा जॊर चिच्चि‍यारर ती धर्मेसी ओहमा नना हेलरर। 38अरा बाचर,

“आ बॆलासिन धर्मेस आसीस चि'ओस एकास उर्बासी नामे ती बरदस।

अक्‍कु धर्मेस अरा आलर ही मझी नू सान्‍ति अरा उर्मी ती कोहाँ धर्मेस गे ओहमा मनन नेकअन।”#भज 118:26

39अरा गोंहड़ा नू जोक्‍क फरिसीर रहचर। आर येसुसिन बाचर, “अना गुरु! निंग्‍है चेलर ही चिच्चि‍यारनन छेक'आ।” 40येसुस आनाकिर्ताचस, “ऎन निमन ब'अदन, ईर ठकर'ओर होले पखना चिच्चि‍यार'आ हेलर'ओ।”

येसुस येरुसलॆम गे चींख़ालदस

41एकाबारी येसुस येरुसलॆम हेद्दे अंड़सियस ख़ने, नगरेन ईरियस ती चींख़ियस। 42अरा बाचस, “निंग्‍है ख़क्ख्रका ई उल्‍ला नू गा नीन निंग्‍है सान्‍ति ही कत्‍थन अख़'ओय होले दौ मनो दने। लिकिन अक्‍कु इबड़ा निंग्‍है ख़न्न ती नूख़्रकी र'ई। 43निंग्‍है म‍इय्याँ एन्ने उल्‍ला बर'ओ का निंग्‍है बैरिर निंगन ओनबेंड़र'आ घेर'ओर ती मझि'ओर, अरा ओर्मा तरती निंगन चिप'ओर। 44अरा आर निंगन अरा निंग्‍है उर्मी आलारिन नठाब'ओर, अरा निंग्‍है नू ओन्‍टा पखना म‍इय्याँ ओन्‍टा पखना र'आ गे मल चि'ओर, एन्‍देरगेका नीन निंग्‍है गुसन धर्मेस बरना ही बेड़न मल चिन्‍हचकी।”

येरुसलॆम मन्‍दिर नू येसुस

(मत्ता 21:12-17; मर 11:15-19; यॊ 2:13-22)

45तहाँ येसुस धर्मेसी मन्दिर ही चाली नू कोरचस ती अइय्या ता ख़ीन्दू पिटुरिन ओथ्र'आ हेलरस। 46अरा आरिन बाचस, “नेम्हा पुथी नू लिख्रकी र'ई, ‘एंग्‍है एड़पा गोहरारना ही एड़पा मनो।’ लिकिन नीम अदिन डाकुर ही मड़ा कमचकादर।”#यसा 56:7; यिर्म 7:11

47येसुस उल्‍ला उल्‍ला नू धर्मेसी मन्दिर ही चाली नू सिखाब'आ लगियस। अरा मुध नैगर अरा नॆग सिखाब'उर अरा आलर ही जोक्‍क मुद्धर आसिन पिटा गे मोका बेद्दा लगियर।#लूक 21:37 48लिकिन एन्‍देर उपाय हूँ नना पोल्‍लर का एन्ने एकासे ननोम, एन्‍देरगेका ओर्मा आलर आसहीन मेना लक्‍का रहचर।

Currently Selected:

लू‍कस 19: KURUXBSI

Highlight

Copy