यॊहनस 13

येसुस चेलर ही ख़ेड्डे नॊड़दस

1कट्टना परब ही मुन्‍द येसुस अक्‍खस का ई ख़ॆख़लन अम्‍बना ती तम्‍बस गुसन तंग्‍है काना बेड़ा अंड़सिया। आस तंग्‍है आलर नॆ ई ख़ॆख़ेल नू रहचर, आरिन सगरो चोन्‍हा नंजका रहचस, अरा आरिन मुंजा गूटी चोन्‍हा नंजस।

2येसुस अरा आसी चेलर पुतबारी ता मंडी ओना उक्‍का रहचर। नाद सिमॊनसी तंग्‍दस यूदस इसकारियॊतसी जिया नू येसुसिन धरत'आ गे पपहर गे संगे चि'आ गे मतिन सज्‍ज ख़च्‍चकी रहचा। 3येसुस अक्‍खस का बंगस उर्मी ही म‍इय्याँ तंगा गे आकुस चिच्का रहचस, अरा तान धर्मेस गुसते बरचकाचस, अरा धर्मेस गुसन किर्रा लगदन। 4येसुस ओन्ना पाँती ती चॊचस, अरा तंग्‍है थालर आबोन इच्‍चियस ती संफी ती तंग्‍है कड़मन हॆंचस। 5फिन थरा नू अम्मु एल्‍खस ती तंग्‍है चेलर ही ख़ेड्डेन नॊड़ा हेलरस, अरा कड़मा नू हॆंरका संफी ती चींचा हेलरस।

6फिन आस सिमॊन पतरस गुसन बरचस ख़ने, पतरस आसिन बाचस, “उर्बायो! नीन एंग्‍है ख़ेड्डेन नॊड़ा कालदय का?” 7येसुस आनाकिर्ताचस, “ऎन एन्‍देर नना लगदन अदिन नीन अक्‍कुन मल बुझुरदय, लिकिन ख़ॊख़ा बुझुर'ओय।” 8पतरस बाचस, “मला, नीन एंग्‍है ख़ेड्डेन इकला हूँ मल नॊड़ना र'ई।” ख़ने येसुस बाचस, “ऎन निंग्‍है ख़ेड्डेन मल नॊड़ोन होले, नीन एंग्‍है आलर ती ओर्त मलदय।” 9ख़ने सिमॊन पतरस आसिन बाचस, “अना उर्बायो, होले एंग्‍है ख़ेड्डे लेका मला ख़ेक्खा अरा कुक्‍कन हूँ नॊड़ा।” 10येसुस बाचस, “ओर्तोस एमच्‍का ख़ॊख़ा, आसी गोट्टा मॆद सफा र'ई, आस ख़ेड्डेन लेका नॊड़ा गे चाड़ र'ई। नीम सफा र'अदर, लिकिन निम्‍है ती ओर्मर मला।” 11एन्‍देरगेका येसुस अक्‍खस का नॆ तंग्‍है बिड़दो मनोस, औंगे आस बाचस, “निम्‍है ती ओर्मर सफा मलकर।”

12आस आर ही ख़ेड्डेन नूड़ियस मुंजियस ती तंग्‍है थालर आबोन अत्तियस। फेन तंग्‍है अड्डा नू उक्‍कियस अरा आरिन मेंजस, “नीम बुझुरदर का ऎन निम्‍है गने एन्‍देर नंजकादन?#लूक 22:27 13नीम एंगन ‘गुरु’ अरा ‘उर्बय’ एन्ने मॆख़दर, अरा एन्ने निम्‍है मॆख़ना ठ‍उकम हिके, एन्‍देरगेका ऎन आसिम हिकदन। 14ऎन निम्‍है उर्बय अरा गुरु हिकदन, अन्नु हूँ ऎन निम्‍है ख़ेड्डेन नूड़कन, नीम हूँ अन्ने ओर्त ओर्तोसी ख़ेड्डेन नॊड़के। 15एन्‍देरगेका ऎन निमा नमुना ऎदकन। एकासे ऎन निम्‍है गने नंजकन, अन्नेम नीम हूँ ननके। 16ऎन निमन मानिम ब'अदन, जॊंख़स तंग्‍है उर्बस ती कोहँस मलदस, अरा तइरकस आसिन तइय्युस ती कोहाँ मलदस।#मत्ता 10:24; लूक 6:40; यॊ 15:20 17अक्‍कुन नीम इबड़ा कत्‍थन अख़दर, अरा इबड़न नीम नन्‍दर होले, धर्मेस निमन बरकत ननोस।

यूदस येसुसी बिड़दो मन्ना

(मत्ता 26:20-25; मर 14:17-21; लूक 22:21-23)

18ऎन नीम ओर्मर ही पत्त नू मल ब'अदन। ऎन अख़दन का ऎन नॆकन नॆकन चज्जिकादन। लिकिन ईद इदगे मनी का नेम्‍हा पुथी नू लिख्रका कत्‍था मन्ना र'ई, ‘एकास एंग्हा गने मोक्‍खस आस दिम एंग्‍है बिड़दो मंजकादस।’#भज 41:9 19ऎन अक्‍कु आद मन्‍ना ती मुन्‍द तेंगदन, औंगे एकाबारी आद मनी आ बारी नीम पत्त'ओर का ऎन आसिम हिकदन। 20ऎन निमन मानिम ब'अदन, ऎन तइय्‍का नॆक'अनिम नॆ इंझ्रदस, आस एंगन हूँ इंझ्रदस। अरा नॆ एंगन इंझ्रदस, आस एंगन नॆ तइय्कादस आसिन हूँ इंझ्रदस।”#मत्ता 10:40; मर 9:37; लूक 9:48; 10:16

21इबड़न बाचस ती येसुस जिया नू उकुल बुकुल मंजस ती हरकट ती बाचस, ऎन निमन मानिम ब'अदन, “निम्‍है ती ओर्तोस एंगन धरत'आ गे संगे चि'ओस।” 22चेलर पयपयारर केरर ती आस नॆख'आ पत्त नू ब'अदस बाचर ती ताम तामिम ऎरा नख्र'आ हेलरर। 23चेलर ती ओर्तोस, नॆकन येसुस चोन्‍हा नंजस, आस येसुसी धरी नू उक्‍का रहचस। 24सिमॊन पतरस आसिन मिटकाचस ती येसुस नॆख'आ पत्त नू बाचस एन्ने येसुसिन मेना गे बाचस। 25ख़ने आस होबोर मंजस ती येसुसिन मेंजस, “उर्बायो, आस एका ओर्तस?” 26ख़ने येसुस बाचस, “नॆकन ऎन असमा कुटकन थरा नू ओत्तोन ती चि'ओन, आसिम हिकदस।” अरा आस असमा कुटकन होच्‍चस ती उत्तियस ती सिमॊनसी तंग्‍दस यूदस इसकारियॊतस गे चिच्‍चस। 27अरा यूदस असमा कुटकन इंझ्रना गनेम सैतान यूदस नू समसारा केरा। फिन येसुस आसिन बाचस, “निंगा एन्‍देर नन्‍ना र'ई अदिन चाँड़हे नना।” 28ओना उक्‍का आलर नॆ हूँ मल बुझ्रर का येसुस आसिन एन्ने एन्‍देरगे बाचस। 29यूदस ढिबा ही थोलकोन उइय्या लगियस, ख़ने जोक्‍कोर सोच्‍चर का परब नू चाड़ मनो अबड़न ख़ेन्‍दा गे महले कीड़र गे इन्द्रिइम चि'आ गे येसुस आसिन बाचस। 30असमा कुटकन इंझ्रस ती आ बारिम यूदस बहरी किर्रिम बिच्‍चियस। आ बारी माख़ा रहचा।

पुना पॆसका

31यूदस केरका ख़ॊख़ा येसुस बाचस, “अक्‍कु मनवा ख़द्दन एंगा महबा दहदर मनी, अरा एंग्‍है ती धर्मेसी महबा दहदर मनी। 32अरा एंग्‍है ती धर्मेसी महबा दहदर मनी होले, धर्मेस हूँ मनवा ख़द्दन एंगा महबन तंग्‍है ती दहदर ननोस, अरा लॆम अदन ननोस। 33खद्दारो! जोक्‍क घड़ी लेका निम्‍है गने र'ओन। अरा नीम एंगन बेद्दोर, अरा ऎन एकासे यहूदी मुद्धारिन बाचकन अन्नेम अक्‍कुन ऎन निमन ब'अदन का ऎन एक्‍सन कादन असन नीम काला पोल्‍दर।#यॊ 7:34 34ऎन निमा गे ओन्‍टा पुना पॆसका चि'अदन, नीम ओर्त ओर्त गने चोन्‍हा नना। एकासे ऎन निमन चोन्‍हा नंजकन, अन्नेम नीम हूँ ओर्त ओर्त गने चोन्‍हा नन्‍ना र'ई।#यॊ 15:12,17; 1यॊ 3:23; 2यॊ 5 35नीम एन्ने ओर्त ओर्त गने चोन्‍हा ननोर होले, ओर्मा आलर अख़'ओर का नीम एंग्‍है चेलर हिकदर।”

पतरस येसुसिन बलदन ब'अना ही पत्त नू तेंगना

(मत्ता 26:31-35; मर 14:27-31; लूक 22:31-34)

36सिमॊन पतरस येसुसिन मेंजस, “उर्बायो, नीन एक्‍सन कालदय?” येसुस बाचस, “एक्‍सन ऎन कालदन असन नीन अक्‍कुन एंग्‍है गने चॊंख़्र'आ पोलदय, लिकिन ख़ॊख़ा नीन एंग्‍है गने चॊंख़्र'ओय।” 37पतरस आसिन मेंजस, “उर्बायो, एन्‍देरगे अक्‍कुन ऎन निंग्‍है गने चॊंख़्र'आ पोलदन? ऎन गा निंगा गे एंग्‍है जियन हूँ चि'ओन।” 38येसुस आसिन बाचस, “नीन एंगा गे निंग्‍है जियन हूँ चि'ओय का? निंगन ऎन मानिम ब'अदन, ख़ॆर चींख़ना ती मुन्‍द तीन हॆल नीन एंगन बलदन ब'ओय।”

Currently Selected:

यॊहनस 13: KURUXBSI

Highlight

Copy