Mk 16

Punorjivontponn

(Mt 28:1-8; Lk 24:1-11; Ju 20:1-10)

1Sabbath sorlea uprant, vochun Jezuchê kuddik lavunk, Mari Magdalen, Jakobachi avoi Maria ani Salome, hãnnim pormollit mosalo vikto gheun haddlo. 2Ani satolleachea poilea disa bhov sokallim, suria udetana, teô somadhi-xim aileô. 3Teô ekamekak mhonntaleô: “Somadhichea tondda veli fatôr konn amkam dhuklun ditolo?” 4Punn nodor mar zalear, ti fatôr, borich vhoddli asun-ui, dhukol’leli tãnnim dekhli. 5Somadhint bhitôr vochun, dhovem anglem neslolo êk tornnatto uzvean boslolo tãnnim dekhlo ani teô kampleô. 6Punn tannem mhonn’lem: “Bhiem nakat; khursar marlelea Nazaretkar Jezuk tumi sôdtat; Devan Taka punorjivont kelo; To hanga na. Taka dovorleli ti svat polleiat. 7Punn To tumchê adim Galileiak veta, ani Tannem sanglelea pormannem, tumi Taka thõi dekhtelet mhonn Tacheam xisank ani Pedruk sangat. 8Bhirantin borun ani ojab zaun te somadintlim bhair sorun, teô bailô pollun geleô; tancher bhõi ani kampero suttlolo dekhun tãnnim konnakuch kãi sangunk na.

Jezu Mari Magdalenak Dixtti Poddta

(Mt 28:9-10; Ju 20:11-18)

9Satolleachea poilea disa, sokallim punorjivont zaun, Jezu poilo Mari Magdalenak dixtti poddlo; tichê vele Tannem sat devchar kaddlele. 10Tinnem vochun Tachê borabôr astalim ani atam dukh korun roddtalim tankam kollit kelem. 11Punn To jivo asa ani tika dixtti poddla mhonn tãnnim aikun-ui sotmanunk na.

Jezu Dogam Xisank Dixtti Poddta

(Lk 24:13-35)

12Hachê uprant tanchê bhitorle dog zann eka ganvant cholun vetale; dusrem ek rup gheun To tankam dixtti poddlo. 13Tãnnim ieun herank sanglem, punn hanchem-i tãnnim sotmandunk na.

Jezu Ikra Zannank Dixtti Poddta

(Mt 28:16-20; Lk 24:36-49; Ju 20:19-23; AI 1:6-8)

14Xekim, ikra zann jevtastana, tankam To dixtti poddlo. Apnnak punorjivont zal’lo dekhlolo tanchem tãnnim sotmanun ghetlem na dekhun, bhavart dhôrchê svater aplench khorem korun ravle mhonnun Tannem tankam bexttaile. 15Ani Tannem tankam sanglem: “Akhea sonvsarak vochat, sogllê rochnnek xubhvhortoman porgôttat. 16Bhavart dhôrtit ani batism ghetit tankam soddvônn mellteli; punn bhavart dhôrinam zatit tim khastichem formonn ghetelim. 17Bhavart dhôrteleam sovem heô khunna dixtti poddteleô: Mhojea Nanvan devchar kaddtelim, noveô bhasô uloitelim, 18sorop dhôrtelim, ani jiv kaddpachem kitem-i tim pietit bi, tankam tem vaitt zaunchem na, piddevontancher hat dovrun tim tankam borim kortelim.

Jezu Sorgar Choddun Veta

(Lk 24:50-53; AI 1:9-11)

19Ani Somia Jezun tanchê kodde uloun sompoitôch, Devan Taka voir sorgar ubarun vhelo ani thõi To Devachea uzveak bosla. 20Xisamnim vochun sogllê kodden xubhvhortoman porgôttlem. Somi tanche borabor vaurun, ghodd’talim team vizmitam vorvim, tanchem utor sot mhonn thiraitalo.#16:20 Mk 16:9-20: Ho akho bhag Markuchea xubhvhortomanacho “lamb xevôtt.” To zaiteam hostolekhancher mellona. To Markun borounk naslo, punn teanch poileam vorsamnim anink konnem uprant laila mhonn zannar mon’xank disun ieta. Tori poilim thaun povitr-sobhen lamb xevôtt-ui Povitr Atmeachea preronnan boroil’lo mhonn manun ghetlo. Anink êk “mottvo xevôtt” team hostolekhancher dil’lo mellta, ani ho ki khud Markun boroila astolo. To oso: “ 9 Bailamnim vochun apnnank sanglelem titlem-i Pedruk ani tacheam sangateank thoddeam utramnim kollit kelem. 10. Tea uprant khud Jezun Apleam xisam udexim Udenti thaun Ostomtê porian sasnnik taronnacho povitr ani ovinaxi sondêx porgôtt kelo.”

Currently Selected:

Mk 16: KONKABSI

Highlight

Copy