ÏOANNIS 1

U Ktien jong ka Jingim

1Ha shuwa ban thaw ïa ka pyrthei, u Ktien u la lah don lypa; u la don bad U Blei, bad u long kumjuh kum U Blei. 2Naduh kaba sdang u Ktien u la don bad U Blei. 3Da u, la thaw ïa kiei kiei baroh; ym don kawei ruh na ka jingpynlong baroh kaba la thaw khlem ma u. 4U Ktien u la long u tyllong jong ka jingim; bad kane ka jingim ka la wanrah ka jingshai ïa u bynriew. 5Ka jingshai ka shai ha kaba dum, bad ka jingdum kam lah ban pynlip ïa ka.

6-7 # Mat. 3:1; Mrk. 1:4; Luk. 3:1,2 U Blei u la phah ïa u nonglamktien jong u, u briew uba kyrteng u Ïoannis, uba la wan ban ïathuh ïa ki briew shaphang ka jingshai, ba baroh ki dei ban shahshkor ïa ka khubor bad ban ngeit. 8U hi da lade um dei ka jingshai; u la wan ban ïathuh shaphang ka jingshai. 9Kane ka la long ka jingshai kaba shisha — ka jingshai kaba wan sha ka pyrthei bad pynshai ha u bynriew baroh.

10U Ktien u la don ha ka pyrthei, bad wat la U Blei u la thaw ïa ka pyrthei da u, pynban, ka pyrthei kam shym la ithuh ïa u. 11U la wan sha la ka jong ka ri, hynrei ki briew jong u hi kim shym la pdiang ïa u. 12Katto katne pat, ki la pdiang ïa u bad ki la ngeit ha u; kumta u la ai bor ha ki, ban long ki khun U Blei. 13Kim shym la long ki khun U Blei katba kum ka rukom, kata, da kaba kha kum ki khun u kpa ha ka doh; U Blei hi u la long U Kpa jong ki.

14U Ktien la kylla long u briew bad, uba dap da ka jingaiei bad ka jingshisha, u la im hapdeng jong ngi. Ngi la ïohi ïa ka burom jong u, ka burom kaba u la ïohpdiang kum U Khun marwei jong U Kpa.

15U Ïoannis u la kren shaphang jong u. U la pyrta jam, “Une u long uta ïa uba nga la kren shaphang jong u, mynba nga la ong, ‘U wan hadien jong nga, hynrei u kham khraw ban ïa nga, namar u la don shuwa ban kha ïa nga.’ ”

16Na ka jingdap jong ka jingaiei jong u, u la kyrkhu ïa ngi baroh, da kaba ai ha ngi ïa ka jingkyrkhu kawei hadien kawei pat. 17U Blei u la ai ïa ka hukum lyngba u Moses, hynrei ka jingaiei bad ka jingshisha ki la wan lyngba U Jisu Khrist. 18Ym don mano mano ruh uba la ïohi ïa U Blei. U Khun ba marwei jong u, uba long kumjuh kum U Blei bad uba don ha syndah jong U Kpa, u la pynpaw shynna ïa u.

Ka Khubor u Ïoannis u Nongpynbaptis

(Mat. 3:1-12; Mrk. 1:1-8; Luk. 3:1-18)

19Ki nongsynshar jong ki Jiw ha Jerusalem ki la phah katto katne ngut ki lyngdoh bad ki Lebi sha u Ïoannis, ban kylli ïa u, “Me dei uei?”

20U Ïoannis um shym la kyntait ban jubab, hynrei, u la kren ha kaba paw bad da kaba shai, u da ong, “Ngam dei u Messaïah.”

21 # Mal. 4:5; Deut. 18:15,18 “Te, me dei uei?” ki la kylli, “Hato me dei u Elijah?”

“Em, ngam dei,” u Ïoannis u la jubab.

“Hato me dei u nongïathuhlypa?” ki la kylli.

“Em,” u la jubab.

22“Te ïathuh ïa ngi me dei uei,” ki la ong. “Ngi hap ban rah ïa ka jubab sha kito kiba la phah ïa ngi. Kumno me ong shaphang ïa lade?” 23#Isa. 40:3U Ïoannis u la jubab da kaba shim na u nongïathuhlypa Isaïah: “Nga long ‘ka sur jong uta uba pyrta ha ka ri shyiap: To pynbeit ïa ka lynti ïaid jong U Trai ba un ïaid!’ ” 24-25Ki nonglamktien, ïa kiba la phah da ki Pharisi, ki la kylli te ïa u Ïoannis, “Lada mem dei u Messaïah lane u Elijah lane u nongïathuhlypa, balei pat me pynbaptis?” 26U Ïoannis u la jubab, “Nga pynbaptis da ka um, hynrei hapdeng jong phi don uwei uba ïeng uba phim ithuh. 27U wan hadien jong nga, hynrei nga ngam long uba bit wat ban law ïa ki ksai juti jong u.”

28Kane baroh ka la jia ha Bethania kaba don ha ka phang mihngi jong ka wah Jordan, ha kaba u Ïoannis u la pynbaptis.

U Khunlangbrot jong U Blei

29Ha ka sngi kaba bud, U Ïoannis u la ïohi ïa U Jisu ba u wan sha u, bad u la ong, “Ha khmih, U Khunlangbrot jong U Blei, uba kit noh ïa ka pop jong ka pyrthei! 30Une u long uta ïa uba nga la kren mynba nga la ong, ‘U briew uba wan hadien jong nga, hynrei u long uba kham khraw ban ïa nga, namar u la don shuwa ban kha ïa nga.’ 31Ngam pat shym la tip u dei uno, hynrei nga la wan ïa ka ban pynbaptis da ka um, khnang ba yn ïoh pynithuh ïa u ha ki paid Israel.”

32Bad u Ïoannis u la ai ïa kane ka jingphla: “Nga la ïohi ïa U Mynsiem ba u hiar kum ka paro na bneng, bad u shongsah halor jong u. 33Ngam pat shym la tip hi ba u dei ma u, hynrei U Blei, uba la phah ïa nga ban pynbaptis da ka um, u la ong ha nga, ‘Men sa ïohi ïa U Mynsiem ba u hiar bad u shongsah ha u briew; u dei uta, uba pynbaptis da U Mynsiem Bakhuid.’ 34Nga la ïohi ïa kata,” la ong U Ïoannis, “bad nga ong ha phi ba une u dei U Khun U Blei.”

Ki Synran kiba nyngkong jong U Jisu

35-36Ha ka sngi kaba bud, u Ïoannis u dang ïeng biang hangta bad ar ngut na ki synran jong u, mynba u la ïohi ïa U Jisu ba u dang ïaid nangta. “Ha khmih U Khunlangbrot U Blei!” u la ong.

37Ki ar ngut ki synran ki la ïohsngew ïa u ba u ong ïa kane bad ki la leit lem bad U Jisu. 38U Jisu u la phai, u la ïohi ïa ki ba ki bud ïa u, bad u la kylli, “Phi ïawad aïu?” Ki la jubab ïa u, “Hangno me sah, ko Rabbi?” (Kane ka kyntien ka mut “U Nonghikai”.)

39“To wan bad khmih,” u la jubab. (Ka la long ha kata ka por kumba saw baje janmiet.) Kumta ki la leit bad u, bad ki la ïohi hangno u sah, bad ki la pynlut ïa kaba sah jong ka sngi bad u.

40Uwei na ki u la long u Andriw, uba shi para bad u Simon Petros. 41Mar kumta u la shem ïa u Simon, u para jong u bad u la ong ha u, “Ngi la shem ïa u Messaïah.” (Kane ka kyntien ka mut “U Khrist”.) 42Te u la ïalam ïa u Simon sha U Jisu. U Jisu u la peit ïa u bad u la ong, “Ka kyrteng jong me ka long u Simon u khun jong u Jona, hynrei yn khot ïa me u Kephas.” (Kane ka long kumjuh kum ka kyntien “Petros” kaba mut “u mawsiang”.)

U Jisu u khot ïa u Philip bad ïa u Nathanael

43Ha ka sngi kaba bud, U Jisu u la kut jingmut ban leit noh sha Galilaïa. U la shem ïa u Philip bad u la ong ha u, “To wan bad nga!” 44(U Philip u dei na Bethsaida, ka shnong ha kaba u Andriw bad u Petros ki sah.) 45U Philip u la shem ïa u Nathanael bad u la ong ïa u, “Ngi la shem ïa uta ïa uba u Moses u la thoh ha ka kitab jong ka Hukum bad ïa uba ki nongïathuhlypa ruh ki la thoh shaphang jong u. U long U Jisu, u khun jong u Joseph, uba na Nasareth.”

46“Hato kano kano kaba bha ka lah ban mih na Nasareth?” U Nathanael u la kylli. “To wan bad khmih,” la jubab u Philip.

47Haba U Jisu u la ïohi ïa u Nathanael ba u wan sha u, u la ong shaphang jong u, “Une u dei u kynja Israel uba shisha, ym don kano kano ka bymshisha ha u!”

48U Nathanael u la kylli ïa u, “Kumno me ithuh ïa nga?”

U Jisu u la jubab, “Nga la ïohi ïa me mynba me dang don ha trai u dieng Dumbur ha shuwa ba u Philip un khot ïa me.”

49“Ko Nonghikai,” la jubab u Nathanael, “me long U Khun U Blei! Me long u Syiem ki Israel!”

50U Jisu u la ong, “Hato me ngeit tang namar ba nga la ïathuh ïa me ba nga la ïohi ïa me mynba me dang don ha trai u dieng Dumbur? Men sa ïohi ïa kiei kiei kiba kham khraw ban ïa kane!” 51#Jen. 28:12Bad u la ong ha ki, “Nga ïathuh ha phi ïa ka jingshisha: Phin sa ïohi ïa ka bneng ba la plie bad ki angel jong U Blei ba ki ïakiew bad ïahiar ha U Khun U Briew.”

Currently Selected:

ÏOANNIS 1: KHACLBSI

Highlight

Copy