EPHESOS 6

Ka jingïadei ki khun bad ki kmie ki kpa

1 # Kol. 3:20 Phi ki khun, ka long ka kamram kum kiba ngeit ban kohnguh ïa la ki kmie ki kpa, namar kane ka long kaba phi dei ban leh. 2#Eks. 20:12; Deut. 5:16“To burom ïa la u kpa bad ïa la ka kmie,” kaba long ka hukum kaba nyngkong kaba don ka jingkular ha ka: 3“Khnang ba baroh kan long bha bad phi, bad ba phi lah ban im slem ha ka khyndew.”

4 # Kol. 3:21 Phi ruh ki kmie ki kpa, wat leh ïa la ki khun ha kata ka rukom ban pynbitar ïa ki, pynban to pynheh pynsan ïa ki ha ka jingsneng bad jinghikai ba kynja mynsiem.

Ka jingïadei hapdeng ki mraw bad ki kynrad

5 # Kol. 3:22-25 Phi ki mraw, to kohnguh ïa la ki kynrad da ka jingsheptieng bad ka jingkhynñiuh; bad leh ïa ka da ka dohnud basngur, kumba phi shakri ïa U Khrist. 6Leh ïa kane ym tang haba ki khmih ïa phi, namar ba phi kwah ban ïoh ka jingmynjur jong ki; hynrei, leh naduh ka dohnud baroh ïa kaei kaba U Blei u kwah, kum ki mraw U Khrist. 7Trei ïa la ka kam kum ki mraw da kaba kmen, kumba phi shakri ïa U Trai, bad ym tang ïa ki briew. 8To kynmaw ba U Trai un ainong ïa uwei pa uwei, la u mraw ne uba laitluid, namar ka kam babha ba u trei.

9 # Kol. 4:1; Deut. 10:17; Kol. 3:25 Phi ki kynrad, to leh ha kajuh ka rukom ïa ki mraw jong phi bad keiñ noh ki jingbyrngem. To kynmaw ba ma phi bad ki mraw jong phi, phi long ki jong ujuh U Kynrad uba ha bneng, uba bishar ïa baroh da kajuh ka jingthew.

Ka jingkieng ïa ki atiar U Blei

10Ha kaba pynkut noh, to long kiba khlaiñ ha U Trai bad ha ka bor ka jingkhlaiñ jong u. 11To kieng noh ïa ka jingkieng atiar U Blei baroh, khnang ba phi lah ban ïeng pyrshah ïa ki buit thap basniew jong u Soitan. 12Naba ngim ïaleh pyrshah ïa ki briew hynrei pyrshah ïa ki bor bymman ba kynja mynsiem ha ka pyrthei ba kynja bneng, ki nongsynshar, ki bor synshar, bad ki bor pyrthei jong kane ka juk ba-dum. 13Kumta to kieng mynta ïa ka jingkieng atiar U Blei! Nangta haba ka sngi basniew ka wan, phin lah ban ïeng ïaleh pyrshah ïa ki bor ïaleh u nongshun; bad hadien ba ka jingïaleh ka la kut, phin dang ïeng skhem ha ka nongrim jong phi.

14 # Isa. 11:5; Isa. 59:17 Kumta to ïeng ba la pynkhreh, da ka jingshisha kum u panpoh ba la pyndait ha ka syngkai jong phi, da ka hok kum ka jingda shadem jong phi, 15#Isa. 52:7bad da ka jinglong la kloi ban pynbna ïa ka Khubor Babha ka jingsuk, kum ki juti jong phi. 16Ha ki por baroh to bat ïa ka jingngeit kum ka stieh; naba da ka phi lah ban pynlip ïa ki sum bameh ding baroh jong u bymman. 17#Isa. 59:17Bad to pdiang ïa ka jingpynim kum ka jingïada khlieh, bad ka ktien U Blei kum ka waitlam kaba U Mynsiem u ai ha phi. 18To leh ïa kane baroh ha ka jingduwai, da kaba kyrpad ïa ka jingïarap jong U Blei. Duwai ha ki por baroh, katba U Mynsiem u ïalam. Namar kane ka daw, to sharai bad wat kynran dien; duwai borabor na ka bynta ki briew jong U Blei baroh. 19Bad to duwai ruh na ka bynta jong nga ba U Blei un ai ha nga ïa ka khubor haba nga la kloi ban kren, khnang ba nga lah ban kren shlur bad pynpaw shai ïa ka jingmaïan ka gospel. 20Na ka bynta kane ka gospel, nga long u nongkit 'tiensyiem wat la mynta nga don ha ïingbyndi. To duwai ba nga lah ban long uba shlur ha ka jingkren shaphang ka gospel kumba nga dei.

Ka jingai khublei khatduh

21 # Ki Kam. 20:4; 2 Tim. 4:12 # Kol. 4:7,8 U Tukhikos u long u parabangeit ba-ieit jong ngi, bad u shakri baïaineh ha ka kam U Trai, un ïathuh lut ïa ka khubor shaphang jong nga, khnang ba phin tip kumno nga ïaid shaphrang. 22Dei namar kata keiñ balei ba nga phah ïa u sha phi — ban ïathuh ha phi kumno baroh ngi long, bad ban pynshlur ïa phi.

23To U Blei uba U Kpa bad U Jisu Khrist uba U Trai un ai ha ki parabangeit baroh ïa ka jingsuk bad ka jingieit da ka jingngeit. 24To ka jingaiei U Blei kan long lem bad kito baroh kiba ieit ïa U Jisu Khrist uba U Trai jong ngi da ka jingieit baneh.

Currently Selected:

EPHESOS 6: KHACLBSI

Highlight

Copy