KI KAM 16

U Timothi u leit lem bad u Paul bad u Silas

1U Paul u la nang leit sha Derbe bad Lystra, ha kaba uwei u Khristan uba kyrteng u Timothi u shong u sah. Ka kmie jong u, kaba long ruh ka Khristan, ka long ka Jiw, hynrei u kpa jong u, u long u Grik. 2Baroh ki riewngeit ha Lystra bad Ikoniom ki ïakren babha shaphang u Timothi. 3U Paul u la kwah ban ïalam bad u ïa u Timothi, kumta u la otsher ïa u. U la leh kumta namar baroh ki Jiw kiba shong basah ha kita ki jaka ki tip ba u kpa jong u Timothi u long u Grik. 4Katba ki dang leit lyngba ïa ki shnong, ki la ai ha ki parabangeit ïa ki jingbuhbeit ryntih ba ki apostol bad ki nongsharai balang ha Jerusalem ki la rai, bad ki la bthah ïa ki ban kohnguh ïa kita ki jingbuhbeit ryntih. 5Kumta ïa ki balang la nang pynkhlaiñ ha ka jingngeit bad ki la nang roi ha ka jingbun briew man ka sngi.

Ha Troas: Ka jingïohipaw u Paul

6Ki la leit lyngba ki thain ka Phrygia bad Galatia namar U Mynsiem Bakhuid um shym la shah ïa ki ban ïalap ïa ka khubor ha ka probins#16:6 probins: Kane ka dei ba shu bud beit ïa ka kyntien Province ha ka jingspeldak Khasi. jong ka Asia. 7Haba ki la poi ha u pud jong ka Mysia, ki la pyrshang ban leit sha ka probins jong ka Bithynia, hynrei U Mynsiem jong U Jisu um shym shah ïa ki. 8Kumta ki la ïaid beit lyngba ka Mysia bad ki la leit sha Troas. 9Ha kata ka miet, u Paul u la ïoh ka jingïohipaw ha kaba u la ïohi ïa u nong Makedonia uba ïeng bad kyrpad ïa u, “Ale shane sha Makedonia bad ïarap ïa ngi!” 10Hadien ba u Paul u la ïoh ïa kane ka jingïohipaw, ngi la khreh ban leit sha Makedonia, namar ngi la rai ba U Blei u la khot ïa ngi ban ïalap ïa ka Khubor Babha sha ki briew hangta.

Ha Philippi: Ka jingkylla jong ka Lydia

11Ngi la mihnoh da ka lieng na Troas bad ngi la leit beit sha shiliang sha Samothraki, bad ha ka sngi kaba bud sha Neapolis. 12Nangta ngi la leit na ryngkew sha Philippi, ka nongbah jong ka distrik banyngkong jong ka Makedonia; kaba long ruh ka kyntoit shnong jong ki nong Rom. Ngi la pynlut bun sngi hangta. 13Ha ka sngi Sabbaton ngi la mih shabar na ka nongbah sha ka rudwah, ha kaba ngi la pyrkhat ba yn don ka jaka ha kaba ki Jiw ki ïalumlang ban duwai. Ngi la ïashong bad ïakren bad ki kynthei kiba la ïalumlang hangta. 14Kawei na kito kiba la ïohsngew ïa ngi ka dei ka Lydia kaba na Thiatira, ka dei ka nongdie ïa ka jaiñ sawbthuh. Ka long ka briew kaba mane ïa U Blei, bad U Trai u la plie ïa ka jingmut jingpyrkhat jong ka ban pynshahshkor ïa kaei kaba u Paul u ong. 15Hadien ba ma ka bad ki dkhot jong ka ïing jong ka ki la shah pynbaptis, ka la khot sngewbha ïa ngi, “To wan bad sah hapoh ka ïing jong nga lada phi la pdiang ba nga long ka parabangeit bashisha ha U Trai.” Bad ka la pynkohnguh ïa ngi ban leit.

Hapoh ka byndi ha Philippi

16Ha kawei ka sngi katba ngi dang ïaleit sha ka jaka duwai, kawei ka shakri samla kaba la don u mynsiem bymman uba la pynlah ïa ka ban ïathuh lypa ïa ka ban sa wan, ka la ïakynduh ïa ngi. Ka la kamai bun ka pisa na ka bynta ki trai jong ka da kaba batai kupar. 17Ka la bud ïa u Paul bad ïa ngi, ka da pyrta, “Kine ki briew ki long ki shakri U Blei Bahakhlieh Tam Eh! Ki pynbna ha phi kumno ba yn pynim ïa phi!” 18Ka la leh ïa kane bun sngi, haduh ba u Paul u la sngew salia eh ba u la phai sawdong bad u la ong ha uta u mynsiem bymman, “Ha ka kyrteng jong U Jisu Khrist nga hukum ïa me ban mihnoh na ka!” Uta u mynsiem bymman u la mihnoh na ka ha kata hi ka khyllipmat.

19Haba ki kynrad jong ka ki sngewthuh ba ka lad thaw pisa jong ki ka la duh noh, ki la kem ïa u Paul bad u Silas bad ki la tan ïa ki sha ki bor synshar ha ka jaka ïew. 20Ki la ïalam ïa ki sha ki rangbah synshar ka Hima Rom bad ki la ong, “Kine ki briew ki dei ki Jiw, bad ki la thaw jingkulmar ha ka nongbah jong ngi. 21Ki hikai ïa ki dustur kiba long pyrshah ïa ka aiñ jong ngi; ngi long ki traishnong jong ka Hima Rom, bad ngim lah ban pdiang ne pyndonkam ïa kine ki dustur.” 22Bad u paidbah u la ïasoh lang ha kaba tur pyrshah ïa u Paul bad u Silas.

Ki rangbah synshar ki la tar ïa ki jaiñ jong u Paul bad u Silas, bad ki la ai hukum ban sympat ïa ki. 23Hadien ka jingsympat kaba jur, la set phatok ïa ki, bad la ai hukum ïa u nongpeit phatok ban khang skhem ïa ki. 24Haba u nongpeit phatok u la ïoh ïa kane ka hukum, u la buh ïa ki sha ka kamra set kaba shapoh duh bad u la teh ïa ki kjat jong ki hapdeng ki dieng song kiba khia.

25Kumba shiteng synñia, u Paul bad u Silas ki dang duwai bad rwai ki jingrwai ïaroh ïa U Blei bad kiwei pat ki koidi ki dang shahshkor ïa ki. 26Kynsan la don ka jingkhynñiuh jumai kaba jur, kaba la pynkhynñiuh ïa ki nongrim jong ka byndi. Shisyndon ki jingkhang baroh ki la plie, bad ki kynjri ki la hap na ki koidi. 27U nongpeit phatok u la kyndit na kaba ïohthiah, bad haba u la ïohi ba ki jingkhang ka byndi ki la plie, u la pyrkhat ba ki koidi ki la phet; kumta u la sei ïa la ka waitlam bad u la mut ban dung ïap ïa lade. 28Hynrei u Paul u la pyrta da ka ktien kaba jam, “Wat pynmynsaw ïa lade. Ngi baroh ngi don hangne!”

29U nongpeit phatok u la pan ïa ka jingshai, u la rung shapoh, bad u la dem da kaba khynñiuh ha ki kjat jong u Paul bad u Silas. 30Nangta u la ïalam noh ïa ki shabar bad u la kylli, “Ko rangbah, kaei nga dei ban leh ba yn pynim ïa nga?”

31Ki la jubab, “To ngeit ha U Trai Jisu, bad yn sa pynim ïa me — ïa me bad ïa ka longïing jong me.” 32Nangta ki la ïalap ïa ka ktien U Trai ha u bad ha baroh kiwei pat kiba ha ka ïing jong u. 33Ha kata hi ka kynta jong ka miet, u nongpeit phatok u la ïalam ïa ki bad u la sait ïa ki jingmong jong ki; bad shisyndon la pynbaptis ïa u lem bad ka longïing jong u. 34Nangta u la ïalam ïa u Paul bad u Silas sha ka ïing jong u bad u la ai ha ki katto katne ka jingbam ban bam. Ïa u bad ka longïing jong u la pyndap da ka jingkmen, namar mynta ki la ngeit ha U Blei.

35Ha ka step kaba bud ki bor synshar ka Hima Rom ki la phah ïa ki rangbah pynïaidkam lem bad ka hukum, “Pyllait noh ïa kito ki briew.”

36Kumta u nongpeit phatok u la ïathuh ha u Paul, “Ki rangbah synshar ki la phah ka hukum ban pyllait noh ïa me bad ïa u Silas. Te phi lah ban mihnoh, bad leit ha kaba suk.”

37Hynrei u Paul u la ong ha ki rangbah pynïaidkam, “Ym shym la shem ïa ngi kiba la shah pynrem na kano kano ka kam runar, pynban ki la sympat ïa ngi ha khmat u paidbah — bad ngi dei ki traishnong ka Hima Rom! Nangta ki la thep ïa ngi sha ka byndi, bad mynta ki kwah ban phah noh jar jar ïa ngi. Ka bym lah long! Ki rangbah synshar ka Hima Rom ki dei ban wan hi da lade hangne bad pyllait ïa ngi.”

38Ki rangbah pynïaidkam ki la ïathuh ïa kine ki ktien ha ki rangbah synshar ka Hima Rom; bad haba ki la ïohsngew ba u Paul bad u Silas ki dei ki traishnong ka Hima Rom, ki la sheptieng. 39Kumta ki la leit bad pan map na ki; nangta ki la ïalam noh ïa ki shabar jong ka byndi bad ki la kyrpad ïa ki ban mihnoh na ka nongbah. 40U Paul bad u Silas ki la mihnoh na ka byndi bad ki la leit sha ka ïing jong ka Lydia. Hangta ki la ïakynduh ïa ki parabangeit, ki la kren ki kyntien pynshlur ïa ki, bad ki la leit noh.

Currently Selected:

KI KAM 16: KHACLBSI

Highlight

Copy